Jeremia 35 - Labrador Inuttitut Heritage Bible

¹ Oᴋausek Jeremiamut tikitoᴋ Nâlakamit, Jojakimib Josiab erningata Judab ataningata uvlungine, oᴋartoᴋ:

² Ailerit Rîkabekut iglunganut, oᴋarvigikillo, ᴋaikillo Nâlakab iglunganut, iglorusingita ilanganut, vainetortikillo.

³ Ilagivakka tagva Jâsania, Jeremiab erninga Habasiniab erngutanga, ᴋatangutingillo, erningillo ilûnaita, Rîkabekullo ilûnaita;

⁴ Tikiutipakkalo Nâlakab iglunganut, Hânanib, Gudib inuᴋotingata, erningita, Igdâliab erngutangita ininganut, angajoᴋâᴋsuit inigijangata sanianêtomut, Massîab Sâllumib erningata, upkoamik udjertortûb, iningata ᴋolânêtomut;

⁵ Rîkabekullo erningita sânginut ilijivunga pôgutanik vainetalingnik, ᴋajûjaniglo, oᴋautivakkalo: Vainetoritse.

⁶ Oᴋarpulle: Vainetoromangilagut; Jônadab Rîkabib erningata atâtapta perᴋongmatigut, oᴋarlune: Vainetortuksaungilase, ilipselônêt erniselônêt issoᴋangitomut;

⁷ Igloliortuksaungilaselônêt, karngasûtinik karngasoijuksaungilaselônêt, vaineliksatalingniglônêt perorsêviliortuksaungilase piginagillônêt; uvlusele nâvlugit tupermiojuksauvose; akunertomik inôniarᴋovluse nuname arvertarvigijapsingne.

⁸ Jônadablo Rîkabib erningata atâtapta nippinga nâlainarpavut tamaine perᴋojangine uvaptingnik, uvluvut nâvlugit vainetorata, uvagut, aipavullônêt, ernivullônêt, panivullônêt;

⁹ Iglolioratalônêt inigijomavlugit; vainelîksataᴋangilagullônêt, perorsêviᴋaratalo, karngasûtiksaᴋaratalônêt:

¹⁰ Tupermiongotsainarpogulle, nâlaklutalo, piniarlutalo tamainik Jônadab atâtapta perᴋojangit maliklugit.

¹¹ Kissianele Nebukadnezar Babilonib ataninga majoarmat nunamut, oᴋalauᴋpogut: Attê, ᴋemâlerta Jerusalemut Kaldêamiut sorᴋsuktoᴋatigêksoanginit, Siriamiullo sorksuktoᴋatigêksoanginit; taimaglo Jerusalemionialerpogut.

¹² Nâlakablo oᴋausinga tikipoᴋ tagva Jeremiamut, oᴋarlune:

¹³ Imâk oᴋarpoᴋ Nâlagaᴋ Zebaot, Israêlib Gudinga: Ailerit, Judablo inungit Jerusalemiullo oᴋautikit, Ajoᴋertutsinik ilalioromangilasê oᴋausikka nâlagomavlugît? oᴋarpoᴋ Nâlagaᴋ.

¹⁴ Jônadab Rîkabib erningata oᴋausingit perᴋojijutigilauᴋtangit ernerminik vainetorᴋonagit nâlaktauvut, uvlomelo tikidlugo vainetulungilat, nâlagamik atâtamik perᴋojanganik; uvangale oᴋarvigivapse, makisaraivlunga oᴋarlungalo; nâlalungilapsingale.

¹⁵ Kivgakkalo nalautaijut ilûnatik tiligivakka ilipsingnut, makisaraivlunga tililugillo, oᴋarᴋovlugit: Sâgiaritsetoᴋ ilûnase atunit apᴋotigijapsingnit idluitunit piniarniselo âᴋiksorsigiᴋ Gudiblo assingit malingniarasigik kivgartoromavlugit, tagva nunaᴋaromârpose nuname tunijamne ilipsingnut atâtapsingnullo; siutisele manilungilase, nâlalungilapsingalônêt.

¹⁶ Jônadable, Rîkabib erningata erningit piniarmatta atâtamik perᴋojanganik perᴋojijutigilauᴋtanganik tâpkonunga, inuille ukkua nâlalungimanga;

¹⁷ Taimaimat imâk oᴋarpoᴋ Nâlagaᴋ, Gude Zebaot, Israêlib Gudinga: Ahâk, Judamut Jerusalemiunullo tamainut tikiutjijomavunga idluitunik tamainik oᴋautigijamnik tâpkonunga; oᴋarvigilaurapkit tusalaungimattale; ᴋaigarsugvigilaurapkillo, kiolaungimattale.

¹⁸ Jeremiablo Rîkabib kinguvângit oᴋautivait: Imâk oᴋarpoᴋ Nâlagak Zebaot, Israêlib Gudinga: Jônadab atâtapse perᴋojangit nâlalaurapsigik, inerterusingillo nalautsitilaurapsigik, pinialaurapselo tamainik perᴋojanginik ilipsingnut;

¹⁹ Taimaimat imâk oᴋarpoᴋ Nâlagaᴋ Zebaot, Israêlib Gudinga: Jônadab Rîkabib erninga issoᴋangitomut kingumakleromângilaᴋ angumik sâmne nangertuksamik.