Jeremia 38 - Labrador Inuttitut Heritage Bible

¹ Sefatialo, Mattanib erninga, Gedalialo, Passurib erninga, Jukalelo, Selemiab erninga, Passurelo, Malkiab erninga, tusarput oᴋautsinik Jeremiab oᴋauserijanginik inungnut tamainut, oᴋarmat:

² Imâk oᴋarpoᴋ Nâlagaᴋ: Iglugasaksoane ukkunane paijoᴋ toᴋojuksauvoᴋ saviksoarmut, kângnartoᴋsoarmullo, nusilingnartomullo; Kaldêamiunulle ᴋemâjoᴋ inôlârpoᴋ, inôsinalo aᴋsârnigaujotut pigilârpâ, inôlârporlo.

³ Imâk oᴋarpoᴋ Nâlagaᴋ: Iglugasaksuit makkoa tunijaudlalârput Babilonib ataningata sorᴋsuktoᴋatigêksoangita agganginut, tâpsomalo tigujomârpait.

⁴ Tagva angajoᴋâᴋsuit oᴋarput atanermut: Angut una toᴋotauᴋoleruktôᴋ; sorᴋsuktuksat iglugasaksoane ukkunane amiakôjut aggangit, inuillo ilûnatik aggangit, nukingêrutingmagit, oᴋauseᴋarvigivlugit taimaitunik; angutib oma inuit idluarᴋutiksarsiulungimagit, idluiᴋutisanigle pingmat.

⁵ Atanerlo Zedekia oᴋarpoᴋ: Ahâk, aggapsingnêpoᴋ; ataneᴋ taimnaungimat piniarungnartoᴋ sumik akkerartorluse.

⁶ Jeremia tiguvât tagva egilugolo Malkiab Hamalekib erningata itersaliarimajanganut, udjertortut iglunganêtomut; Jeremialo ningitipât aklunânut. Itersaliarlo imeᴋangilaᴋ, aᴋilupiamigle; Jeremialo kivivoᴋ aᴋilupiamut.

⁷ Ebed-melekele, Etiopiamioᴋ, pimaklertoᴋ ataniub iglungane, tusarame Jeremia pitisimangmago itersaliarmut, ataneᴋ iksivatilugo Benjamib itertarvingane;

⁸ Ebed-melek anivoᴋ ataniub iglunganit, atanerlo oᴋarvigivâ, oᴋarlune:

⁹ Nâlagara ataniojotit, angutit ukkua idluitulivut tamaine piniarningine Jeremiamut nalautaijomut, ningititamingnut itersaliarmut; toᴋojungnarpoᴋ inime najortamine, kângnartoᴋsoaᴋ pitjutigilugo; nerᴋiksaᴋarungnairmat iglugasaksoarne.

¹⁰ Ataniublo Ebed-meleke perᴋovâ, oᴋarlune: Tamângat angutit 30it ilagikit, Jeremialo nalautaijoᴋ ᴋaᴋisiuk itersaliarmit, toᴋoᴋonago.

¹¹ Taimaimat Ebed-melekib angutit ilagivait, iterlunalo ataniub iglunganut, ivlernartunik perᴋutetaliub atânut, tagvangallo tigusivoᴋ annorâvinernik ipperᴋaᴋunik aliktornilukkuniglo, aklunâtigullo ningitipait itersaliarmut Jeremiamut.

¹² Ebed-melekiblo Jeremia oᴋautivâ: Makkoa annorâvinît ipperᴋaᴋut aliktornilukkullo unnernut ilikit aklunât atânut. Jeremialo taimailiorpoᴋ.

¹³ Taimaglo Jeremia amuarpât aklunânut, ᴋaᴋitipâllo itersaliarmit Jeremialo udjertortut iglunganêtuarpoᴋ.

¹⁴ Atanerlo Zedekia tiliklerpoᴋ, Jeremialo pititsartorpâ ingminut Nâlakab iglungata itertarviata pingajuanut; ataniublo Jeremia oᴋautivâ: Atautsemik aperijomavagit; angigutiniarnanga sumik.

¹⁵ Jeremiablo Zedekia oᴋautivâ: Nalonaijarupko ilingnut toᴋotaksangortiniangilarmâ? Atanertorupkillo, nâlangniangilarma.

¹⁶ Taimaimat ataniub Zedekiab angigutjivlune Jeremia angervigivâ, oᴋarlune: Sorlo Nâlagaᴋ tarneᴋartitsijoᴋ ukkuninga ômarmat, toᴋotsomangilagit, tunijomangilagillônêt inôsernik pinasuartut makkoa agganginut.

¹⁷ Jeremiablo Zedekia oᴋautivâ: Imâk oᴋarpoᴋ Nâlagaᴋ, Gude Zebaot, Israêlib Gudinga: Anijomaguvit Babilonib ataningata angajoᴋâᴋsoanginut, tagva tarnît inôjuksauvoᴋ, iglugasaksuillo makkoa ikomamut ikitaululângilat; igvillo inôjuksauvotit ᴋitorngatillo.

¹⁸ Anijomangikuville Babilonib ataningata angajoᴋâᴋsoanginut, iglugasaksuit makkoa tunijaulârput Kaldeamiut agganginut, tâpkoalo ikilârpait ikomamut, igvillo ᴋemâniangilatit agganginit.

¹⁹ Ataniublo Zedekiab Jeremia oᴋautivâ: Judit ᴋemâmajut Kaldêamiunut ilimagivakka pitilârmanga agganginut mitautigilungalo.

²⁰ Jeremiale oᴋarpoᴋ: Pitilulângilâtit. Nâlalauruktôᴋ Nâlakab nippinga, makkonane oᴋautigijamne ilingnut; idluarᴋutigilârangne, tarnîllo inôjomârpoᴋ.

²¹ Anijomangikuville, tagva tamannauvoᴋ oᴋauseᴋ Nâlakab oᴋauserijanga uvamnut:

²² Ahâk, arnat ilûnatik Judab ataningata iglungane amiakôjut anititaujomârput Babilonib ataningata angajoᴋâᴋsoanginut, arnallo tâpkoa oᴋaromârput: Manigortigilauᴋtavit terliarpâtit, aᴋtorsartipâtillo; itikatit mausimavut aᴋilupiarmut, tunusimavut.

²³ Nuliatit tamaita ᴋitorngatillo anititsomârpait Kaldêamiunut; annagomângilatit, agganginit tigujaulârpotille Babilonib ataningata agganginut; iglugasaksuillo ikitautitsomârpait ikomamut.

²⁴ Zedekiablo Jeremia oᴋautivâ: Kaujimajoᴋarniarane oᴋautsinik makkoninga, tagva toᴋojuksaungilatit.

²⁵ Angajoᴋâᴋsuille tusarpatta oᴋaᴋatigilaurapkit, tikipatillo oᴋautilutillo: Nalonaijaivigitigut mâna oᴋauserilauᴋtarnik atanermut; angigutiniaratigut, toᴋotsomangilaptigit tagva; sumiglônêt ataneᴋ oᴋaraloarpat ilingnut;

²⁶ Tagva akkijomârpatit: Ataneᴋ ᴋenuvigilauᴋpara utertitsiᴋonago uvamnik Jonatab iglunganut, tagvane toᴋoᴋonanga.

²⁷ Angajoᴋâᴋsuillo ilûnatik tikiput Jeremiamut, aperilugolo; tâpsomalo taimak oᴋautivait sorlo ataniub perᴋolaungmago. Taimaimallo oᴋaᴋatigijungnairpât, oᴋautaujut nalonaijartaulungimatta.

²⁸ Jeremialo udjertortut iglunganêtuarpoᴋ Jerusalemib tigujauvia tikidlugo.