Jeremia 30 - Labrador Inuttitut Heritage Bible

¹ Tamadja oᴋautsit Nâlakamit Jeremiamut pijut, oᴋarlutik:

² Imâk oᴋarpoᴋ Nâlagaᴋ, Israêlib Gudinga, oᴋarlune: Oᴋautsit ilûnaita oᴋauserisimajakka ilingnut aglakit aglagaksamut.

³ Ahâk, uvlut naliutsomârmatta, oᴋarpoᴋ Nâlagaᴋ, inuᴋotima Israêlikut Judakullo aularutijauningat sorairtitsomârapko, oᴋarpoᴋ Nâlagaᴋ; utertitsomârpakkalo nunamut tunilauᴋtamnut atâtanginut, pigilârpâllo.

⁴ Ukkuangovullo oᴋautsit Nâlakab oᴋauserilauᴋtangit Israêlikut pivlugit Judakullo pivlugit.

⁵ Imâk oᴋarmat Nâlagaᴋ: Tusarsimavogut ᴋoaᴋsâdlarnerub nippinganik, erᴋsinerub ulapirᴋsauteolungitub.

⁶ Apertsoritse mâna, missigiluselo angut ernisusôngomangât; sôk angutit ilûnaita tokovigît aggamingnik ᴋettermingnêtitsijut âniatailinasuarmut arnatitut ernisuktutitut, kenaillo ilûnatik ᴋattaktilutîk?

⁷ Kappê! Uvloᴋ taimna angijôvoᴋ, adseᴋangilaᴋ; Jakob siorniorvigivâ; piulijaujomârporlo tamattomangat.

⁸ Pijoᴋalârporlo uvlorme tâpsomane, oᴋarpoᴋ Nâlagaᴋ Zebaot, tâpsoma nangmautanga pêjaromagapko ᴋongasernit, ᴋelarutitillo kiktoraromagapkit, takorngartallo kivgarijungnailârpât;

⁹ Kivgartulârpullo Nâlakamik Gudemingnik, atanerijamingniglo Dâvidemik, makititsomârtamnik tâpkonunga.

¹⁰ Taimaimat, sivôraniarnak Jâko kivgara, oᴋarpoᴋ Nâlagaᴋ; kapiasudlarnak, Israêle; ahâk, ᴋelujomârpagit ungasiktomit, kinguvâksatillo nunamit aularutijauvigijamingnit; Jâkolo uteromârpoᴋ inilangatsiarniarlunalo pagvisartaulugane, ᴋoaᴋsârtitsijoᴋarnialungilarlo tâpsominga.

¹¹ Ilingnênama, oᴋarpoᴋ Nâlagaᴋ, piulijomavlutit; inôᴋatigêksuit ilûnaita siamangatitauvigijatit uvamnut nungumarigomârapkit, igville nungumarigomângilagit; sugiaromârpagille nâmatuinartomik, pidlartautailititsomângimarikpagillo.

¹² Imâk Nâlagaᴋ oᴋarmat: ᴋanoenerijat inûlijaujungnangilaᴋ, ikîllo piungitoᴋsôdlarpoᴋ.

¹³ Pitjutingnik akkisartuijoᴋangilaᴋ, nimmertauᴋovlutit; inûlijaunartunik âniasiutiksaᴋangilatit.

¹⁴ Ungagijivit ilûnatik puigorpâtit; ᴋenilungilâtit; killersimagapkit ômisuktûb nâpkigosungneᴋangitûb sugiarninganut; idluitulinivit angininga pivlugo, ajornitit unuksisimangmatta.

¹⁵ Sôᴋ ᴋeavêt ᴋanoenerijat pivlugô? Anianerijat inûlijaujungnangilaᴋ; idluitulinivit angininga pivlugo, ajornitit unuksisimangmatta taimailiorvigisimavagit.

¹⁶ Taimaimat nungutsijut ilingnik nungutaujomârput; akkerartortitit ilûnamasiatik aularutijaujomârput; aᴋsârniktut ilingnik aᴋsârnigaujomârput, tamaitalo ilingnik unangmik lertut unangmijautitsomârpakka.

¹⁷ Uvanga ᴋanoetsungnaititsomagapkit, ikitillo inûlijomagapkit, oᴋarpoᴋ Nâlagaᴋ; ajaktortaumajônerarmatit, oᴋarlutik: Zioneovoᴋ, kimullônêt erᴋagijaujungnaitoᴋ.

¹⁸ Imâk oᴋarpoᴋ Nâlagaᴋ: Ahâk, Jâkob tuppingit aularutijaujut utertitsomârpakka, innigijangillo nâpkigijomârpakka; iglugasaksuillo ᴋarmaᴋalârput ᴋaᴋᴋârulangmingne, igloᴋsoarlo takojaujomârpok innigilauᴋtamine.

¹⁹ Kujalijullo nertordlertullo nippingit anijomârput tâpkonangat; unuksititsomârpakkalo ikitônialungilallo; angijorortitsomârpakkalo mikijôniangilallo.

²⁰ Kitorngangillo sivornganetut itsomârput, ilagêktungillo tungatitaujomârput sâmne, oᴋumaiksartitsijullo tâpkoninga pidlaromârpakka.

²¹ Ilamik ilangat angajoᴋârijomârpât, aulatsijingallo akunermingnit pijomârpoᴋ; ᴋaglititsomârpara, tâpsomalo tikilârpânga; kina ᴋoaᴋsângalungilâk uvamnôrlunê? oᴋarpoᴋ Nâlagaᴋ.

²² Ilipselo inuᴋutaujomârpose uvâmnut, uvangalo Gudeojomârpunga ilipsingnut.

²³ Ahâk, Nâlakab aᴋᴋunaᴋsoanga tikitsomârpoᴋ, ila, tâpsoma ᴋaningaumajârninga ittibjautisimavoᴋ, ila, ullajujaᴋsoaᴋ; ᴋâgomârpoᴋ idluitulijut niaᴋunginut.

²⁴ Nâlakab ningaumajârninga uterniatsangilak piniarᴋârane nâmaksititsiᴋâranalo ômatime kajusijutigijanganik; uvluksane kingorliojune tukkisilârpase tamanna.