Jeremia 34 - Labrador Inuttitut Heritage Bible

¹ Oᴋauseᴋ Jeremiamut tikitoᴋ Nâlakamit, Nebukadnezarib, Babilonib ataningata, tâpsomalo sorᴋsuktoᴋatigêksoangita ilûnatik, ataniovillo nunaᴋsoarmêtut tâpsoma nâlaktitangita ilûnatik, inôᴋatigêksuillo ilûnatik, Jerusalem tâpsomalo iglugasaksoangit sorᴋsungmagit, oᴋarlune:

² Imâk oᴋarpoᴋ Nâlagaᴋ, Israelib Gudinga; Ailerit, Zedekialo, Judab ataninga, oᴋarvigiuk, oᴋautilugolo: Imâk oᴋarpoᴋ Nâlagaᴋ: Ahâk, iglugasaksuit makkoa tunijomavakka Babilonib ataningata agganginut, tâpsomalo ikititsomârpait ikomamut.

³ Igvillo ᴋemâjuksaujomângilatit agganginit, tigujaujomârpotille pititaujomârlutillo agganginut; ijîkiglo takojomârpuk Babilonib ataningata ijîgingnik, oᴋaᴋatigijomârpâtillo ᴋanermit ᴋanermut, Babilonemullo aijuksaulârpotit.

⁴ Nâlakable oᴋausinga tusaruk, Zedekia, Judab ataninga: imâk oᴋarpoᴋ Nâlagaᴋ igvit pivlutit: Saviksoarmut toᴋojuksaungilatit;

⁵ Ulapirᴋsauteᴋarlutit toᴋojuksauvotit, sorlolo ikoâlatitsilaungmatta atâtagilauᴋtatit, ataniolauᴋtut sivunerne pivlugit, taimak ikoâlatitsijomârivut pivlutit, oggorijomârpâtillo oᴋarlutik: Amêk atanivut! uvanga tamanna oᴋauserigapko, oᴋarpoᴋ Nâlagaᴋ.

⁶ Jeremiablo nalautaijub oᴋautsit tamakkoa tamaita oᴋautigivait Zedekiamut Judab ataninganut Jerusaleme,

⁷ Babilonib ataningata sorᴋsuktoᴋatigêksoangita Jerusalem Judablo iglugasaksoangit amiakôjut, Lâkiselo Asîkalo sorᴋsungmagit; tamakkoa kissimik amiakôlaungmatta Judab iglugasaksoanginit, ungaluliorsimavlutik.

⁸ Okausek Jeremiamut tikitoᴋ Nâlakamit, ataniojub Zedekiab inuit ilûnaita Jerusalemêtut angeᴋatigilauᴋârdlugit kipalûtjâromavlugit.

⁹ Ilûnatik atunit kipalone angut, ilûnatiglo atunit kipalone arnak, angutiogune Ebreeriojoᴋ, arnaugunelônêt Ebreeriojoᴋ, kipalûtjâraksaringmago, kipaluᴋuteᴋartoᴋarungnaiᴋovlugo ᴋatangutiminik Judiojomik;

¹⁰ Angajoᴋâᴋsuillo ilûnatik, inuillo ilûnatik nâlakput, angeᴋatigêksimalauᴋtut ilûnatik atunit kipalone angut, ilûnatiglo atunit kipalone arnak kipalûtjâromavlugit kipaloᴋuteᴋartoᴋarungnaiᴋovlugo; nâlakput kipalojungnaitipaillo;

¹¹ Kingornganele anusingorput utertilugillo kipalut angutit arnallônêt kipalojungnaititavinit, kipalotilerivaillo angutit arnallo;

¹² Taimaimat Nâlakab oᴋausinga tikipoᴋ Jeremiamut Nâlakamit, oᴋarlune:

¹³ Imâk oᴋarpoᴋ Nâlagaᴋ, Israêlib Gudinga: Sivorlise angeᴋatigilauᴋpakka uvlorme tikiutjivigilauᴋtamne tâpkoninga nunamit Egiptenemit, iglomit kipalotitauviojomit, oᴋarlunga:

¹⁴ Jârit 7it nâjarangata ilûnase atunit kipalûtjârijuksauvose ᴋatangutipsingnik Ebreeriojunik, niorvgutigilauᴋtunik ingmingnik ilipsingnut, kivgartorsimajuniglo ilipsingnik jârit 6it nâvlugit, kipalûtjâraksarivase; sivorlipsele nâlalaungilânga, mannijilaungilallônêt siutimingnik.

¹⁵ Ilipsele anusingorsimalauᴋpose mâna, piniarluselo idluarijamnik, ᴋaujititsigapse kipalûtjârinipsingnik inôᴋatipsingnik; sâmnalo angeᴋatigêngneliolauᴋpose iglome attimnut taijaujome;

¹⁶ Sangulauᴋposele, atteralo sujulauᴋpase, utertitsiluselo ilûnase atunit kipalogilauᴋtapsingnik angutinik arnaniglo, kipalûtjâriᴋâlauᴋtapsingnik issumamingnik piᴋovlugit; kipalotilaurivase angutit arnallo kivgartormiᴋovlugit ilipsingnik.

¹⁷ Taimaimat imâk oᴋarpoᴋ Nâlagaᴋ: Nâlaksimanginapsinga ᴋaujititsiluse kipalûtjârinermik ilûnase atunit ᴋatangutiminik, ilûnaselo atunit inôᴋatiminik; ahâk, ᴋaujititsivunga ilipsingnik kipalûtjârinermik saviksoarmut, oᴋarpoᴋ Nâlagaᴋ, nusilingnartomullo, kângnartoᴋsoarmullo; egiorᴋartautitsomârpapselo nunaᴋsûb ataniovingita ilûnatik akorngane.

¹⁸ Tunijomavakkalo angutit angeᴋatigêngnerijamnik tappajut, angeᴋatigêngnerub sâmne angerutigilauᴋtangata oᴋausinginik nalautsititsilungitut, noggaᴋ ᴋoppilugo maggoligamitsuk abvâglo akorngatigut ingerarlutik;

¹⁹ Judab angajoᴋâᴋsoangit, Jerusalemiblo angajoᴋâᴋsoangit, pimaklertillo, ajoᴋertuijullo, nunablo inungit ilûnatik noggaub abvâgik akorngatigut ingerarlauᴋtut;

²⁰ Ila, tunijomavakka ômigijingita agganginut, inôsinginiglo pinasuartut agganginut; timingillo toᴋungajut nerᴋiksaujomârput silab tingmianginut nunablo ômajunginut.

²¹ Zedekialo Judab ataninga angajoᴋâᴋsoangillo tunijomavakka ômigijingita agganginut, inôsinginiglo pinasuartut agganginut, Babiloniblo ataningata sorᴋsuktoᴋatigêksoangita ilipsingnit aularsimajut agganginut.

²² Ahâk, perᴋojijomavunga, oᴋarpoᴋ Nâlagaᴋ, utertitsomavlugillo iglugasaksoarnut ukkununga, sorᴋsukvigijomârpaillo, tigulugillo, ikoâlatitsomârpait ikomamut; Judablo iglugasaksoangit sunairutitsomârpakka, inuᴋarungnaimariklutik.