Jeremia 26 - Labrador Inuttitut Heritage Bible

¹ Jojakimib, Josiab erningata, Judab ataningata atanioningata pigiarningane, oᴋauseᴋ tamanna tikilauᴋpoᴋ Nâlakamit, oᴋarlune:

² Imâk Nâlagaᴋ oᴋarpoᴋ: Nangerit Nâlakab iglungata avalungita iluane, Judablo iglugasaksoarmiungit tamaita tuksiariartortut Nâlêkab iglunganut oᴋâlavigikit, oᴋautsinik tamainik ilingnut oᴋâlautauᴋolauᴋtamnik tâpkonunga; oᴋautsemik atautsemiglônêt ikitliniarnagit.

³ Imaᴋa tusaromalârput sâgiarlutiglo ilûnatik apᴋotigijamingnit idluitunit, idluitoᴋ piniarnilungnerijomalauᴋtara tâpkonunga piniarnerijamik idluiningat pivlugo ᴋaᴋᴋialerutigivlugo pijungnarᴋovlunga.

⁴ Oᴋautijaksarivatillo: Imâk oᴋarpoᴋ Nâlagaᴋ: Tusaromangikupsinga, arvertaromanase perᴋojamne, sâpsingnut pititamne,

⁵ Tusaromanagillo kivgama nalautaijut oᴋausingit tililauᴋtama ilipsingnut, makisaraivlunga tililugillo, tusaromalaungitasele.

⁶ Tagva iglo tamanna ilingatitsomavara sorlo Sîlo ilingangmat, iglugasaksuillo tamakkoa ôminarsitiksangortitsomavakka inôᴋatigêksoarnut tamainut nunamêtunut.

⁷ Ajoᴋertuijullo nalautaijullo inuillo ilûnatik tusarpât Jeremia oᴋautsinik makkoninga oᴋartoᴋ Nâlakab iglungane.

⁸ Pijoᴋarporlo Jeremiab oᴋâlautigijarêrmagit tamaita Nâlakab oᴋâlautauᴋojangit inungnut tamainut, ajoᴋertuijut nalautaijullo inuillo ilûnatik tigumivât, oᴋarlutik: Toᴋojuksauvotit.

⁹ Sôᴋ nalautaimavêt Nâlakab atttingane oᴋarlutit, Iglo tamanna ilingajuksaulârmat Sîlotut, iglugasaksuillo makkoa sunairutijomârmatta inuêrutjauvlutîk? Inuillo ilûnatik katimavut Jeremiamut Nâlakab iglungane.

¹⁰ Judablo angajoᴋâᴋsoangita tamakkoa tusarmagit, majorarput ataniub iglunganit Nâlakab iglunganut; ingilerpullo Nâlakab iglungata iterviata nutâb sivurâne.

¹¹ Ajoᴋertuijullo nalautaijullo oᴋarput angajoᴋâᴋsoarnut inungnullo tamainut, oᴋarlutik: Angut una toᴋotaksauvoᴋ; iglugasaksuit makkoa nalautaijutigingmagit, sorlo tusarapse siutipsingnut.

¹² Tagva Jeremia oᴋarpoᴋ angajoᴋâᴋsoarnut inungnullo tamainut, oᴋarlune: Nâlakab tililauᴋpânga nalautaiᴋovlunga oᴋautsinik tamainik tusartapsingnik iglo tamanna iglugasaksuillo makkoa pitjutigilugit.

¹³ Taimaimat mâna arvertarnise piniarniselo âᴋiksorsigik, Nâlakablo Gudipse nippinga nâlaksiuk; Nâlakablo ᴋaᴋᴋialerutigijomavait idluinerit oᴋautigilauᴋtane pivluse.

¹⁴ Uvangale, tagga aggapsingnêpunga; piniarvigisinga nâmagijapsingnik idluarijapsingniglo.

¹⁵ Kaujimaleritsele nalonangimariktomik, toᴋogupsinga auk pasijaksaungitoᴋ pitiniarapsiuk ilipsingnut iglugasaksoarnullo ukkununga inunginullo; tagva mikseᴋârtôvoᴋ Nâlakab tilisimangmanga ilipsingnut oᴋautsit tamakkoa tamaita oᴋâlautigilugit siutipsingnut perᴋovlunga.

¹⁶ Angajoᴋâᴋsuillo inuillo ilûnatik oᴋarput ajoᴋertuijunut nalautaijunullo: Angut una toᴋotaksaungilaᴋ; oᴋarvigingmatigut Nâlakab Gudipta attingane.

¹⁷ Nunamele angajoᴋaunersat ilangit nikoviput, inuillo katimajut ilûnaita oᴋarvigivait, oᴋarlutik:

¹⁸ Migga Môrasemioᴋ nalautailauᴋpoᴋ Hiskiab Judab ataningata naliuningane, Judablo inungit ilûnaita oᴋarvigilauᴋpait, oᴋarlune: Imâk oᴋarpoᴋ Nâlagaᴋ Zebaot: Zion perorsêviktut poagijartaujomârpoᴋ, Jerusalemelo ᴋiggutuinaujomârpoᴋ, iglublo oma ᴋaᴋᴋanga napârtoliksûb poᴋtoningititut.

¹⁹ Hiskiab, Judab ataningata, Judablo inungita ilûnatik toᴋolauᴋpatsûk? Nâlagaᴋ sivôragilaungilaûk, Nâlakablo saimaninga ᴋenuarilugo, Nâlakablo ᴋaᴋᴋialerutigilaungilaûk idluineᴋ oᴋautigilauᴋtane piniaromavlugo tâpkonungâ? Taimaglo tarnivut idluitulivigidlarajarpavut.

²⁰ Anguteᴋalauᴋpoᴋtauᴋ nalautaijomik Nâlakab attingane, Uria, Semaiab erninga, Kiriat Jearimioᴋ; tâpsoma iglugasaksuit makkoa nunalo manna nalautaijutigilauᴋpait Jeremiab oᴋauserijangit tamaita maliklugit;

²¹ Jojakimiblo ataniojub, pitsartujoᴋotingitalo, angajoᴋâᴋsuillo, oᴋausingit tusaramigit, ataniub toᴋonasuarpâ; Uriable tamanna tusaramiuk sivôravoᴋ, ᴋemâvlunalo, Egiptenemut aivlune;

²² Jojakimelo ataniojoᴋ tiliklilauᴋpoᴋ inungnik Egiptenemut, tamadja, Elnatanemik, Aᴋborib erninganik, angutillo ilanginik tâmna ilagivlugo;

²³ Tâpkoalo Uria aivât Egiptenemit, âlugolo Jojakimemut ataniojomut; tâpsomalo toᴋolauᴋpâ saviksoarmut, timingalo toᴋungajoᴋ egilugo inutuinait iluvinganut.

²⁴ Ahikamible, Sâfanib erningata, Jeremia serngnigivâ tunijauᴋonago inuit agganginut, toᴋotauᴋonago.