Jeremia 40 - Labrador Inuttitut Heritage Bible

¹ Oᴋausek tikilauᴋtoᴋ Jeremiamut Nâlakamit, Nebuzaradanib, ataniub udjertortingita angajoᴋângata aulartisimaᴋârlaungmago Ramamit, taipsomane tigulauramiuk ᴋelaksortaumajoᴋ ᴋelaumgujanut aularutijaujut Jerusalemit Judamillo akorngane, Babilonemut aularutijaujut ilagellugit.

² Ataniublo udjertortingita angajoᴋângata Jeremia tiguvâ oᴋautilugolo: Nâlakab Gudivit idluitoᴋ tamanna oᴋâlautigilauᴋpâ nunamut mattomunga;

³ Nâlakablo tikitisimavâ, piniarlune sorlo oᴋalaurame; Nâlagaᴋ idluitulivigilaurapsiuk, nâlalugaselo nippinganik, tamanna pivlugo tamattoma tikipâse.

⁴ Mânalo, ahâk, ᴋelarudjârpagit uvlome ᴋelaumgujanit aggangnêtunit. Idluarigungne Babilonemut aiᴋatigijomavlunga, ᴋailerit, pairitsiaromavagillo; idluigigungnele uvamnut ilauvlutit Babilonemut, ilautailigit; ahâk, nuna ilûnane sângnêpoᴋ; namullônêt aivigijomajarnut idluarijarnullo aituinarit.

⁵ Kajusingimallo sulle, oᴋautivâ: Tagva uterit Gedaliamut, Ahikamib, Sâfanib erningata, erninganut, Babilonib ataningata atanerusingortitanganut Judab iglugasaksoanginut, tâpsomanêlutillo inuit akorngane; namullônêt idluarijarnut aituinarit. Taimaimallo ataniub udjertortingita angajoᴋângata tunitjivigivâ taᴋoaksamik inôgutiksarsiniutiksamiglo, aulartilâllo.

⁶ Jeremialo aivoᴋ Gedaliamut, Ahikamib erninganut, Mispamut, tâpsomanêlerporlo inuit nuname amiakôjut akorngane.

⁷ Sorksuktuksallo angajoᴋângit ilûnatik nunatuinarmêtut, tâpkoalo angutingillo tusaramik Babilonib ataningata Gedalia, Ahikamib erninga, atanerusingortisimangmago nuname, tâpsomungalo pairijaksautingmagit angutit, arnallo, sorutsillo, aklunerpaujullo nuname, Babilonemut aularutijaungitut;

⁸ Tikiput Gedaliamut Mispamut, tagva Ismaêl, Netaniab erninga, Johananalo Jônatanalo, Kareab ernîgik, Seraialo, Tanhumetib erninga, Efaiblo Netofâmiub erningit, Jesanialo Maakamiub erninga, tâpkoa angutingillo.

⁹ Gedaliablo, Ahikamib, Sâfanib erningata, erningata angervigimarikpait tâpkoa angutingillo, oᴋarlune: Sivôraniarase Kaldêamiut kivgartorlugit; nunamêtuaritse Babiloniblo ataninga kivgartorlugo, ᴋanoeniangilaselo tagva.

¹⁰ Uvangale, ahâk, Mispame nunaᴋaromavunga, Kaldêamiut uvaptingnut tikilârtut sângine nangeromavlunga, ilipsele katersoileritse vainemik, paunganiglo aujaᴋsiutinik, orᴋsumiglo, torᴋorlugillo ᴋematulivipsingnut, iglugasaksoapsingnêtuaritselo pigijapsingne.

¹¹ Taimaktauᴋ Judit ilûnatik Moabemêtut, Ammoniblo kinguvângita akornganêtut, Edomemêtullo, nunanêtullo nalliane, tusaramik Babilonib ataningata Judakut amiakoᴋartisimangmagit, Gedalialo, Ahikamib, Sâfanib erningata, erninga angajoᴋângortisimangmago tâpkonunga;

¹² Judit ilûnatik uterput ajaktortauvigilauᴋtanginit tamainit, tikipullo Judab nunanganut, Gedaliamut Mispamut, katersoilutiglo vanemik paunganiglo aujaᴋsiutinik amigangimariktunik.

¹³ Johananalo, Kareab erninga, sorᴋsuksuksallo nunatuinarmêtut angajoᴋângit ilûnatik tikiput Gedaliamut Mispamut.

¹⁴ Oᴋautilugolo: Kaujimavêt Baalisib, Ammonib kinguvângita ataningata, Ismaêl Netaniab erninga tilisimangmago toᴋotsiᴋovlugo ilingnîk? Gedaliable Ahikamib erningata, okperingilait.

¹⁵ Johananiblo, Kareab erningata, angigutjilune Gedalia Mispame oᴋautivâ: Ailaulangatoᴋ, Ismaêlelo, Netaniab erninga, toᴋotsomavara ᴋaujimajoᴋartinago; sôᴋ tâpsoma toᴋotaksarivâtît, Judillo ilûnatik ilingnut katersortut siamarᴋolugit, Judablo amiakungit asserorᴋovlugît?

¹⁶ Gedaliable, Ahikamib erningata, Johanan, Kareab erninga oᴋautivâ: Taimailiortuksaungilatit; Ismaêl saglôtigivat.