Jeremia 37 - Labrador Inuttitut Heritage Bible

¹ Zedekialo, Josiab erninga, ataningolerpoᴋ, Konia, Jojakimib erninga inangerlugo, Nebukadnezarib, Babilonib ataningata, ataningortitanga nuname Judame.

² Tâpsomalônêlle kivgangitalônêt nunab inungitalônêt Nâlakab oᴋausingit nâlangilait, oᴋautigijangit nalautaijokut Jeremiakut.

³ Zedekiablo ataniojub Jehukal, Selemiab erninga, Zefanialo, Masîab erninga, ajoᴋertuijok, tilivak nalautaijomut Jeremiamut, oᴋarᴋolugiglo: Tuksiutisârlauᴋtiguttôᴋ Nâlakamut Gudiptingnut.

⁴ Jeremiale iterᴋattarpoᴋ aniᴋattarlunalo inuit akorngane; parngnanairsimavingmut pitisimangimatsuk.

⁵ Faraublo sorᴋsuktoᴋatigêksoangit majorarsimalauᴋput Egiptenemit; Kaldêamiullo Jerusalemib illumajingit tusarmatta tâpkoninga, aularput Jerusalemit.

⁶ Nâlakablo oᴋausinga tikipoᴋ nalautaijomut Jeremiamut, oᴋarlune:

⁷ Imâk oᴋarpoᴋ Nâlagaᴋ, Israêlib Gudinga: Imâk oᴋautitikko Judab ataninga tiliklertoᴋ iliptingnik uvamnut aperijauᴋovlunga: Ahâk, Faraub sorᴋsuktoᴋatigêksoangit anisimajut ikajoromavluse utertuksauvut nunamingnut Egiptenemut.

⁸ Kaldêamiullo tikitsomârivut, iglugasaksuillo makkoa unatarlugit; tigujomârpaillo ikilugillo ikomamut.

⁹ Imâk oᴋarpoᴋ Nâlagaᴋ: Uivêriniarase ilipsingnik, oᴋarluse: Kaldêamiut aulalârpalukput uvaptingnit; aularnialungimatta.

¹⁰ Annaulersimagaloarupsigik Kaldêamiut sorᴋsuktoᴋatigêksoangit sorᴋsukvigijise ilûnaita, ikkelingnik kissianik amiakoᴋartilugit, sulle tâpkoa ilûnatik makitajârput atunit tupermine, iglugasaksuillo makkoa ikilugit ikomamut.

¹¹ Pijoᴋarporlo Kaldêamiut sorᴋsuktoᴋatigêksoangit aularmatta Jerusalemit Faraub sorᴋsuktoᴋatigêksoangit erᴋsiginamigit,

¹² Jeremia anivoᴋ Jerusalemit Benjamib nunanganut aijomavlune, tagvane inuit akorngane pijaksaminik tigusijomavlune.

¹³ Benjamiblo itertarvianêtilugo, udjertortut angajoᴋângat tagvanêpoᴋ, Iriamik attelik, Selemiab, Hananiab erningata erninga; tâpsomalo nalautaijoᴋ Jeremia tiguvâ, oᴋarlune: Kaldêamiunut ajujiangovotit.

¹⁴ Jeremiale oᴋarpoᴋ: Nalautsilungilaᴋ; Kaldêamiunut ajujiangolungilanga; tâpsomale tusaromangilâ; taimaimallo Iriab Jeremia tiguvâ tikiutilugolo angajoᴋâᴋsoarnut.

¹⁵ Angajoᴋâᴋsuille ningadlalerput Jeremiamut, annaulerlugolo, parngnanairsorlâlo Jônatab aglakpaktub iglunganut; tâmna parngnanairsimavingortisimangmatsuk.

¹⁶ Jeremialo tikisimangmat iglomut itersâlungmêtomut, parngnanairsimavingnullo ingmigolingajunut, uvlullo unuktut nâvlugit tagvanêᴋârdlune;

¹⁷ Ataniub Zedekiab tiliklerlune aijautipâ; ataniublo angigutjivlune iglomine aperivâ, oᴋarlune: Nâlakamit pijomik oᴋauseᴋarᴋâ? Jeremialo oᴋarpoᴋ: Pitaᴋarpoᴋ. Oᴋarporlotauᴋ: Igvit tunijaulârpotit Babilonib ataningata agganginut.

¹⁸ Sullelo Jeremia oᴋarivoᴋ atanermut Zedekiamut: Sumik igvillônêt kivgatillônêt inuillônêt ukkua idluitulivigisimavapsê pitinapsinga parngnanairsimavingmût?

¹⁹ Nanêᴋât mâna nalautaijose nalautaivigilauᴋtise, oᴋarlutik: Babilonib ataninga ilirsingnut nunamullônêt omunga majorarniangilâᴋ?

²⁰ Mânalo nâlalaungatoᴋ, nâlagara ataniojotit, ᴋenunera nâmagijaulauletôᴋ sângne; utertitsiᴋonak uvamnik Jônatab aglakpaktub iglunganut, toᴋoᴋonanga tagvane.

²¹ Zedekialo ataniojoᴋ perᴋojivoᴋ tagva, Jeremialo pititauvoᴋ udjertortut iglunganut, ᴋaut tamâllo tunitjivigivât niaᴋôjamik atautsemik niaᴋôjaliorvingmit, niaᴋôjat ilûnatik iglugasaksoarnêtut nungutauᴋârtinagit. Jeremialo udjertortut iglunganêtuarpoᴋ.