Jeremia 39 - Labrador Inuttitut Heritage Bible

¹ Pijoᴋarporlo Jerusalem tigujaungmat, (Zedekiab Judab ataningata jâringita 9ingita taᴋᴋingita 10ingane, Nebukadnezar Babilonib ataninga tâpsomalo sorᴋsuktoᴋatigêksoangit ilûnatik Jerusalemut tikilauᴋput ilumalugolo;

² Zedekiab jâringita 11ingita taᴋᴋingita sittamangane, taᴋᴋiub uvlungita 9ingane, iglugasaksuit itârviksatârtauvut)

³ Babilonib ataningata angajoᴋâᴋsoangit ilûnatik tikingmatta, ingilutiglo itertarvingme ᴋeterdlerme, tagva Nergal-Sarêzer, Samgar-Nebo, Sarsekim, pimaklertit angajoᴋângat, Nergal-Sarêzer, ilisimajut angajoᴋângat, Babiloniblo ataningata angajoᴋâᴋsoangit makkoa assingit ilûnatik.

⁴ Pijoᴋarporlo, Zedekiab Judab ataningata sorᴋsuktoᴋatigêksoangitalo ilûnatik takungmagit, ᴋemâvut, unnuarmelo anivut iglugasaksoarnit, ataniub perorsêvingata apᴋutâgut, itertarvikut ᴋarmaᴋsoâk tapitarêk akorngangnêtokut, anivullo naᴋsarsûb apᴋotinganut.

⁵ Kaldêamiulle sorᴋsuktoᴋatigêksoangita udlapait, Zedekialo anguvât Jerikub naternangine; tigugamitsuglo Nebukadnezaremut Babilonib ataninganut âpât, Riblamut Hâmatib nunangane, tâpsomalo erᴋartorpâ.

⁶ Babiloniblo ataningata Zedekiab erningit toᴋopait tâpsoma ijîkita sângangne Riblame, Babiloniblo ataningata angajoᴋât Judamêtut ilûnaita toᴋopait.

⁷ Pêjarpâglo Zedekiab ijîgik, ᴋelaksorpâlo ᴋelaumgujanut Babilonemut âtsomavlugo.

⁸ Ataniublo iglunga inuillo iglungit Kaldêamiut ikipait ikomamut, Jerusalemiblo avaloᴋsoangit serᴋomipait.

⁹ Nebuzaradaniblo, ataniub udjertortingita angajoᴋângata inuit iglugasaksoanêtualauᴋtut amiakungit aularutivait Babilonemut, ᴋemâmalauᴋtullo tâpsomunga, inuillo amiakôjut simnikungit.

¹⁰ Nebuzaradanible, ataniub udjertortingita angajoᴋângata inuit aklujungita ilangit, sunaᴋangitut, ᴋemakpait Judab nunangane, tunitjivigiᴋasiutilugillotauᴋ vaineliksatalingnik perorsêvingniglo.

¹¹ Nebukadnezariblo, Babilonib ataningata Nebuzaradan, ataniub udjertortingita angajoᴋânga perᴋolauᴋpâ Jeremia pivlugo, oᴋarlune:

¹² Tiguguk, pairitsiarlugolo, pikaluktaililugolo; piniarvigiugle sorlo tâpsoma oᴋautiniarmatit.

¹³ Taimaimat Nebuzaradan, ataniub udjertortingita angajoᴋângat, tiliklilauᴋpoᴋ, Nubusasbânalo, pimaklertit angajoᴋângat, Nergal-Sarêzerelo, ilisimajut angajoᴋângat, Babiloniblo ataningita aulatsijingit anginerojut ilûnatik,

¹⁴ Tiliklerput, Jeremialo tigulât udjertortut iglunganit, pitilugolo Gedaliamut, Ahikamib, Sâfanab erningata erninganut, tâmna angerautjiᴋovlugo tâpsominga; taimaglo inuit aᴋornganêpoᴋ.

¹⁵ Nâlakable oᴋausinga tikilauᴋpoᴋ Jeremiamut, parngnanairtaumatilugo udjertortut iglungane, oᴋarlune:

¹⁶ Oᴋariartorit Ebed-mêlekemut Etiopiamiomut, oᴋarlutit: Ahâk, oᴋausikka nalautsititsomavakka iglugasaksoarnut ukkununga idluiᴋutiksamut idluarᴋutiksamu-ungitorlo; sulilârpullo sângne uvlorme tâpsomane.

¹⁷ Piulijomavagille uvlorme tâpsomane, oᴋarpoᴋ Nâlagaᴋ; angutiublo erᴋsigijavit agganginut tunijaujomângilatit.

¹⁸ Anigoititsomârapkit, toᴋotaujomângilatillo saviksoarmut, inôsille aᴋsârnigaujotut pigilârpat; tatigilauramga, oᴋarpoᴋ Nâlagaᴋ.