Jeremia 21 - Labrador Inuttitut Heritage Bible

¹ Okausek tikilauᴋtoᴋ Jeremiamut Nâlakamit, ataniub Zedekiab Pasur, Malkiab erninga, Zefanialo, Massiab ajoᴋertuijub erninga, tilingmagik tâpsomunga, oᴋarlutik:

² Nâlagaᴋ apertsulauruktôᴋ pivluta; Nebukadnezarib, ataniojub Babiloneme, unatarvigijartormatigut; imaᴋa Nâlakab piniarvigilârpâtigut tatamnartulinerivaktane maliklugit, aularmiᴋovlugo uvaptingnit.

³ Jeremiablo oᴋautivait: Imâk Zedekia oᴋautijaksari vatik:

⁴ Imâk oᴋarpoᴋ Nâlagaᴋ, Israêlib Gudinga, Ahâk, sakkut unatautiksat aggapsingnêtut, unatautigijomajase Babilonib ataninganut Kaldêamiunullo ilumajipsingnut avaloᴋsuit silatâne utertitsomavakka, katersoromavakkalo iglugasaksuit ukkua ᴋerᴋane.

⁵ Uvangalo nangmineᴋ unatarvigijomavapse agganut issângajunut talermullo pitsartujomut, ila, ningârnerme, ᴋaningaumajârnermelo, ilungertudlarnermelo.

⁶ Iglugasaksuillo ukkua inungit annauleromavakka, inuillo nergjutillo; toᴋojuksauvut nusilingnartomut angijomut.

⁷ Kingornganalo, oᴋarpoᴋ Nâlagaᴋ, Zedekia Judab ataninga, kivgangillo, inuillo, amiakôjut nusilingnartomit, saviksoarmillo, kângnartoᴋsoarmillo, tunijomavakka Nebukadnezarib Babilonib ataningata agganginut, ômigijimiglo agganginut, inôsinginiglo pinasuartut agganginut; tâpsomalo annaulârpait saviksûb kênanganut; nikaginiangilait, naiperᴋutiginagillônêt.

⁸ Inugasaksuillo makkoa oᴋautikit: Imâk oᴋarpoᴋ Nâlagaᴋ: Ahâk, unertutjivigivapse apᴋomik inôtsemut apᴋomiglo toᴋomut.

⁹ Iglugasaksoarne ukkunane noᴋangajut toᴋojuksauvut saviksoarmut, kângnartoᴋsoarmullo, nusilingnartomullo; anijorle ilauniarlunalo Kaldêamiunut ilumajipsingnut, inôlârpoᴋ, inôsinalo aᴋsârnigaujotut piksariniarpâ.

¹⁰ Kênara sangutisimagapko iglugasaksoarnut makkonunga kapiasuktitsomavlugit, idluartulivigijomavlugi-ungitoᴋ, Nâlagaᴋ oᴋarpoᴋ; tunijaujuksaungmatta Babilonib ataningata agganginut, tâpsomalo ikilârpait ikomamut.

¹¹ Judablo ataningata kinguvângit pitjutigivlugit, Nâlakab oᴋausinga tusarsiuk:

¹² Ilipse, Dâvidib kinguvângit, imâk oᴋarpoᴋ Nâlagaᴋ, Idluarsaileritse uvlângoningane, oᴋumaiksartitaujorlo piulisiuk oᴋumaiksartitsijub agganginit, ᴋaningaumajârnera aniᴋonago ikomatut, ikoâlaniarlune ᴋamitaujungnarungnailune, piniarnerijase idluitut pivlugit.

¹³ Ahâk, akkerartorpapse, naᴋsamiojose, naternaublo ᴋairtunganêtose, oᴋarpoᴋ Nâlagaᴋ; oᴋartose: Kina atersârungnarᴋâ uvaptingnût? Kinalônêt itârungnarᴋâ igluptingnût?

¹⁴ Sugiaromavapselo piniarnipse saᴋᴋertangit maliklugit, oᴋarpoᴋ Nâlagaᴋ; ikitsijomavungalo ikomamik napârtungine, nungutsijomârporlo tamainik avatânêtunik.