Jeremia 4 - Labrador Inuttitut Heritage Bible

¹ Uteromaguvit, Israêle, Nâlagaᴋ oᴋarpoᴋ, utertuksauvotit uvamnut; maᴋojungnartulinitillo pêjaromagungne kênama sânganit, pêrniangilagit;

² Soᴋoserungnangitomiglo angermariktuksauvotit: Sorlo Nâlagaᴋ inôngmat, mikseᴋârnerme, erᴋartuinermelo, idluarnermelo; inôᴋatigêksuit tagva saimartitaujutigijomârpât, nertornautigijomârlâllo.

³ Nâlagak imâk oᴋarmat angutinut Judamêtunut Jerusalemêtunullo: Nunase poagijartaumangitoᴋ poagijarsiuk, karngasoiniaraselo okpigait kakilautilit akornganut.

⁴ Kipisileritse ilipsingnik Nâlakamut, ômatipselo kipimanginingit pêjarsigik, anguteojose Judame, inôjoselo Jerusaleme; ᴋaningaumajârnera aniᴋonago ikomatut, ikoâlaᴋonagolo ᴋamitaujungnangitomik kimullônêt piniarnipse idluitoᴋsôningat pivlugo.

⁵ Oᴋâlagitse Judame, nipliadlaritselo Jerusaleme, oᴋarluse: Tiptulausijaritse nuname; ᴋuggudlaritse oᴋarluse: Katimaleritse, itilertalo iglugasaksoarnut avaluliorsimajunut.

⁶ Nalunaikusêgitse katimaᴋojijutiksamik Zionemut, unneᴋsioritse muludlaraselo, avangat tikititsijomagama kapianadlartomik asserornartoᴋsoarniglo.

⁷ Loeve anisimangmat sittiminit, asserorsaijoᴋ inôᴋatigêᴋsoarnik; ingerarpoᴋ, anisimavoᴋ inniminit; nunat sunairutitsomavlugo, iglugasaksoaᴋotitit nungutsomavlugit inuêrutijomavlugit.

⁸ Tamanna pivlugo pôᴋsajanik attisileritse, ogguaritse ᴋeadlarluselo; Nâlakab ᴋaningaumajârninga ilungertortoᴋ sangusimangimat uvaptingnit.

⁹ Pijoᴋalârporlo naliutome tâpsomane, Nâlagaᴋ oᴋarpoᴋ, ataniub ômatinga, aulatsijullo ômatingit mungolârmatta; ajoᴋertuijullo kakkilâdlaromârput, nalautaijullo ᴋoaᴋsâromârput.

¹⁰ Oᴋarpungale: Atso, Nâlagaᴋ Gude: Nalautsinerᴋâ inôᴋatigêksuit tamakkoa Jerusalemiullo uivêridlarlaurangne, oᴋarlutit: Ulapirᴋsauteᴋaromârposê? Sunaubvale saviksoaᴋ kibligutitilugo tarnemut.

¹¹ Naliutome tâpsomane inugasaᴋsuit ukkua Jerusalemiullo oᴋautijaujomârput: Anore ônartoᴋ tikilârpoᴋ ᴋaᴋᴋanit merᴋuᴋangitunit sunaᴋajuitomêtunit inuᴋotima paninga torârlugo, sannêjainermu-ungitoᴋ ivsornaititsinermu-ungitorlônêt;

¹² Aᴋᴋunaᴋsoarle tikilârpoᴋ taipkonangat pivlunga; mânalo erᴋartuinikka tâpkoninga oᴋautigijomavakka.

¹³ Ahâk, tikilârpoᴋ nuvujatitut, ᴋamutingillo aksaloalît ullalujaᴋtut; horsingillo sukkalinersauvut naktoralingnit. Kapianarmêk uvagut, asserortaugapta.

¹⁴ Omatit ubvaruk idluinermit, Jerusalem, piulijaujungnarᴋovlutit. ᴋanoᴋ sivitutigijomik issumavêt idluitut angerarviginiarᴋâtît?

¹⁵ Nippeᴋarmat ᴋuggudlartomik Danemit, okâladlartomiglo idluitomik Efraimib ᴋaᴋᴋanginit;

¹⁶ Inôᴋatigêksuit unipkautisigik; oᴋâladlaritse Jerusalemut, kamajut maungalermatta nunamit ungasiktomit nippitik tusartautitsomavlugit Judab iglugasaksoanginut.

¹⁷ Avatâgut ilumavât, sorlo udjertortut perorsêvingmik; ᴋepêservigingmanga, Nâlagaᴋ oᴋarpoᴋ.

¹⁸ Iluserijatit piniarnitillo tikititsivut tamakkoninga ilingnut; tagga idluitulinerijatit; piungitoᴋsôdlarmatta, ômatingnut ilingangmatta.

¹⁹ Ergavikka, ergavikka! Omatiga âniadlarpoᴋ; ômatiga auladlarpoᴋ ilumne; inilangajungnangilanga, tusarsimagavit, tarnîk, tiptulautib nippinganik, unatarnerub kamasârininganik.

²⁰ Asseroijut ᴋaigarsudlarput asseroijunut assimingnut; nuna ilûnât asserortaungmat; suilamnit tupikka asserortauvut, ᴋalerᴋakka ijib sikungilarningane.

²¹ Kanoᴋ akunertigijomik nalunaikutak katimaᴋojijût takonârniarpigô, tiptulautiblo nippinga tusarlugô?

²² Inuᴋotikka silaidlarmatta, ilitaringilânga; ᴋitorngauvut sujuksimajut, silatuneᴋangilallo mikijomiglônêt; silatudlarput idluitulinermik, idluartulinermigle ilisimaneᴋangilat.

²³ Nuna ulernaigilauᴋpara, sunaubvalo ilênarsimajoᴋ sunataᴋaranalo; ᴋilaillo, tâpkoalo ᴋaumajoᴋangilat.

²⁴ Kaᴋᴋat ulernaigilauᴋpakka, sunaubvalo sajudlarput, ᴋaᴋᴋârulaillo ilûnatik aulajâdlarput.

²⁵ Ulernairsilauᴋpunga, sunaubvalo inuᴋangilaᴋ atautsemiglônêt, tingmiallo, ᴋilaub atânêtut, ᴋemâsimavut.

²⁶ Ulernairsilauᴋpunga, sunaubvalo Karmel sunaᴋajuitôvoᴋ, iglugasaksoangillo oggotitaumavut Nâlakab sângane, ningaumajârningatalo ilungertudlartub sângane.

²⁷ Imâk Nâlagaᴋ oᴋarmat: Nuna ilûnât asserortaujomârpoᴋ, nungumariklugole pijomangilanga.

²⁸ Tamannale pivlugo nuna kiksaromârpoᴋ, ᴋilaillo takpâne ᴋernersijomârput; oᴋautigisimagapko, kajusijûtigigapko, ᴋaᴋialilungilangalo uteromanangalônêt tamattomangat.

²⁹ Iglugasaksoarmiut ilûnatik ᴋemâvut horselijartut pitiksilijartullo pervalungningat pivlugo; napârtut akulaininginut pullavut, majorarlutiglo ᴋairtunut; iglugasaksuit ilûnatik ᴋemaktaumavut, inuglo atauserlônêt inniᴋangilaᴋ tagvane.

³⁰ Igvillo, asserortaumaguvit, sumik piniaromârᴋêt? Annorâraloaruvit ilingnik aupaluktamik, pinnarnarsautilijaraloaruvit goldeojunik, ijîkik mingoaraloarungne angijôjârtilugik, sulingitomik ânanausitinajarpotit ilingnik; assiniaᴋatigijomajavît naggogivâtit, pinasuarput inôsernik.

³¹ Nippimik tusarsimagama sorlo ernisuktûb nippinganik, sorlo ernisuᴋârtûb kapiasungninganik, Zionib paningata nippinganik, anerterikaluktûb, aggangminiglo issivitsijûb, oᴋartûblo: Kapianarmêk uvanga! Tarniga nukingêrutivoᴋ inuartut pivlugit.