Jeremia 25 - Labrador Inuttitut Heritage Bible

¹ Tamadja oᴋautsit tikilauᴋtut Jeremiamut Judamiut tamaita pivlugit, Jojakimib, Josiab erningata, Judab ataningata jâringita sittamangane; jâre tâmnatsainauvoᴋ Nebukadnezarib, Babilonib ataningata jâringita sivorlerpângat;

² Nalautaijub Jeremiab oᴋauserilauᴋtangit Judamiunut tamainut, Jerusalemiunullo tamainut, oᴋarlune:

³ Josiab, Amonib erningata, Judab ataningata, jâringita 13inganit, uvloᴋ tamanna tikidlugo, jârit makkoa 23 nâvlugit, Nâlakab oᴋausingita tikipânga, oᴋâlavigisimavapselo makisaraivlunga oᴋarlungalo; tusaromalaungilasele.

⁴ Nâlakablo tiliklervigilauᴋpâse kivgaminik tamainik nalautaijunik, makisaraivlune tililugillo; tusarsimalungilasele, siutiselônêt manilaungilase tusaromavluse;

⁵ Oᴋarlutik: Sâgiaritse mâna ilûnase apᴋotigijapsingnit idluitunit, piniarnipselo idluininginit, nunaᴋaritselo nuname Nâlakab tunijangane ilipsingnut atâtagijapsingnullo itsarsoarmit issoᴋangitomullo;

⁶ Malingniaraselo Gudib assinginik kivgartoromavlugit opigijomavlugillo, ningarsârniarasingalo aggapse sulianginut; pikaluktitsomangilapselo.

⁷ Nâlalungilapsingale, oᴋarpoᴋ Nâlagaᴋ, ningarsâromagapsinga aggapse sulianginut idluiᴋutiksapsingnut.

⁸ Tamanna pivlugo imâk oᴋarpoᴋ Nâlagaᴋ Zebaot: Oᴋausikka tusaromalaunginapsigik,

⁹ Ahâk, tilikleromavunga ᴋitorngarêllo avanêtut ilûnaita pijartorlugit, oᴋarpoᴋ Nâlagaᴋ, Nebukadnezarelo, Babilonib ataninga, kivgara; tikiutijomavakkalo nunamut mattomunga, inunginullo, inôᴋatigêksoarnullo avatânêtunut tamainut; nungutitsomamarikpakkalo, ᴋoaᴋsângajutiksangordlugillo, mitautiksangordlugillo, serᴋomakungordlugillo soraijutomik.

¹⁰ Tâpkonangallo pêjaromavakka ᴋuviasuktut serrijullo nippingit, uiksablo nuliaksablo nippingit, serᴋalitsiviublo pervalungningit, nannergoablo ᴋaumaninga.

¹¹ Nunalo tamanna ilûnane serᴋomakungoromârpoᴋ tataminiarutiksauvlunalo; inôᴋatigêksuillo makkoa kivgartoromârput Babilonib ataninganik jârinik 70nik.

¹² Pijomârporlo jârit 70it nâmaksikpatta, sugiaromârapkit Babilonib ataninga inôᴋatigêksuillo tâpkoa, idluituliningit pivlugit, oᴋarpoᴋ Nâlagaᴋ, Kaldêamiullo nunangattauᴋ; serᴋomakungortitsomavaralo soraijuitomik.

¹³ Nunamullo tâpsomunga nalautsititsomavakka oᴋauserijakka tamaita, tâmna pivlugo oᴋauserisimajakka, ila aglangne tamakkonane aglaksimajut tamaita, Jeremiab nalautaijutigijangit inôᴋatigêksuit tamaita pivlugit.

¹⁴ Inôᴋatigêksuit unuktut atanersuillo kipalungortingmagit tâpkoa; akkiniaromavakkalo piniarningit maliklugit, aggangitalo suliangit maliklugit.

¹⁵ Imâk Nâlakab, Israêlib Gudingata, oᴋautingmanga: Kajûtaᴋ ᴋaningaumajârnima vaininganik imalik tiguguk aggamnit, inôᴋatigêksuillo tiliklervigijakka ilingnik tamaita imertikit tâpsomangat.

¹⁶ Imeromârpullo, oggôjaniarlutiglo, issumairutiniarlutiglo, saviksoaᴋ pitjutigilugo tilijomajara tâpkoa akornganut.

¹⁷ Kajûtaᴋ tagva tigulauᴋpara Nâlakab agganginit, inôᴋatigêksuillo Nâlakab uvamnik tiliklervigijangit imipakka:

¹⁸ (Imaitut): Jerusalem, Judablo iglugasaksoangit, tâpkoalo ataningit angajoᴋâᴋsoangillo, serᴋomakungortitsomavlugit, ᴋoaᴋsângajutiksangortilugillo, mitautiksautilugillo, ôminarsitiksautilugillo; sorlo uvlome ilingangmat;

¹⁹ Farao, Egiptenib ataninga, kivgangillo, angajoᴋâᴋsoangillo, inuᴋotingillo tamaita;

²⁰ Takorngartallo, nunablo Uzib ataningit tamaita, Filisterillo nunangata ataningit tamaita, Askalonalo, Gâsalo, Ekronalo, Asdodiblo amiakungit:

²¹ Edom, Moabelo, Ammoniblo ᴋitorngangit;

²² Tiriusiblo ataningit tamaita, Sidoniblo ataningit tamaita, sidjablo imarbiub akkianêtub ataningit;

²³ Dedan, Temalo, Buselo, tamaitalo umingita issunginik kipisisimajut;

²⁴ Arâbiablo ataningit tamaita, takorngartallo sunaᴋangitome nunalît ataningit tamaita;

²⁵ Simriblo ataningit tamaita, Elamiblo ataningit tamaita, Mêdenemiullo ataningit tamaita;

²⁶ Atanillo avanêtut tamaita, ᴋanitullo ᴋaningitullo, ilagêklutik; silaᴋsûblo ataniovingit tamaita, nunaᴋsoarmêtut; tâpkoalo kingorngane Sêsakib ataninga imertuksauvoᴋ.

²⁷ Oᴋautijaksarivatillo: Imâk oᴋarpoᴋ Nâlagaᴋ Zebaot, Israêlib Gudinga: Imeritse, tallavluselo, meriaritselo, pâlakluselo, makiniarungnailuse, saviksoaᴋ akunapsingnut tilijomajara pitjutigivlugo.

²⁸ Imaitsomârporlo, ᴋajûtaᴋ aggangnit tigujomangipatsuk imeromanatiglo, tagva oᴋarvigikit: Imâk oᴋarpoᴋ Nâlagaᴋ Zebaot: Iminginiattsangilase.

²⁹ Tagva ahâk, iglugasaksoarne attimnut taijaujune pidlarniᴋarpunga, ilipselo pidlartaungituksauvisê?

³⁰ Taimaimat oᴋautsit tamakkoa tamaita nalautaitigikit tâpkonunga, oᴋarvigikillo: Nâlagaᴋ ᴋotsiktomit ᴋallingoaromârpoᴋ, inniminillo ivlernartomit nippine anititsomârpâ; ᴋallingoadlaromârpoᴋ sôngojomik nerrinasugviminut; ᴋuggudlaromârpoᴋ vaineliksab paunganginik tullerajartutitut silaᴋsoarmiunut tamainut.

³¹ Pervalungneᴋ tikilârpoᴋ silaᴋsûb issuanut; Nâlagaᴋ akkerartûtiksaᴋarmat inôᴋatigêksoarnut, uvinilit tamaita erᴋartoromârpait; idluitut tunijomârpait saviksoarmut, oᴋarpoᴋ Nâlagaᴋ.

³² Imâk oᴋarpoᴋ Nâlagaᴋ Zebaot: Ahâk, idluitoᴋ anijomârpoᴋ inôᴋatigêksoarnit inôᴋatigêksoarnut, aᴋᴋunaᴋsoarlo pitorartitaujomârpoᴋ nunanit issuklerpânit.

³³ Nâlakablo toᴋotangit naliutome tâpsomane nallajomârput nunab kiglinganit nunab kiglinganut aipânut; oggorijauniangilat, katersortauniangilallo, iluvertauniangilallo; aᴋtarnerlukkôjomârpulle nunab ᴋângane.

³⁴ Keadlaritse, pairᴋsijôjose, nipliadlarluselo; argjane aksapalloaritse, ilipse aulatsijose saukanik; uvluksase nâmaksikpatta toᴋotauᴋovluse, serᴋomitsomagapse oggojomârposelo iluleᴋutitut pivianartotut.

³⁵ Pairᴋsijullo ᴋemâviksaᴋarniatsangilat, aulatsijullo saukanik anigorviksaᴋaratik.

³⁶ Pairᴋsijut ᴋuggudlarningita nippingat, saukaniglo aulatsijut ᴋeaningat! Nâlakab nerrinasugviksangat asserormago.

³⁷ Pairᴋsivîllo ulapitauvionalungitut nippeᴋarungnairput, Nâlakab ningaumajârninga ilungertortoᴋ pitjutigilugo.

³⁸ Ijersimavigijane ᴋemakpâ loevetut; nunangat tataminiarutiksangorsimangmat saviksûb oᴋumaiksartitsijub ilungertorninga pivlugo, tâpsomalo ningaumajârninga ilungertortoᴋ pivlugo.