Jeremia 28 - Labrador Inuttitut Heritage Bible

¹ Pijokarporlo jâreme tâpsomanetsainaᴋ, Zedekiab, Judab ataningata, atanioningata pigiarningane, jârit sittamangane, taᴋᴋit tallimangane, Hannania, Azurib erninga nalautaijoᴋ, Gibeonemioᴋ, oᴋarmat uvamnut Nâlakab iglungane, ajoᴋertuijut inuillo tamaita najûtitilugit, oᴋarlune:

² Imâk oᴋarpoᴋ Nâlagaᴋ Zebaot, Israêlib Gudinga, oᴋarlune: Babilonib ataningata nangmautanga navgorpara.

³ Jârîk iluitûk maggûk nâkârtinagik tamaungautitsomalerivakka Nâlakab iglungata perᴋutingit, Nebukadnezarib, Babilonib ataningata aularutilauᴋtangit tamângat âlugillo Babilonemut;

⁴ Jekonialo, Jojakimib erninga, Judab ataninga, tamaitalo Judamit aularutijaulauᴋtut Babilonemut pijut tamaungautitsomagivakka, oᴋarpoᴋ Nâlagaᴋ; Babilonib ataningata nangmautanga navgorapko.

⁵ Nalautaijublo Jeremiab nalautaijoᴋ Hannania oᴋarvigivâ ajoᴋertuijut najûtitilugit inuillo tamaita Nâlakab iglungane ᴋikkartut najûtitilugit,

⁶ Jeremialo nalautaijoᴋ oᴋarpoᴋ: Amen, Nâlagaᴋ taimailiorle; Nâlakab oᴋautsitit nalautaijutigijatit nalautsitiligit, Nâlakab iglungata perᴋutingit, tamaitalo aularutijaujovinit tamaungautitsomavlugit Babilonemit.

⁷ Kissianele tusarsârit oᴋauseᴋ tamanna oᴋauserijara siutîngnut inuillo tamaita siutinginut;

⁸ Nalautaijut sivunimnêlauᴋtut sivunernalo itsarsoarme, nunat unuktut ataniovillo angijut unuktut nalautaivigilauᴋpait unatarnermik idluitomiglo nusilingnartomiglo.

⁹ Nalautaijoᴋ ulapirᴋsaumik nalautaijuteᴋartoᴋ, nalautaijub tâpsoma oᴋausinga nalautsilerpat, nalautaijoᴋ tâmna ilitarijaulârpok tilijaungmat nalâgut Nâlakamut.

¹⁰ Tâva nalautaijub Hannaniab nangmaut tiguvâ nalautaijub Jeremiab ᴋongasinganit navgorlugolo.

¹¹ Hannanialo oᴋarpoᴋ inuit tamaita tusâtilugit, oᴋarlune: Imâk oᴋarpoᴋ Nâlagaᴋ: Taimaluatsiaᴋ navgoromavara Nebukadnezarib, Babilonib ataningata, nangmautanga jârik iluitûk maggûk nâᴋârtinagik, pêrlugolo inôᴋatigêksuit ilûnatik ᴋongasinginit. Nalautaijorlo Jeremia aularpoᴋ.

¹² Nâlakablo oᴋausinga tikipoᴋ Jeremiamut, nalautaijub Hannaniab nangmaut navgorᴋârsimagamiuk pêrlugolo nalautaijub Jeremiab ᴋongasinganit, okarlune:

¹³ Ailerit, Hannanialo oᴋautiuk, oᴋarlutit: Imâk Nâlagaᴋ oᴋarpoᴋ: Nangmaut ᴋejuk navgorsimavat, tâpsomale inningane nangmauteliortuksauvotit kikkiangmik.

¹⁴ Imâk oᴋarmat Nâlagaᴋ Zebaot, Israêlib Gudinga: Nangmaut kikkiak ilivara inôᴋatigêksuit makkoa ilûnatik ᴋongasinginut, kivgartorᴋovlugit Nebukadnezaremik, Babilonib ataninganik; kivgartoraksarivâllo; ômajullo nujoartut naternamêtut tunisimagivakka tâpsomunga.

¹⁵ Nalautaijublo Jeremiab nalautaijoᴋ Hannania oᴋautivâ: Tusalerit Hannania; Nâlakab tililaungilâtit; inuillo ukkua sungertuteᴋartipatit saglonermik.

¹⁶ Tamanna pivlugo Nâlagaᴋ oᴋarpoᴋ imâk: Ahâk, nunab ᴋânganit pêjaromavagit; jâreme tamattomane toᴋojuksauvotit, oᴋâlasimagavit tappatonermik Nâlakamut.

¹⁷ Tagva nalautaijoᴋ Hannania toᴋovoᴋ jâreme tâpsomane taᴋᴋit savaningane.