Jeremia 23 - Labrador Inuttitut Heritage Bible

¹ Kapianarmek pairᴋsijut asseroijut siamartitsijullo saugaᴋutimnik nerrinasuktunik! oᴋarpoᴋ Nâlagaᴋ.

² Tamanna pivlugo imâk oᴋarpoᴋ Nâlagaᴋ, Israêlib Gudinga, pairᴋsijut nerripkaijut inuᴋotimnik pivlugit: Siamartilauᴋpase saugaᴋotikka, ᴋemâtilugillo, takojartornagillo; ahâk, piniarnipse idluiningit akkiniarutigijomavakka ilipsingnut, oᴋarpoᴋ Nâlagaᴋ.

³ Uvangalo saugaᴋotima amiakungit katersoromavakka nunanit tamainit ajaktortauvigijanginit uvamnut, utertitsomalerivakkalo pairijauvigilauᴋtanginut; kinguvâktâᴋattalârpullo unuksivaliavlutiglo.

⁴ Pairᴋsijuksaniglo tâpkonunga ilijijomavunga pairᴋsilârtunik tâpkoninga; kingornganalo sivôrajungnairomârput ᴋoaᴋsârungnairlutiglo kingomajaujoᴋalulângilarlo, oᴋarpoᴋ Nâlagaᴋ.

⁵ Ahâk, uvlut naliutijomârput, oᴋarpoᴋ Nâlagaᴋ, tagva Dâvidemut makititsijomârama nutaijoᴋtomik idluartomik, tâmnalo nâlagauvlune ataniojomârpoᴋ silatudlartomik piniarlune, erᴋartuitsiaromârporlo idluarsaitsiarlunalo nuname.

⁶ Tâpsoma uvlungane Juda piulijaujomârpoᴋ, Israêlelo terliklune nunaᴋaromârpoᴋ, tamannalo attinga atserartautiginiartanga: Nâlagaᴋ idluarsijutigijavut.

⁷ Taimaimat, ahâk, naliutsomârpoᴋ, Nâlagaᴋ oᴋarpoᴋ, oᴋartoᴋarungnairomârmat: Sorlo Nâlagaᴋ inôngmat, tikiutjilauᴋtoᴋ Israelib ᴋitornganginik nunamit Egiptenemit;

⁸ Imâgle: Sorlo Nâlagaᴋ inôngmat, tikiutjilauᴋtoᴋ Israêlib ᴋitornganginik nunamit taggânêtomit, nunanillo tamainit ᴋemâviotitamnit tâpkonunga; nunaᴋaromârpullo nunamingne.

⁹ Nalautaijut pivlugit ômatiga ilumne serᴋomisimavoᴋ, saunikkalo ilûnatik sajukput; angutitut talasimajotun-ipunga, angutitut vainemut talatotut; Nâlagaᴋ pitjutigilugo, tâpsomalo oᴋausingit ivlernartut pitjutigivlugit.

¹⁰ Nuna tattadlarmat assiniartunut, oᴋauseludlarneᴋ pitjutigivlugo nuna ogguarpoᴋ; inuᴋajuitub nerrinasugvingit ipterilikput; inuit ilusingit idluiput, pitsartuningillo piungilat.

¹¹ Tagva nalautaijut ajoᴋertuijullo nalangaidlarput; ila, iglumne nagvârlauᴋpunga idluininginik, oᴋarpoᴋ Nâlagaᴋ.

¹² Tamanna pivlugo apᴋotingat siargitârnartotut pisuktomut tâᴋtome ilinganiarpoᴋ; ungortaulârput okpikâlutiglo tagvane; idluitomik tikiutjijomagama tâpkonunga, nalipsartauningita jâringane, oᴋarpoᴋ Nâlagaᴋ.

¹³ Silainermiglo takosimavunga nalautaijune Samâriame; nalautailauᴋput Baalib attingane, inuᴋotikka Israêlikut tamartidlarlugit.

¹⁴ Maᴋojungnartomiglo takosimagivunga nalautaijune Jerusaleme; assiniarput, arvertarpullo saglonerme, idluitulijullo aggangit pitsartutipait, sâgiartoᴋarᴋonago idluitulinerminit; uvamnut ilûnatik Sodomatut iput, inungillo Gomorratut iput.

¹⁵ Taimaimat imâk oᴋarpoᴋ Nâlagaᴋ Zebaot nalautaijut pivlugit: Ahâk, mamaitoᴋsoarmik nerrititsomavakka, imertilugillo sungarmik; nalautaijunit Jerusalemêtunit takkormôrnek anisimangmat nunamut ilûnânut.

¹⁶ Imâk oᴋarpoᴋ Nâlagaᴋ Zebaot: Nâlaniarase nalautaijut oᴋausinginik, nalautaijut ilipsingnut; sulingitunik ajoᴋertorpâse; ômatimik takotitjutingit oᴋâlatigingmatigik, Nâlakablo ᴋaninganit pijut pinagit.

¹⁷ Naggojut uvamnik oᴋautiᴋattarpait: Nâlagaᴋ oᴋarsimavoᴋ: Ulapirᴋsauteᴋarniarpose: arvertartunullo tamainut ômatimik mangaitisimaningit maliklugit oᴋarput: Idluitub tikiniangilâse.

¹⁸ Kina nangilauᴋsimangmât Nâlakab kajusimaningane, kangêsuklune tusarlunalo oᴋausinginîk? Kina naipertorsimava oᴋausinginik, tusâlugillô?

¹⁹ Ahâk, Nâlakab aᴋᴋunaᴋsoanga, ila, ᴋaningaumajârninga, anisimavoᴋ, ila, ullajujaᴋsoaᴋ; ᴋâgomârpoᴋ idluitulijut niaᴋunginut.

²⁰ Nâlakab ningaumajârninga uterniatsangilaᴋ piniarsimaᴋârtinago nâmaksititsisimaᴋârtinagolo ômatime kajusimanerijanginik; uvluksane kingorliojune tamanna tukisilârpase nâmaktomik.

²¹ Nalautaijut ukkua tililaungilakka, aᴋpasulauᴋpulle; oᴋarvigilaungilakka, nalautailauᴋpulle.

²² Nangilaurunigle kajusimavimne, inuᴋotikka tusartinajalauᴋpait oᴋausimnik, sâgiartinajarpaillo apᴋutigijanginit idluitunit, piniarnerijangitalo idluininginit.

²³ Kanitome Gudeovêk, oᴋarpoᴋ Nâlagaᴋ, ungasiktomelo Gudeonangâ?

²⁴ Inuk ijertorviksarsijungnarᴋâ uvanga takonianginapkô? oᴋarpoᴋ Nâlagaᴋ. Nâjimalungilangâ ᴋilangmik nunamiglô? oᴋarpoᴋ Nâlagaᴋ.

²⁵ Tusarsimavunga nalautaijut oᴋausinginik, saglovlutik nalautaijut attimne, oᴋarlutik: Sinnaktomalauᴋpunga, sinnaktomalauᴋpunga.

²⁶ Kanoᴋ sivitutigijomik tamanna ômamiutariniarpatsûk nalautaijut, saglonernik nalautaijut, ila, ômatimik uivêrijutigijanginik nalautaijuteᴋartût?

²⁷ Issumaᴋartut inuᴋotikka puigortitsomavlugit attimnik sinnaktomanermingnut unipkâᴋattigêgutigijamingnut, sorlo atâtangita attera puigolaungmatsuk Baal pivlugo.

²⁸ Nalautaijoᴋ sinnaktomanelik unipkârle sinnaktomanerijaminik; oᴋausimniglo piᴋartoᴋ, nalâgôrlune oᴋausera oᴋautigiliuk. Iviksukat suksauvât sanaugaksat sanianê? oᴋarpoᴋ Nâlagaᴋ.

²⁹ Oᴋausikka ikomatun ilungilât? oᴋarpoᴋ Nâlagaᴋ, ujaratsiartullo ᴋairtomik serᴋalitsijotun ingilât?

³⁰ Tamanna pivlugo sângavakka nalautaijut, oᴋarpoᴋ Nâlagaᴋ, aᴋsârniktut oᴋausimnik ilangata sannilianit.

³¹ Sângavakka, oᴋarpoᴋ Nâlagaᴋ, nalautaijut oᴋamingnik atortut, oᴋarlutiglo: Oᴋarpoᴋ.

³² Sângavakka ipkoa sinnaktomanernik saglonernik nalautaijut, oᴋarpoᴋ Nâlagaᴋ, tamakkoningalo unipkauteᴋarlutik, tamartitsilutiglo inuᴋotimnik saglonermingnut nertûtinermingnullo tangeᴋangitunut; uvangale tililaungilakka perᴋolaungilakkalônêt; idluarᴋutauniangilallônêt inungnut ukkununga, oᴋarpoᴋ Nâlagaᴋ.

³³ Inuillo ukkua, nalautaijûblônêt ajoᴋertuijûblônêt aperikpatit, oᴋarlutik: Sunauvâ Nâlakab inerterijutauᴋojanga? tagva oᴋarvigijaksarivatit: Inerterijutauᴋojanga imaipoᴋ: Allaromavapse, oᴋarpoᴋ Nâlagaᴋ.

³⁴ Nalautaijorle, ajoᴋertuijorlo, inuillo oᴋartut: Nâlekab Nâlekab inerterijutauᴋojanganik! Inuk taimna iglomioᴋatingillo sugiaromavakka.

³⁵ Imâk oᴋartuksauvose naliat assiminut, naliallo ᴋatangutiminut, Sumik Nâlagaᴋ kiovâ? imâglo: Sumik Nâlagaᴋ oᴋarᴋâ?

³⁶ Nâlakablo inerterijutauᴋojanga tainiarungnaipase; naliata oᴋausine inerterijutiginiarmago; Gudib ômajub, Gudipta Nâlakab Zebaotib oᴋausingit mumiksimagapsigik.

³⁷ Imâk oᴋartuksauvotit nalautaijomut: Sumik Nâlakab kiovâtît? imâglo: Sumik Nâlagaᴋ oᴋarᴋâ?

³⁸ Oᴋarupsele: Nâlakab inerterijutauᴋojanganik! tamanna pivlugo imâk oᴋarpoᴋ Nâlagaᴋ: Oᴋauseᴋ tâmna oᴋauserigapsiuk: Nâlakab inerterijutauᴋojanganik, tiliklervigilaurapselo oᴋarlunga: Oᴋartuksaungilase: Nâlakab inerterijutauᴋojanganik;

³⁹ Tamanna pivlugo, ahâk, puigoromamarikpapse; ilipselo iglugasaksuillo tunilauᴋtakka ilipsingnut atâtapsingnullo ajaktoromavapse najukamnit;

⁴⁰ Tikiutjijomavungalo ilipsingnut naggonartiksamik issoᴋarniangitomut, kangusûtiksamiglo sorainiangitomik puigortauniatsangitomik.