Jeremia 32 - Labrador Inuttitut Heritage Bible

¹ Okausek Jeremiamut pijoᴋ Nâlakamit, Zedekiab, Judab ataningata jâringita 10ingane, tagva Nebukadnezarib jâringita 18ingane.

² Naliutome tâpsomane Babilonib ataningata sorᴋsuktungita Jerusalem ilumavât; Jeremialo nalautaijoᴋ parngnanairsortaulauᴋpoᴋ Judab ataningata iglungata udjertortungita iglungane.

³ Zedekiab, Judab ataningata, parngnanairsimalaungmago, oᴋarlune: Sôᴋ nalautaivêt, oᴋarlutit: Imâk oᴋarpoᴋ Nâlagaᴋ: Ahâk, iglugasaksuit makkoa tunijomavakka Babilonib ataningata agganginut, tâpsomalo sâlagijomârpait;

⁴ Zedekialo, Judab ataninga, Kaldêamiut agganginit anigorniangilaᴋ, tunijaulârporle Babilonib ataningata agganginut, oᴋaᴋatigijomârpâlo ᴋanermit ᴋanermut, ijîgiglo takojomârpuk tâpsoma ijîgingnik,

⁵ Tâpsomalo Zedekia tassigoalârpâ Babilonemut, tagvanêtuksauvorlo nalipsaiᴋârtinanga tâpsominga, oᴋarpoᴋ Nâlagaᴋ; Kaldêamiut sorᴋsugaloarupsigik suliniatsangilasê?

⁶ Jeremialo oᴋarpoᴋ: Nâlakab oᴋausingata tikilauᴋpânga, oᴋarlune:

⁷ Ahâk, Hanamêlib ᴋatangutiarsuvit, Sâlumib erningata, tikilârpâtit oᴋarlune: Perorsêviga Anatotemêtoᴋ pisiariuk, igvit ilamnit kingormgujijuksaunerpaugavit pisijuksauvlutit.

⁸ Tamanna pivlugo Hanamêlib ᴋatangutiarsuma tikilauᴋpânga udjertortut iglunganêtilunga, Nâlakab oᴋauserijanga maliklugo, oᴋautilungalo: Pisiarilauruktôᴋ perorsêviga Anatotemêtoᴋ Benjamib nunangane; igvit kingormgutijaksarigangne, pijuksaunerpângovotillo pisiarilugo; pisiarilauruk nangminerijomavlugo. Kaujimavunga tagva Nâlakab tamanna oᴋauseringmago.

⁹ Perorsêviglo Anatotemêtoᴋ pisiarilauᴋpara Hanamêlemit ᴋatangutiarsumnit, kênaujallo kiktitaumut ôktorpakka tâpsomunga, tagva sekelinik silberemik 17nik.

¹⁰ Aglaillo nalonaijaijut aglavigilauᴋpakka attimnik nalonaikuserlugillo, kigligiutjijuksallo najûtiᴋovakka, kênaujallo kiktitautingne ôktorpakka.

¹¹ Tiguvakkalo aglait pisiniarnermik nalonaijaijut, nalonaikusersimajut perᴋojaᴋ ilusiojorlo maliklugik, nalonaikusersimangitullotauᴋ;

¹² Aglaillo pisiniarnermik nalonaijaijut tunivakka Bârungmut, Neriab, Masaiab erningata, erninganut, Hanamêle ᴋatangutiarsuga najûtitilugo, kigligiutjijuksallo attermingnik aglalauᴋtut aglangnut pisiniarnermik nalonaijaijunut najûtitilugit, Judit iksivajut udjertortut iglungane ilûnatik sângine.

¹³ Bârukelo kaiblalauᴋpara tâpkoa sângine, oᴋarlunga:

¹⁴ Imâk oᴋarpoᴋ Nâlagaᴋ Zebaot, Israêlib Gudinga: Tigukit aglait makkoa, aglait pisiniarnermik nalonaijaijut, nalonaikusersimajut, aglaillo nalonaikusersimangitut, ilikillo pôngmut maggaujomut, sivitojomik piulimajautsiarᴋovlugit.

¹⁵ Imâk oᴋarmat Nâlagaᴋ Zebaot, Israêlib Gudinga: iglut perorsêvîllo vaineliksatalîllo pisiarijaulârivut sulle nuname tamatomane.

¹⁶ Aglaillo pisiniarnermik nalonaijaijut tunisimaᴋârapkit Bârungmut, Neriab erninganut, tuksiarpunga Nâlakamut, oᴋarlunga:

¹⁷ Nâlagaᴋ Gudik! Ahâk, ᴋilaᴋ nunalo pingortilauᴋpakik pitsartunersoarnut talingnullo issangmijomut; ajornartoᴋangilaᴋ ilingnut;

¹⁸ Nâpkiningnermik saᴋᴋertitsijotit tausandeoᴋattartunut, pidlarnikteojotillo atâtat idluitulingininik ᴋitorngangita sagvinginut, kingorngatigut pijunut; Gudemik angijomik pitsartujomiglo, Nâlakamik Zebaotemik atteᴋartotit;

¹⁹ Angijôvotit atanertuinerme, pitsartudlarlutillo piniarnerme; ijîkik uitavuk inuit ᴋitorngangita apᴋotinginut tamainut, tamaita tunitjivigijomavlugit apᴋotingit maliklugit, piniarningitalo kinguniksangit maliklugit;

²⁰ Nalunaikutanik tatamnartuniglo pititsilauᴋtotit nuname Egipteneme uvloᴋ tamanna tikidlugo, Israêleme tâpkoalo assingita akorngane; tusaumajautilutillo sorlo uvlome;

²¹ Tikiutjilauᴋtotillo inuᴋotingnik Israêlikunik nunamit Egiptenemit nalunaikutatigut, tatamnartutigullo, aggangnullo pitsartujunut, talingnullo issangmijomut kapianartoᴋsoarmullo;

²² Tunitjivigilugillo nunamik ominga, angerutigilauᴋtarnik atâtagilauᴋtanginut tunijomavlugo tâpkonunga, nunamik imungmik igupsaujartullo orᴋsuanik kôlingmik;

²³ Tikipâllo pigilugolo; nippîlle nâlangilât, arvertalungilallônêt maligaksauᴋojarne; tamaita perᴋolauᴋtatit tâpkonunga piniaraksauᴋovlugit pinialungilait; tamanna pivlugo idluitoᴋ manna ilûnât tikitipat tâpkonunga;

²⁴ Ahâk, talut ᴋanilivaliavut iglugasaksoarnut sâlagijomavlugit; iglugasaksuillo tunijaumavut Kaldêamiut sorᴋsugvigijingita agganginut, saviksoaᴋ, kângnartoᴋsoarlo, nusilingnartorlo pitjutigivlugit; oᴋautigilauᴋtatit nalautsivut, ahâglo takovat.

²⁵ Igvillo Nâlagaᴋ Gudik! oᴋautivarma: Perorsêvik pisiariuk kênaujanut, kigligiutjijuksaniglo ᴋaiᴋojilerit; sunaubva iglugasaksuit tunijaumagaloartilugit Kaldêamiut agganginut.

²⁶ Nâlakablo oᴋausinga tikipoᴋ Jeremiamut, oᴋarlune:

²⁷ Ahâk, Nâlagauvunga, uvinilît ilûnatik Gudingat; ajornartoᴋarᴋâ uvamnût?

²⁸ Taimaimat imâk oᴋarpoᴋ Nâlagaᴋ: Ahâk, iglugasaksuit makkoa tunijomavakka Kaldêamiut agganginut, Nebukadnezariblo, Babilonib ataningata, agganginut; tâpsomalo sâlagijomârpait;

²⁹ Kaldêamiullo, iglugasaksuit makkoa sorᴋsugvigijingita, tikilârput iglugasaksuillo makkoa ikilugit ikomamullo nungulugit, iglullo, tâpkoa ᴋângit isserluanititsiviolauᴋtut Baalemut, kovisiviolauᴋtullo tunergutinik imiksanik gudingoanut Gudib assinginut, uvanga ningarsâromavlunga.

³⁰ Israêlib ᴋitorngangit Judablo ᴋitorngangit idluitulilaungmatta sâmne inôsungnermingnit; Israêlib ᴋitorngangita ningarsârtuinarmanga aggangita piniarninginut, oᴋarpoᴋ Nâlagaᴋ.

³¹ Iglugasaksuit makkoa ningarsautigênarpakka ᴋaningaumajârsautigênarpakkalo sanajautainarninginit uvlome tikidlugo; pêjaiᴋovlunga tâpkoninga kênama sânganit;

³² Israelib ᴋitorngangita Judablo ᴋitorngangita idluituliningit ilûnaita pitjutigivlugit, piniarnerijangit uvanga ningarsâromavlunga, tâpkoa, ataningitalo angajoᴋângitalo, ajoᴋertuijungitalo, nalautaijungitalo, Judablo angutingita Jerusalemiblo inungita.

³³ Tunuterpullo uvamnut, kênalijaromangimut; ajoᴋertulauralloarapkillo, nikovisaraivlunga ajoᴋertorlugit, sulle nâlalaungilat ajoᴋertutsit ilalioromalaungilait.

³⁴ Maᴋojungnarᴋotitiglo napartipait iglome attimnut taijaujome, ivjornaitilugo.

³⁵ Poᴋtojoliorpullo Baalemut, Hinnomib erningata naᴋsanganêtunik, ernitik panitiglo ikomakôrᴋojomavlugit Môlokemut; perᴋolaungitarale tamanna tâpkonunga, ômamiutarilaungilaralônêt piniarniarmatta maᴋojungnartomik tamattominga; Judakut idluitulitiniarlugit.

³⁶ Taimaimat mâna imâk oᴋarpoᴋ Nâlagaᴋ, Israêlib Gudinga, iglugasaksuit ukkua pivlugit, oᴋautigijase: Tunijaumavut Babilonib ataningata agganginut saviksoakut, kângnartoᴋsoakullo, nusilingnartokullo;

³⁷ Ahâk, katersoromavakka nunanit tamainit ajaktortauviotilauᴋtamnit tâpkoninga ningarnimne, ᴋaningaumajârnimnalo, ilungertudlarnermelo; tikiutitsomagivakkalo tamaunga, terliklutiglo inôᴋojomavakka;

³⁸ Inuᴋutigijomavakkalo Gudeojomavungalo tâpkonunga.

³⁹ Tunitjivigijomavakkalo ômamik atausiojomik apᴋotiksamiglo atausiojomik sivôraᴋovlugit uvamnik soraijuitomik; tâpkoa idluarᴋutiksanginut ᴋitorngangitalo tâpkoa kingorngane idluarᴋutiksanginut;

⁴⁰ Tâpkonungalo angeᴋatigêngnelioromavunga soraijuituksaujomik, sorairomanginama ajungitulivigivlugit; ômamiutaᴋartitsomavakkalo sivôranermik uvamnik ᴋemaiᴋonagillo uvamnik.

⁴¹ Ila, ᴋuviasûtigijomavakka ajungitulivigijomavlugit, amâtsioromavakkalo nunamut mattomunga ômatimnut ilûnânut tarnimnullo ilûnânut.

⁴² Imâk oᴋarmat Nâlagaᴋ: Sorlo idluitoᴋ tamanna ilûnât tikiutigapko inungnut ukkununga, taimak ajungineᴋ tamât angerutigijara tâpkonunga tikiutijomagivara tâpkonunga.

⁴³ Perorsêvillo pisiarijaujomârput nuname omane oᴋautigijapsingne: Sunairutivoᴋ, inuᴋarungnairpoᴋ nergjuteᴋarungnairlunalo; tunijaumavoᴋ Kaldêamiut agganginut.

⁴⁴ Perorsêviksilârput kênaujanut, aglaillo nalonaijaijut aglavigilârpait attermingnik, nalonaikuserlugillo, kigligiutsijuksallo najûtiᴋolugit, Benjamib nunangane, Jerusalemiblo erᴋâne, Judablo iglugasaksoangine, iglugasaksoarnalo ᴋaᴋᴋanêtune, iglugasaksoarnalo naᴋsanêtune, iglugasaksoarnalo seᴋinerdline; aularutijaujungit utertitsomârapkit, oᴋarpoᴋ Nâlagaᴋ.