Jeremia 22 - Labrador Inuttitut Heritage Bible

¹ Imak oᴋarpoᴋ Nâlagaᴋ: Atersârit Judab ataningata iglunganut, tagvanalo oᴋauseᴋ tamanna oᴋautigileruk:

² Oᴋarlutillo: Tusaruk Nâlakab oᴋausinga, igvit ataniojotit Judame, iksivajotit Dâvidib iksivautaksoangane, igvit, kivgatillo, inuᴋotitillo iterpaktut itertarviksoatigut ukkutiguna.

³ Imâk oᴋarpoᴋ Nâlagaᴋ: Nâmaktomik erᴋartuileritse idluarsailuselo, oᴋumaiksartitaujorlo piulisiuk oᴋumaiksartitsijub agganginit; idluituliniaraselo, aksorornermiglo atorniarase, tujormianullônêt, iliarsunullônêt, uigarnernullônêt, kovisiniaraselo aungmik pasijaksaungitomik nuname tamattomane.

⁴ Taimailiorniarupse nalâgut, iglub tamattoma upkoangitigut itertoᴋaromârpoᴋ atanernik iksivajunik Dâvidib iksivautaᴋsoangane, ikimavlutiglo ᴋamutine aksaloalingne, ablangalutiglo horsine, tâmna kivgangillo inuᴋotingillo.

⁵ Oᴋautsille tamakkoa tusaromangikupsigik, angermarikpunga uvamne, oᴋarpoᴋ Nâlagaᴋ, iglo tamanna asserortaudlaromârmat.

⁶ Imâk Nâlagaᴋ oᴋarmat Judab ataningata inungit pivlugit: Gileadetut Libanoniblo ᴋângatut ilingavose uvamnut; nalonangitomigle sunaᴋajuitungortitsomavagit, iglugasaksoangortitsomavlutillo inuᴋarungnaitunik.

⁷ Atuinaruterijomavungalo asseroijuksanik ilipsingnik, ilûnatik sakkolijarlutik; tâpkoalo nakkatsijomârput napârtoᴋotingnik Sêdarenik piojunik, êgilugillo ikomamut.

⁸ Inôᴋatigêksuillo unuktut apᴋusâromârput iglugasaksoarnut ukkununga, ilûnatiglo ilamingnut oᴋaromârput: Suna pivlugo Nâlakab iglugasaksuit makkoa taimailiorvigilaukagît?

⁹ Kiojomârpullo: Kemailaungmatta angeᴋatigêngnerijamingnik Nâlakamut Gudemingnut, Gudiblo assinginik tuksiarviᴋalaungmatta kivgartorlugillo.

¹⁰ Tokungajok ᴋeaniarasiuk, kiksautiginiarasiuglônêt; aulartorle ᴋeagidlarsiuk; uterniatsangimat, nunalônêt inûlervigijane takoniarungnailugo.

¹¹ Imâk Nâlagaᴋ oᴋarmat Sallum pivlugo, Josiab erninga, Judab ataninga, atâtame Josiab kingorngane ataniolauᴋtoᴋ, aulalauᴋtorlo tamângat: Tamaunga uterniarungnaipoᴋ.

¹² Aularutijauvingminele toᴋojuksauvoᴋ, nunalo tamanna takoniarungnailugo.

¹³ Kapianarmêk igluksaminik igloliortoᴋ idluartomungitoᴋ, iglutsiaksaminiglo idluitulinermut; inôᴋatiminik sanaᴋojijoᴋ akkilernagolo, tunidjivigitaililugolo akkiliusiaksarijanganik;

¹⁴ Oᴋartoᴋ: Iglolioromavunga igluksamnik nerrotojomik, iglutsiaksaniglo igvidliornangitomik; igalâksanganiglo sanatitsivoᴋ, ᴋejutsiamiglo Sêdaremik ilupâksaᴋartilugit mingoarlugillo aupaluktamut.

¹⁵ Atanioniarasugivêt Sêdarenik pinnarnarsauteᴋaravît? Atâtait nerrilaungilâᴋ imilunalo, erᴋartuitsiarlunalo idluarsaitsiarlarmelô? Taipsomanalo ᴋanoengitsialauᴋpoᴋ.

¹⁶ Idluarsailauᴋpoᴋ aklujut ajoᴋsartullo pitjutinginik; ᴋanoengitsialauᴋporlo. Tamanna ilitarᴋsiniolungilâᴋ uvamnîk? Nâlagaᴋ oᴋarpoᴋ.

¹⁷ Ijîkigle ômatillo ilingatuinarput pijomatudlarnermut, kovisinermullo aungmik pasijaksaungitomik, oᴋumaiksartitsinermullo, aksorotjinermullo, taimaitut suliarijomavlugit.

¹⁸ Taimaimat imâk Nâlagaᴋ oᴋarpoᴋ Jojakim, Josiab erninga Judab ataninga, pivlugo: Oggoriniatsangilât oᴋarlutik: Amêk, ᴋatangutiga! imâglônêt: Amêk, najara! Oggoriniatsangilât oᴋarlutik: Amêk, nâlagara! imâglônêt: Amêk, opinarninga!

¹⁹ Siutiᴋortojotut iluvertaulârpoᴋ, uniartauvlune egitauvlunalo Jerusalemib itertarvingita silatânut.

²⁰ Majorarit Libanonemut, ᴋuggudlarillo, ᴋaigarsudlarillo Bâsaneme: ᴋoguadlarillo Abârimit; nagligijitit ilûnatik asserortaungmatta.

²¹ Oᴋarvigilauᴋpagit piloringnerme; kiolauᴋpotille: Tusaromangilanga. Taimailiutsainarpotit inôsungnernit, nippiga nâlagomanginangne.

²² Anorib pairijitit tamaita nungujomârpait, ungagijitillo aularutijaujomârput kipalônermut; taipsomane tagva kangusuktitauniarpotit ilerasuktitauniarlutillo idluitulinitit tamaita pitjutigilugit.

²³ Libanoneme inneᴋartotit, Sêdarene ubloliortotit, nâpkinarsijomârpotit ânilakteradlarnernut tikitauguvit, ernisuktotut ânialeruvit!

²⁴ Sorlo mikseᴋartomik inôgama, oᴋarpoᴋ Nâlagaᴋ, Kônia, Jojakimib erninga Judab ataninga, ᴋetterdlermigigaloarupko naᴋitjutauvlune aggangma talerpingane, pêjarajarpagit tagvangat;

²⁵ Tunijomavlutillo inôsernik pinasuartut agganginut, sivôragijavîllo agganginut, ila, Nebukadnezarib, Babilonib ataningata, agganginut, Kaldêamiullo agganginut.

²⁶ Pingujaromavaptiglo igvit anânaillo ernilauᴋtoᴋ ilingnik nunamut oma assianut inûlervigilaungitaptingnut; taikanalo toᴋojuksauvotik.

²⁷ Nunamulle tarnimik kajungervigijanganut utertuksauniatsangilak.

²⁸ Angut taimna Kônia iluleᴋuteovâ suksaungitoᴋ serᴋomisimajôᴋ? Iluleᴋuteovâ ᴋuviagijaungitôᴋ? Suna pivlugo pingujartauvât, tâmna kinguvângillo, egitauvlutiglo nunamut ilitarilaungitamingnût?

²⁹ Nuna, nuna, nuna, Nâlakab oᴋausinga tusaruk.

³⁰ Imâk oᴋarpoᴋ Nâlagaᴋ, Angut una aglaksiuk ᴋitorngaᴋangitomik, angumik piloringniatsangitomik inôsine nâvlugo; kinguvângine piloriktoᴋarniatsangimat iksivajomik Dâvidib iksivautaᴋsoangane aulatsilunalo Judame.