Jeremia 27 - Labrador Inuttitut Heritage Bible

¹ Zedekiab, Josiab erningata, Judab ataningata atanioningata pigiarningane, oᴋauseᴋ tamanna tikipoᴋ Nâlakamit Jeremiamut, oᴋarlune:

² Imâk Nâlagaᴋ oᴋarpoᴋ uvamnut: Aklunâliorlutit nangmautisiorit ilingnut, ᴋongasingnullo ilivlugit;

³ Tilikillo Edomib ataninganut, Moabiblo ataninganut, Ammoniblo ᴋitorngangita ataninganut, Tirusiblo ataninganut, Sidoniblo ataninganut, aᴋpârtut Jerusalemut tikitut aggangitigut Zedekiamut Judab ataninganut;

⁴ Perᴋokillo oᴋarᴋovlugit angajoᴋâmingnut, oᴋarlutik: Imâk oᴋarpoᴋ Nâlagaᴋ Zebaot, Israêlib Gudinga: Imâk oᴋartuksauvose angajoᴋâpsingnut:

⁵ Uvanga nunaᴋsoaᴋ, inuillo nergjutillo nunab ᴋânganêtut pitsartunersoamnut talimnullo issaksimajomut pingortilauᴋpakka, tunivakkalo tunitjivigijomajamnut idluarijamnut.

⁶ Mânalo nunat ukkua ilûnaita tunisimavakka Nebukadnezarib, Babilonib ataningata, kivgama agganginut; ômajullo nujoartut naternamêtut tunisimagivakka tâpsomunga kivgartortuksauᴋovlugit tâpsominga.

⁷ Inôᴋatigêksuillo ilûnatik kivgartortuksauvut tâpsominga, erninganiglo, erningatalo erninganik, tâpsoma nunangata naliuninga tikerᴋârtinago; taipsomanalo tagva inôᴋatigêksuit unuktut atanersuillo kivgartortautilârput nangminermingnik tâpsomunga.

⁸ Pijoᴋalârporlo, inôᴋatigêksuit ataniovillo kivgartoromangitut Nebukadnezaremik, Babilonib ataninganik, ilijijomangitullo ᴋongasermingnik Babilonib ataningata nangmautinganut, inôᴋatigêksuit tâpkoa sugiaromavakka saviksoarmut, kângnartoᴋsoarmullo nusilingnartomullo, nungutsiᴋârtinanga tâpkoninga tâpsoma agganginut.

⁹ Ilipsele nâlaniarasigik nalautaijose, angakoselônêt, sinnaktomanerijaselônêt, ilipsingnut oᴋauseᴋartut, oᴋarlutik: Kivgartortuksaungilase Babilonib ataninganik,

¹⁰ Tâpkoa nalautaivigingmase saglonernik, nûtitauᴋovluse nunapsingnit ungasiktomut; ajaktuiᴋovlungalo ilipsingnik nungutauᴋovluselo.

¹¹ Inôᴋatigêksuille ilijijomajut ᴋongasermingnik Babilonib ataningata nangmautinganut kivgartoromavlugo, tâpkoa nunamingnêtuarᴋojomavakka, oᴋarpoᴋ Nâlagaᴋ; perorsêvilerivigilârpâllo nunagilugolo.

¹² Zedekialo, Judab ataninga, oᴋarvigivara oᴋautsit tamakkoa tamaita maliklugit, oᴋarlunga: Kongesise ilisârsigik Babilonib ataningata nangmautinganut, kivgartorlugolo, tâmnalo inuᴋotingillo, inôvluselo.

¹³ Sôᴋ toᴋojomavisê, igvit inuᴋotitillo, saviksoarmut, kângnartoᴋsoarmullo, nusilingnartomullo, sorlo Nâlagaᴋ oᴋarsimangmat inôᴋatgêksuit pivlugit kivgartoromangitut Babilonib ataninganîk?

¹⁴ Nâlaniaraselo nalautaijut oᴋausinginik, ilipsingnut oᴋartut, oᴋarlutik: Babilonib ataninganik kivgartortuksautsangilase: tâpkoa saglonernik nalautaivigingmase.

¹⁵ Uvanga tililaunginapkit, oᴋarpoᴋ Nâlagaᴋ, saglovlutigle nalautaivut attimne; ajaktuiᴋovlunga ilipsingnik, nungutauᴋovluselo, ilipselo nalautaijullo, ilipsingnut nalautaijut.

¹⁶ Taimaktauᴋ ajoᴋertuijut inuillo tamakkoa tamaita oᴋarvigilaurivakka, oᴋarlunga: Imâk oᴋarpoᴋ Nâlagaᴋ: Nâlangniarasigik nalautaijupse oᴋausingit, ilipsingnut nalautaijut, oᴋarlutik, Ahâk, Nâlakab iglungata perᴋutingit mânakut tamaungautijaujomârput Babilonemit; saglonermik nalautaivigingmase.

¹⁷ Tâpkoa nâlangniarasigik; kivgartorsiugle Babilonib ataninga, inôvluselo; soᴋ iglugasaksuit makkoa asserortaujuksauvât?

¹⁸ Nalautaijôgunigle, Nâlakablo oᴋausinga tâpkonanêkpat, tagva Nâlagaᴋ Zebaot ᴋenuvigilitsuk, perᴋutit Nâlakab iglunganêtut, Judablo ataningata iglunganêtut, Jerusalemelo amiakôjut, Babilonemut perᴋonagit.

¹⁹ Imâk oᴋarmat Nâlagaᴋ Zebaot sukkaᴋsuit pivlugit, ᴋattaujaᴋsoarlo pivlugo, ikkoggallo pivlugit, perᴋutilo amiakut iglugasaksoarne makkonane amiakôjut pivlugit,

²⁰ Nebukadnezarib, Babilonib ataningata, tigulaungitangit, Jekonia, Jojakimib erninga, Judab ataninga aularutilaungmago Jerusalemit Babilonemut, Judable Jerusalemiblo angajoᴋângit tamaita;

²¹ Ila, imâk oᴋarpoᴋ Nâlagaᴋ Zebaot, Israêlib Gudinga, perᴋutit Nâlakab iglungane Judablo ataningata iglungane Jerusalemelo amiakôjut pivlugit:

²² Babilonemut âtaujuksauvut tagvanêtuksauvullo uvloᴋ naliutiᴋârtinago tâpkoninga nalipsaiviksara, oᴋarpoᴋ Nâlagaᴋ; taipsomane tamaungautitsomavakka, utertitsomavlugillo tamaunga.