Jeremia 31 - Labrador Inuttitut Heritage Bible

¹ Naliutome taipsomane, oᴋarpoᴋ Nâlagaᴋ, Gudigijomârpânga Israêlib kinguvârêngita ilûnatik, uvangalo inuᴋutigijomârpakka.

² Imâk oᴋarpoᴋ Nâlagaᴋ: Inuit saviksoarmit amiakolauᴋtut nâpkigijauviksarsilauᴋput sunaᴋajuitome; ila, Israêlikut, merngoerserviksaᴋartilaurapkit.

³ Nâlagaᴋ saᴋᴋilauᴋpoᴋ uvamnut ungasiktomit, oᴋarlune: Naglingnermut soraijuitomut nagligivagit, taimaimat pitsiarnermut amuarasuarpagit.

⁴ Attauk, sananiarpagit pijarêrsimaniarpotillo tagva, uigasôjotit Israêle; ᴋillausijarlutit pinnarnarsititaujomârivotit, anijuksauvotillo ᴋuviasuklutillo oᴋigêsertut ilagilugit.

⁵ Vaineliksataliliortuksaulârivotit Samariab ᴋaᴋᴋangine; ilijijut ilijijomârput, nerrivlutiglo paunganginik.

⁶ Uvloᴋalârmat Efraimib ᴋaᴋᴋangine pigârtut ᴋaigarsugomârvingat: Attê, majoralerta Zionemut Nâlakamut Gudiptingnut.

⁷ Imâk oᴋarmat Nâlagaᴋ: ᴋuviasungnermut imgeritse Jâko pivlugo, nipliatsiaritselo inôᴋatigêksuit pinerpângat pivlugo; nipliaritse, nertordleritse, oᴋarluse: Nâlagaᴋ, piulilaukit inuᴋotitit, Israêlib amiakungit.

⁸ Ahâk, tamaungartitsomârpakka nunamit taggardlermit, katersoromârpakkalo nunaᴋsûb kiglinginit issuklerpânit, tautungitut, tussiaktullo, singaijullo, ernisuktullo ilautilugit, katimgajoᴋsôvlutik uteromârput tamaunga.

⁹ Keavlutik tamaungaromârput, ᴋenutilugillo tassioromârpakka; ingerartitsomârpakka kôt imalît saningine, apᴋome naggojome nâkliveᴋangitome; atâtaugama Israêlimut, Efraimelo ernerivara angajuklerpâk.

¹⁰ Nâlakab oᴋausinga tusarsiuk, inôᴋatigêksoangojose ilipse, oᴋautigisiuglo ᴋikertane ungasiktune; oᴋaritselo: Israêlikunik siamartitsilauᴋtûb katersoromârivait ama, pairijomârlugillo, sorlo saukanik mianersijûb saukane pairingmagit.

¹¹ Nâlakab Jâko sattôrmago, pisiaringmilugo pitsartuᴋijangata agganginit.

¹² Tikituksauvullo tuksiarlutiglo Zionib poᴋtoningane; ᴋerdlâᴋaijomârpullo Nâlakab pitsiarninganut, ᴋaᴋᴋôjaksanut, vainemullo, orᴋsumullo, saugâranullo tuktuvâranullo; tarningillo itsomârput sorlo perorsêviktut imeᴋatsiartotut; sanikterijungnaimarigomârpullo.

¹³ Uigasuglo oᴋigêsernerme ᴋuviasudlaromârpoᴋ, inôsuktullo inuᴋoartullo ilagêklutik; kiksarningat ablatsangortitsomârapko ᴋuviasungnermut, manigoromavakkalo, ᴋuviasuktilugillo kiksarnermingnit.

¹⁴ Ajoᴋertuijullo tarningit nâmaksititsomârpakka ajunginermut, inuᴋotimalo pitsiarnera nâmagijomârpât, oᴋarpoᴋ Nâlagaᴋ.

¹⁵ Imâk oᴋarpoᴋ Nâlagaᴋ: Râmame nippe tusartauvoᴋ, ogguadlarneᴋ, ᴋeadlarnerlo kajumidlartoᴋ, Rahelib ᴋitorngane ᴋeagivait; manigortaujomangilaᴋ ᴋitorngane pivlugit, itsungnairmatta.

¹⁶ Imâk oᴋarpoᴋ Nâlagaᴋ: ᴋeanît tusartautailitiuk, ijîkiglo ᴋugviortailitikik; sulijat akkilertaujomârmat, oᴋarpoᴋ Nâlagaᴋ; uteromârpullo ômisuktub nunanganit.

¹⁷ Nerriugijaksaᴋarpoᴋ kinguvâksarnut, oᴋarpoᴋ Nâlagaᴋ; ᴋitorngatillo uteromârput kigligijamingnut.

¹⁸ Efraim tusarsimavara oggorilune nangminerminik, imailivlune: Sugialauᴋparma, tâvalo sugiartaulauᴋpunga, noggaᴋtut nangmautemik sungiusimangitotut; sâgiartilaunga, tâvalo sâgiarsimaniarpunga; Nâlagaugavit Gudigijara.

¹⁹ Sâgiartitauᴋârtilunga, ᴋaᴋialilauᴋpunga; ajoᴋertortauᴋârtilunga, sibviara tiglulauᴋpara; kangusudlalauᴋpunga, ila, silasiormariklunga, inôsungnima naggonarninga nangmariaᴋarapko.

²⁰ Efraim ernerivigo erdlingnartôᴋ? Kitorngauvâ ᴋuvianartôᴋ? Suadlarlugo oᴋarvigijarangapko, sulle nagligilugo erᴋaumavara; tamanna pivlugo iluga aulavoᴋ tâmna pivlugo; nâpkigijomadlarpara ila, oᴋarpoᴋ Nâlagaᴋ.

²¹ Nalonaijaijutiksanik apᴋosinermik napartitsilerit, napajunik unertutjijuksanik âᴋiksoilerit; ômatît apᴋosinersoarmut sâtiuk, apᴋomut ingerarvigilauᴋtarnut; utermît uigasôjotit Israêl, utermît iglugasaksoaᴋotingnut ukkununga.

²² Kanoᴋ sivitutigijomik utitaromavêt, panik kingopiosartotît? Nâlagaᴋ nutâmik pingortitsivoᴋ nuname; arnab angut iluvâ.

²³ Imâk oᴋarpoᴋ Nâlagaᴋ Zebaot, Israêlib Gudinga: Oᴋautsit makkoa oᴋauserijomârivait Judab nunangane iglugasaksoanginalo, aularutijaunermit utertigupkit: Nâlakab saimarsarlitit, inniksaujotit idluarnermik, ᴋaᴋᴋaujotit ivsornaitoᴋ.

²⁴ Juda iglugasaksoangillo ilagêklutik inneᴋaromârput tagvane, perorsêvilerijut, pairᴋsijullo saukanik.

²⁵ Nakoᴋsititsigama tarninik nukingêrutijunik, nâmaksititsivungalo tarninik sanikterijunik tamainik.

²⁶ Tamannalo pingmat tupalauᴋpunga, uitarlungalo: siningnerilauᴋtaralo nakoᴋsiutigidlarpara.

²⁷ Ahâk, uvlut naliutijomârput, oᴋarpoᴋ Nâlagaᴋ, Israêlikut Judakullo karngasoivigijomârapkit karngasutinik inungnik karngasutiniglo nergjutinik.

²⁸ Pijoᴋalârporlo, sorlo kamagilaurapkit nusugomavlugit serᴋomitsomavlugillo, oggotitsomavlugit asseroromavlugillo, kapiasuktitsomavlugillo; taimaluatsiaᴋ kamagijomagivakka âᴋiksoromavlugit ilijomavlugillo, oᴋarpoᴋ Nâlagaᴋ.

²⁹ Uvlune taipkonane oᴋartoᴋarungnairomârpoᴋ: Atâtat nerrisimavut paunganik sêrnartunik, ᴋitorngallo kigutingit kupserᴋoput.

³⁰ Ilûnatigle atunit idluitulinitik pivlugit toᴋojomârput; naliak nerrijoᴋ paunganik sêrnartunik, tâpsoma kigutingit kupserᴋojomârput.

³¹ Ahâk, uvlut naliutijomârput, oᴋarpoᴋ Nâlagaᴋ, tagva Israêlikut Judakullo angiᴋatigijomavakka;

³² Angiᴋatigêngnertut taipsotunaungitoᴋ angerutigilauᴋtaptut angajoᴋânginut, uvlorme taipsomane, aggangit tigulaurapkit aulartilugillo nunamit Egiptenemit; angiᴋatigêngnerale soᴋosijuitilaungilât, Nâlagaulauraloarama tâpkonunga, oᴋarpoᴋ Nâlagaᴋ.

³³ Tamadja angerutiga Israêlikunut, uvlut tamakkoa kingorngatigut pijomârtara, oᴋarpoᴋ Nâlagaᴋ: Perᴋojakka issumanginut pititsomavakka, ômatinginullo aglagomavakka; taipkonungalo Gudeojomavunga, tâpkoalo inuᴋotigijomârivakka.

³⁴ Naliatalo inûᴋatine ᴋatangutinelônêt ajoᴋertoriaᴋaromângilâ oᴋarlunalo: Nâlagaᴋ ilitariniaruk! Ilûnatik ilitarijomârmanga mikinerpâmit anginerpâk tikidlugo, oᴋarpoᴋ Nâlagaᴋ; idluituliningit issumagijungnairomârapkit, ajorningillo erᴋaumajungnairomârapkit.

³⁵ Imâk oᴋarpoᴋ Nâlagaᴋ, seᴋinermik tunitjijoᴋ ᴋaumautiksauᴋovlugo uvlormut, âᴋiksoijorlo taᴋᴋermiglo uvloritjaniglo ᴋaumautiksauᴋovlugit unnuarmut, aulatitsijoᴋ imarbingmik malliksoangit iktulijâdlarᴋovlugit; atteᴋartoᴋ Nâlakamik Zebaotemik:

³⁶ Aᴋiksortaumajut makkoa sorairpatta sâmne, oᴋarpoᴋ Nâlagaᴋ, tagva Israêlib kinguvângit sorairtuksaujomârivut inôᴋatigêngojungnailutik sâmne issoᴋangitomut.

³⁷ Imâk oᴋarpoᴋ Nâlagaᴋ: Kilaᴋ pânêtoᴋ issaktaujungnarpat, silaᴋsûblo tungavingit nautsertortaujungnarpatta, tagva allaromârivakka Israêlib kinguvângit tamaita, piniarnerisimajangit tamaita pitjutigivlugit, oᴋarpoᴋ Nâlagaᴋ.

³⁸ Ahâk, uvlut naliutijomârput, oᴋarpoᴋ Nâlagaᴋ, iglugasaksuit igloliortaujomârmatta Nâlakamut Hananêlib nuvugusinganit terreᴋub itertarvia tikidlugo.

³⁹ Noᴋaᴋservalaullo ôktût anijuksauvoᴋ sulle naggovlune ᴋaᴋᴋamut Gârebemut, sangujuksauvlunalo Goamut.

⁴⁰ Naᴋsarlo toᴋungajoᴋtalik arᴋjataliglo ilûnane, perorsêvillo ilûnatik kôk Kidron tikidlugo, horsit itertarviata terreᴋoa unanêtoᴋ tikidlugo, ivjornaituksauvut Nâlakamut; nussuktaujuksaungilaᴋ oggotitaujuksaungilarlo issoᴋangitomut.