Jeremia 3 - Labrador Inuttitut Heritage Bible

¹ Oᴋarpullo: Angut avigune nuliaminit, nuliangalo aularpat tâpsomangat assianiglo uiniklune, utilârivâ ama tâpsomungâ? Nuna tâmna ivsornartitaunajangilâᴋ?

² Ijikik uitatikik ᴋaᴋᴋanut merᴋoᴋangitunut, takolerlutillo; nane ajortuliviᴋalaungilatît? Utaᴋilugit iksivalauᴋpotit apᴋosinerne, sorlo Arâbiamioᴋ sunaᴋajuitome; nunalo ivsornartipat ajortulinernut idluitulinernullo.

³ Tamanna pivlugo silaluk operngâme noᴋᴋarᴋojauvoᴋ, silaluglo kingorliojoᴋ tikiᴋojaungilaᴋ; igville ᴋauᴋarpotit assiniarpaktûb ᴋaungatut, kangusugungnangilatillo.

⁴ Mânamit ᴋaigarsugvigijomangilarmâ: Atâtaᴋ, inôsungnimne tasiortigilauᴋpagît?

⁵ Soraijunane ningatsainarniarᴋâ? Anigortiniangilaûk issoᴋangitomût? Ahâk, taimak oᴋaralloarpotit idluitulivotillo, issumangniglo piniaromavotit.

⁶ Ataniublo Josiab naliuningane Nâlakab oᴋautivânga: Takogaloarᴋêt Israêlib kingupiarlorsimajub piniarninginîk? Majorarsimavoᴋ ᴋaᴋᴋanut poᴋtojunut tamainut, napârtullo tungujortat ilûnatik atânut, tagvanalo assiniarᴋattarpoᴋ.

⁷ Tamakkoninga tamainik piniarsimaᴋârtilugo oᴋalauᴋpunga: Uterniarpoᴋ uvamnut; utilaungilarle; najangatalo tunganaitub Judab takovâ tamanna.

⁸ Takolauᴋpungalo, tamakkoa tamaita pitjutigilugit Israele kingupiartortoᴋ ajortulisimalaungmat, avilaurapko tunidjivigigapkolo aglangnik avitsijutiksanik, najanga tunganaitoᴋ Juda sivôralaungimat; tâmnaletauᴋ ailauᴋpoᴋ assiniariartorᴋatauvlunalo.

⁹ Sunaubvalo assiniarningita unipkautauninginut nuna ivjornartitauvoᴋ, ujarᴋallo ᴋejuillo ajortulijutigilauᴋpait.

¹⁰ Sullele tamakkoa pigaloartilugit, najanga tunganaitoᴋ Juda utersimangilaᴋ uvamnut ômamut tamânut, takkormôrdlunele, oᴋarpoᴋ Nâlagaᴋ.

¹¹ Nâlakablo oᴋautivânga: Israêle kingupiartortoᴋ nalonaijarpoᴋ nangminerminik idluarnersauvlune Judamit tunganaitomit.

¹² Ailerit, oᴋautsillo tamakkoa oᴋâlautigikit, avunga sângavlutit, oᴋarlutillo: Uterittôᴋ, Israêle kingupiartortotit, Nâlagaᴋ oᴋarpoᴋ; ningarlunga takonâtsainaromangilagit, nâpkiniktôgama, Nâlagaᴋ oᴋarpoᴋ, soraijunangalo ningaumajâromangilanga.

¹³ Kissiane idluitulinitit kigligiksautigikit, Nâlagaᴋ Gude idluitulivigilaurangne, salumainîllo serᴋerautigisimavat takorngartanut napârtut tungujortat ilûnatik atâne, nâlalaungilaselo nippimnik, Nâlagaᴋ oᴋarpoᴋ.

¹⁴ Uteritsetôᴋ, ᴋitorngaujose kingupiartorsimajose, Nâlagaᴋ oᴋarpoᴋ, aipaujomagama ilipsingnut; katersoromagapse, atauseᴋ iglugasaksoarnit, magguglo ᴋitorngarênit, tikiutitsomavapselo Zionemut:

¹⁵ Tunidjivigijomavapselo pairᴋsijuksanik ômatima idluarijanginik pairᴋsiniartunik ilipsingnik ilisimanermut silatunermullo.

¹⁶ Pijoᴋalârporlo, aglivaliasimagupse unuksisimalerupselo nuname naliutome tâpsomane, Nâlagaᴋ oᴋarpoᴋ, oᴋartoᴋarungnairomârmat: Nâlakab iklervinganik kigligiutjineᴋtalingmik; tâmna issumagijaunialungilaᴋ; erᴋaumaniangilâllônêt, nalipsarniangilâllônêt, assiksanganiglônêt sananiangilat.

¹⁷ Naliutomele tâpsomane Jerusalem atseraromârpât Nâlakab iksivautaᴋsoanganik; inôᴋatigêksuillo ilûnatik katijomârput tagvunga, Nâlakab attinga pivlugo, Jerusalemut; arvertarungnairomârpullo ômatingita idluitut nâmagijangat maliklugo.

¹⁸ Naliutome tâpsomane Judab ᴋitorngangit aijomârput Israêlib ᴋitornganginut, tikiᴋatigêgomârpullo nunamit avanêtomit nunamut kingormgutijaksautilauᴋtamnut atâtagilauᴋtapsingnut.

¹⁹ Oᴋalauᴋpungale: ᴋanoᴋ tagga pititsungnarpagît ᴋitorngat akornganût, tunidjivigilutillo nunamik pijominartomîk, kingormgutijaksamik pionerpaujomik inôᴋatigêksoarnît? Oᴋalauᴋpungalo: Taijomârparma: Atâtamik; maligungnainiarungnaiparmalo.

²⁰ Sorlo arnab nalangaivlune uine ᴋemangmago, taimaluatsiaᴋ, ilipse, Israêlib ᴋitorngangit, nalangaivigivapsinga, oᴋarpoᴋ Nâlagaᴋ.

²¹ Nippe tusartauvoᴋ ᴋaᴋᴋane merᴋuᴋangitune, Israelib ᴋitorngangita ᴋeaningit ᴋenuningillo, mumiktitsisimangmatta apᴋotigijamingnik, puigorsimangmattalo Nâlakamik Gudemingnik.

²² Uteritsetôᴋ, ᴋitorngaujose kingupiartorsimajose, kingupiartornise inûlijomavakka. Ahâk, ᴋaivogut ilingnut, tagva igvit Nâlagauvotit Gudigivaptigillo.

²³ Nalautsivoᴋ ila, ikajorneᴋ nerriugijaujoᴋ ᴋaᴋᴋanit, inugasaksuit pervaludlarningat ᴋaᴋᴋane, sulitsangimat. Nalautsivoᴋ ila, Israêlib piulijauningat Nâlakamêngmat Gudiptingne.

²⁴ Kangunartoᴋ nungûtsisimavoᴋ atâtagilauᴋtapta suliarijanginik inôsungniptingnit; saugaᴋotinginik nergjuteᴋotinginiglo, erninginik paninginiglo.

²⁵ Inangatuinarta kangusungniptingne, kangusungnipta uliklitigut, Nâlagaᴋ Gudivut idluitulivigisimagaptigo, uvagut atâtagilalauᴋtaptalo, inôsungniptingnit uvloᴋ tamanna tikidlugo, nâlalaungilagullo Nâlakab Gudipta nippinganik.