Jeremia 36 - Labrador Inuttitut Heritage Bible

¹ Pijoᴋarporlo Jojakimib Josiab erningata Judab ataningata jâringita sittamangane oᴋauseᴋ manna tikingmat Jeremiamut Nâlakamit, oᴋarlune:

² Aglagviksamik immûmajomik tigusilerit aglaklutillo tagvunga oᴋautsinik tamainik oᴋauserilauᴋtamnik ilingnut Israêle pivlugo, Judalo pivlugo, inôᴋatigêksuillo tamaita pivlugit, uvlormit taimangat oᴋatainarnimnit ilingnut, Josiab uvlunginit uvlomemut tikidlugo.

³ Imaᴋa Judab kinguvângit tusarajarput idluitunik tamainik kajusijutigijamnik piniaromavlugit tâpkonunga; sâgiarajarmattalo ilûnatik atunit apᴋotigijamingnit idluitomit; issumagijungnaivigivlugit ajorninginit idluitulininginillo pijungnarᴋovlunga.

⁴ Tagva Jeremiab Bâruk Nerîab erninga ᴋaiᴋovâ; Bârukiblo aglakpait aglaviksamut ᴋissingmut immûmajomut Jeremiab ᴋaninganit Nâlakab oᴋausingit tamaita, oᴋauserilauᴋtangit tâpsomunga.

⁵ Jeremiablo Bâruk perᴋovâ, oᴋarlune: Parngnanairsortauvunga, aijungnangilangalo Nâlakab iglunganut;

⁶ Igville tagvungarit, Nâlakablo oᴋausingit immûmajome aglalauᴋtatit ᴋanimnit atuakit Nâlakab iglungane inuit ilûnatik tusâtilugit uvlorme nerritailivingme, atuaraksarivatittauᴋ Judab iglugasaksoanginit anijut ilûnatik tusâtilugit.

⁷ Imaka manijijomalârput ᴋenunermingnik Nâlakamut, sâgiaromalârlutiglo ilûnatik atunit apᴋotigijamingnit idluitomit; ningarneᴋ ᴋaningajârnerlo angijôngmat Nâlakab oᴋautigijanga inuit tâpkoa pivlugit.

⁸ Bârukelo Nerîab erninga piniarpoᴋ tamainik piniarᴋojaunine Jeremiamut nalautaijomut maliklugo, Nâlakab oᴋausingit aglangnêtut atuarlugit Nâlakab iglungane.

⁹ Pijokarporlo Jojakimib, Josiab erningata, Judab ataningata jâringita tallimangane, taᴋᴋingita 9ingane, Jerusalemiut ilûnatik, inuillo ilûnatik Judab iglugasaksoanginit Jerusalemut tikisimajut nerritailiviksaᴋarᴋojingmatta Nâlakab sângane.

¹⁰ Bârukiblo Jeremiab oᴋausingit aglangnêtut atuarpait Nâlakab iglungane, Gemarîab, Sâfanib erningata aglakpaktub iningane, avaluliorsimajome ilulerme, Nâlakab iglunganut iterviub nutâb pângane, inuit ilûnatik tusâtilugit.

¹¹ Mikaiale, Gemarîab erninga, Sâfanib erngutanga, tusarmat aglangnit Nâlakab oᴋausinginik tamainik,

¹² Attersârpoᴋ ataniub iglunganut, aglakpaktub ininganut, ahâglo, iksivavut tagvane angajoᴋâᴋsuit ilûnatik, tagva Elîsama, aglakpaktoᴋ, Delaialo, Semaiab erninga, Elnatanalo, Akborib erninga, Gemarîalo, Sâfanib erninga, Zedekialo, Hananîab erninga, angajoᴋâᴋsuillo ilûnatik.

¹³ Mikaiablo unipkautivait oᴋautsinik tamainik tusartaminik, Bârukib aglait atuarmagit inuit ilûnatik tusâtilugit.

¹⁴ Taimaimallo angajoᴋâᴋsuit ilûnatik Jehudi Netaniab erninga, Selemiab erngutanga, Kusib erngutadjusânga tilivait Bârungmut, oᴋautjauᴋolugo: Aglait immûmajut atuarsivigijatit inuit tusâtilugit tigukit aggangnut maungarlutillo. Bârukiblo aglait immûmajut tiguvait aggangminut ailunalo tâpkonunga.

¹⁵ Tâpkoalo oᴋautivât: Ingilaurit atuarlugillo tusâtiluta. Bârukiblo atuarpait tusâtilugit.

¹⁶ Pijoᴋarporlo, oᴋautsit tamaita tusarêramigit, ᴋoaᴋsângalutik sângautivut, Bârungmullo oᴋarput: Oᴋautsit tamakkoa tamaita oᴋautigijariaᴋarniarpavut atanermut.

¹⁷ Aperivâllo Bâruk, oᴋarlutik: Oᴋautilauᴋtigut, ᴋanoᴋ ilivlutit oᴋautsit tâpkoa tamaita tâpsoma ᴋaninganit aglakpigît?

¹⁸ Bârukiblo kiovait: Oᴋautsit tâpkoa tamaita oᴋautigilauᴋpait uvamnut kanerminut, uvangalo aglalauᴋpakka aglagvingmut ᴋernerumut.

¹⁹ Angajoᴋâᴋsuillo tagva Bâruk oᴋautivât: Ijeriartoritik, igvit Jeremialo; ᴋaujimajoᴋarniaranalo nanêniptingnik.

²⁰ Tâpkoale iteriartorput atanermut iglorusermut, aglaille immûmajut torᴋorsimalauᴋpait Elîsamab aglakpaktub ininganut; oᴋautsillo ilûnaita oᴋautigivait ataneᴋ tusatilugo.

²¹ Ataniublo Jehuda tilivâ aiklerᴋovlugo aglangnik immûmajunik; tâpsomalo tiguvait Elîsamab aglakpaktub ininganit. Jehudiblo atuarpait ataneᴋ tusâtilugo, angajoᴋâᴋsuillo ataniub saniane nangertut tusâtilugit.

²² Atanerle iksivavoᴋ iglome okêvingme taᴋᴋit 9ingane; ikomaᴋarporlo kiaksautime ataniub sivorâne.

²³ Pijoᴋarporlo, Jehudib ingmigolingajut pingasut sittamallônêt atuarêramigit, ataniub aglait sêkpait saviarsungmut, egilugillo ikomamut kiaksautemêtomut, immûmajoᴋ ilûnane nungutauᴋârtinago ikomamut kiaksautemêtomut.

²⁴ Sivôralungilallo, annorâtiglônêt aliktungilait, atanerublônêt kivgamelônêt tusâlauᴋtut.

²⁵ Elnatanible Delaiablo Gemarîablo ataneᴋ ᴋenuvigisimalauᴋpât ikitsiᴋonago immûmajomik, tâpsomale tusaromangilait.

²⁶ Ataniuble Jeramêele, Hamalekib erninga, Seraialo, Asriêlib erninga, Selemîalo, Abdiêlib erninga, tigusiᴋolauᴋpait Bârungmik aglakpaktomik Jeremiamiglo nalautaijomik; Nâlakable ijersimalauᴋpak.

²⁷ Nâlakablo oᴋausinga tikipoᴋ Jeremiamut, atanek ikitsilauᴋârdlune immûmajomik, oᴋautsiniglo Bârukib aglalauᴋtanginik Jeremiab ᴋaninganit, oᴋarlune:

²⁸ Tigusilaungmit immûmajomik tâpsoma assianik aglagvigilugillo oᴋautsinik sivorlititut itunik immûmajomêlauᴋtunik sivorlerme, Jojakimib Judab ataningata ikitaviningine.

²⁹ Jojakimelo Judab ataninga pivlugo oᴋartuksauvotit: Imâk oᴋarpoᴋ Nâlagaᴋ: Immûmajoᴋ tâmna ikilauraloarpat, oᴋarlutit, Sôk aglalaukêt tagvunga, oᴋarlutit: Babilonib ataninga tikidlaromârpoᴋ nunalo tamanna asserorlugo, inuᴋarungnaitilugo nergjuteᴋarungnaitilugolo?

³⁰ Tamanna pivlugo imâk oᴋarpoᴋ Nâlagaᴋ Jojakim, Judab ataninga pivlugo: Dâvidib iksivautaᴋsoangane iksivajuksaᴋaromângilaᴋ; timingalo toᴋungajoᴋ egitaujomârpoᴋ uvlôtilugo kiangmut, unnuarmelo itjemut.

³¹ Tâmnalo kinguvângillo kivgangillo sugiaromavakka idluituliningit pivlugit, tikiutjijomavungalo tâpkonunga, Jerusalemiunullo, Judablo inunginut, idluitunik tamainik oᴋautigilauᴋtamnik tâpkonunga, tusaromatinagit.

³² Jeremialo immûmajub assianik tigusivoᴋ, tunilugolo Bârungmut, Neriab erninganut, aglakpaktomut; Tâpsomalo aglagvigivait Jeremiab ᴋaninganit aglait oᴋausertanginik tamainik, Jojakimib, Judab ataningata ikitavininginik ikomamut; oᴋautsiniglo taimaitunik unuktunik taipkoa assinginik illavait.