Jeremia 29 - Labrador Inuttitut Heritage Bible

¹ Makkoangovut aglait oᴋausertangit nalautaijub Jeremiab tilijangit Jerusalemit aularutijaujut angajoᴋângita amiakunginut, ajoᴋertuijunullo, nalautaijunullo, inungnullo tamainut Nebukadnezarib aularutijanginut Jerusalemit Babilonemut;

² Ataneᴋ Jekonia, nuliangalo, pimaklertullo, angajoᴋaᴋsuillo Judame Jerusalemelo, sanajillo sabviortillo, Jerusalemit aularsimaningita kingorngane;

³ Elâsab, Sâfanib erningata, Gemâriablo, Hilkiab erningata aggangitigut, Zedekiab, Judab ataningata, tilijâkita Babilonemut, Nebukadnezaremut, Babilonib ataninganut, oᴋartut:

⁴ Imâk oᴋarpoᴋ Nâlagaᴋ Zebaot, Israêlib Gudinga, aularutijaujunut tamainut aularutijautitamnut Jerusalemit Babilonemut:

⁵ Iglolioritse innigivlugillo; perorsêvilioritse, nerriluselo perortunginik;

⁶ Nulainingnialeritse, ernertâritselo panitârluselo; erniselo nuliaᴋartisigik paniselo tunisigik angutiginiartanginut, ernertârᴋovlugit panitârᴋovlugillo, unuksivaliatitselo tagvane, ikitlilerniaraselo.

⁷ Iglugasaksuillo aularutijauviotitama ilipsingnik ulapirᴋsautiksanganik pinasuaritse, Nâlakamullo tuksiutisigik; tâpkoa ulapirᴋsauteᴋarningine ilipse ulapirᴋsauteᴋarniarapse.

⁸ Imâk oᴋarmat Nâlagaᴋ Zebaot, Israêlib Gudinga: Uivêrijautailititse nalautaijupsingnut akunaptingnêtunut, pijomârtuksaniglo oᴋarvigijipsingnut, sinnaktomaniselo nâlangniarasigik sinnaktomanerivaktase.

⁹ Saglovlutik nalautaivigingmase attimne; uvangale tililaungilakka, oᴋarpoᴋ Nâlagaᴋ.

¹⁰ Imâk Nâlagaᴋ okarmat: Jârit 70it Babilonemut nâmaksikpatta, nalipsaromavapse, oᴋauserijaralo ajungitoᴋ ilipsingnut nâmaksititsomavara, utertitsomavluse tamaunga.

¹¹ Uvanga nalunginakpit issumat pivluse issumagijakka, oᴋarpoᴋ Nâlagaᴋ, issumat ulapirᴋsautelit, idluitôlungitullo, mattoma kingorngane tunitjivigijomavluse nerriungnermik.

¹² Nipliavigijomârpapsingalo, tuksiarvigijartorniarpapsingalo, uvangalo tusaromârpapse.

¹³ Keneromârpapsingalo nagvârniarlungalo, ômatipsingnut ilûnânut ᴋeneromârupsinga.

¹⁴ Nagvârtaujomârpungalo ilipsingnut, oᴋarpoᴋ Nâlagaᴋ, aularutjauniselo sorairtitsomârpara, katersoromârpapselo inôᴋatigêksuit akornganit, nunanillo tamainit âtauviotilauᴋtamnit ilipsingnik, oᴋarpoᴋ Nâlagaᴋ, utertitsomârpapselo nunamut aulartitauvigilauᴋtapsingnut uvamnut.

¹⁵ Oᴋarsimagapse: Nâlakab Babiloneme nalautaijut uvaptingnut makitipait.

¹⁶ Imâk Nâlakab oᴋautigingmagit ataneᴋ iksivajok Davidib iksivautaᴋsoangane, inuillo tamaita iglugasaksoarne makkonane nunaᴋartut, ᴋatangutise aularutijauᴋatigilaungitase;

¹⁷ Imâk oᴋarpoᴋ Nâlagaᴋ Zebaot: Ahâk, tilikliutjijomavunga tâpkonunga saviksoarmik, kângnartoksoarmiglo, nusilingnartomiglo, ilingatitsomavakkalo paungatannaktitut piungitutitut nerrijaujungnangitutitut, taimak piungitigigamik.

¹⁸ Maligomavakkalo saviksoarmut, kângnartoᴋsoarmullo, nusilingnartomullo, unertutigijomavakkalo egiortartauᴋovlugit nunaᴋsûb ataniovingine tamaine idluiᴋutauᴋovlugit, tataminiarutauᴋovlugillo, mitautiksauᴋovlugillo, sinaungajutiksauᴋovlugillo inôᴋatigêksuit tamaita akorngane ajaktortauvigijangine uvamnut:

¹⁹ Nâlangimatigit oᴋausikka, oᴋarpoᴋ Nâlagaᴋ, tilikliutigilauᴋtakka tâpkonunga kivgapkut nalautaijutigut, makisaraivlunga tililugillo; tusaromalaungilasele, oᴋarpoᴋ Nâlagaᴋ.

²⁰ Taimaimat tusaritse Nâlakab oᴋausinginik ilipse ilûnase aularutijaujose, Jerusalemit Babilonemut aulartitakka.

²¹ Imâk oᴋarpoᴋ Nâlagaᴋ Zebaot, Israêlib Gudinga, Ahabe, Kolaiab erninga pivlugo, Zedekialo, Massaiab erninga pivlugo, saglonermik nalautaisimajûk ilipsingnut attimne: Ahâk, Nebukadnezarib, Babilonib ataningata, agganginut tunijomavakka, tâpsomalo toᴋotsomârpak ijipse sângine;

²² Tâpkoalo oᴋarnerlutigijaujomârpuk Judamit aularutijaujunut tamainut Babilonemêtunut, oᴋautauvlutik: Nâlakab ilingatilitit Zedekiatut Ahabetullo, Babilonib ataningata ôtitâgiktitut ikomamut;

²³ Silainartomik piniarmanik Israêleme, assiniarmaniglo inôᴋatimik nulianginut, saglovlutiglo oᴋâlamanik attimne, uvamnut perᴋojaungitunik, uvangalo ᴋaujimajôvunga kigligiutjijôvungalo, oᴋarpoᴋ Nâlagaᴋ.

²⁴ Semaialo Nehelamioᴋ pivlugo oᴋartuksauvotit, oᴋarlutit:

²⁵ Imâk oᴋarpoᴋ Nâlagaᴋ Zebaot, Israelib Gudinga, oᴋarlune: Attit Nalunaikusiutigilugo tilikliutjilauravit aglangnik inungnut tamainut Jerusalemêtunut, Zefaniamullo, Masaiab erninganut ajoᴋertuijôjomut, ajoᴋertuijunullo tamainut, oᴋarlutit:

²⁶ Nâlakab ajoᴋertuijungortipâtit Jojadab ajoᴋertuijôjub inningane, Nâlakab iglungane udjertorteoᴋovluse issumairutisimajunik nalautaijôlertituniglo, pititsiᴋovluse tâpkoninga parngnanairsimavingmut parngnanairsûtinullo.

²⁷ Sugavît tagva Jeremia Anatotemioᴋ nalautaijôlertitoᴋ ilipsingnut inertingipiûk?

²⁸ Tâpsoma uvagut Babilonemêtogut tiliklervigingmatigut, oᴋarlune: Aularutjaunise sivitovoᴋ; iglolioritse innigivlugillo; perorsêvilioritse nerriluselo perortunginik.

²⁹ Zefaniablo ajoᴋertuijub aglait makkoa atuarpait Jeremia nalautaijoᴋ tusâtilugo.

³⁰ Nâlakablo oᴋausingata Jeremia tikipâ, oᴋarlune:

³¹ Aularutijaujunut tamainut tiliklisârit, oᴋarlutit: Imâk Nâlagaᴋ oᴋarpoᴋ Semaia Nehelamioᴋ pivlugo: Semaiab nalautaivigingmase, uvangalo tililaunginakpo, saglonermiglo sungertuteᴋartingmase;

³² Tamanna pivlugo imâk oᴋarpoᴋ Nâlagaᴋ: Ahâk, Semaia Nehelamioᴋ kinguvângillo sugiaromavakka; amiakoᴋartuksaungilaᴋ inuit makkoa akorngane nunaᴋartomik, takojuksaungilarlônêt ajungitomik piniarutigijomajamnik inungnut makkonunga, oᴋarpoᴋ Nâlagaᴋ; pikkablanermik oᴋâlasimangmat Nâlakamut.