Jeremia 20 - Labrador Inuttitut Heritage Bible

¹ Pasurible, Immerib ajoᴋertuijub erningata, angajoᴋângortitaujub Nâlakab iglungane, Jeremia nalautaivlune tamakkoninga, tusarpâ.

² Pasuriblo Jeremia nalautaijoᴋ annauvâ, parngnanairsorpâlo ᴋejuksoarnut parngnanairsûtinut, Benjaminib iterviksoanganêtunut ᴋolerme, Nâlakab iglunganêtome.

³ Uvlublo aipangane ᴋaungmat, Pasurib Jeremia parngnanairudjârpâ ᴋejuksoarnit parngnanairsûtinit. Jeremiablo oᴋautivâ: Nâlakab atseralungilâtit Pasuremik, imâgle: Magormissabimik.

⁴ Imâk Nâlagaᴋ oᴋarmat: Ahâk, kapiasûtiksautitsomavagit ilingnullo ilanârijarnullo tamainut; tâpkoa oggojomârput ômigijimik saviksoanginut, ijîkpîllo takojomârpâk tamanna; Judalo iluêngarlugo tunijomârpara Babilonib ataningata agganginut, tâpsomalo aularutijomârpait Babilonemut, toᴋolugillo saviksoarmut.

⁵ Iglugasaksuillo makkoa akluiningit tamaita, akkiliusiarijangillo tamaita, pivianartoᴋutingillo tamaita, tunijomavakka, ila, Judab ataningita ivlernartoᴋutingit tamaita tunijomavakka ômigijingita agganginut, sujuksaijomârtunut tâpkoninga, tigûllalugillo aularutilugillo Babilonemut.

⁶ Igvillo Pasur, iglomioᴋatitillo ilûnaita aularutijaujuksauvose kipalônermut; tikiutijuksauvotillo Babilonemut, tagvanalo toᴋolârpotit, tagvanalo iluvertaulârpotit, ilatillo ilûnatik, saglovlutit nalautaivigilauᴋtatit.

⁷ Nâlagak, kajungersâlauᴋparma, kajungersârtaulauᴋpungalo; sôngonersauvotit uvamnit, sâlaᴋarpotillo; ijoralautiksangorsimavunga uvloᴋ nâvlugo, ilûnatik mitautigivânga.

⁸ Oᴋarangama, ᴋuggudlarpunga; ᴋuggudlarpunga: Oᴋumaiksartitsinermik aᴋsârningnermiglo; Nâlakab oᴋausinga mitautiksangortitaungmat uvamnut, alêkutiksangortitaularmelo uvloᴋ nâvlugo.

⁹ Oᴋarumalo: Taijomairpara tâva, oᴋaromairpunga tâpsoma attingane; tagva ômatimnêtoᴋalerpoᴋ sorlo ikomaujârtomik ikoâlajomik palangairsimajojârtomik saunimne; merngortudlarpunga oᴋartailinimnut sapilidlarlungalo.

¹⁰ Tusarsimagama unuktut oᴋarnerludjininginik, ᴋoaᴋsârtitsijoᴋarpoᴋ avatimne ilûnâne. Pasidlarsiuk, pasijomadlarpavullo, oᴋarput ilanârijakka ilûnatik, kamajut sanguniarmangârma; imaᴋa uerisartaulârpoᴋ, uvagullo sâlagilârpavut taima, akkiniarvigilugolo.

¹¹ Nâlakable najorpânga, pitsartudlartotut sivôranartotullo; taimaimallo unangmijikka apolârput; sâlaᴋarniangilallo; kangusudlaromârput angijomik silatujomik pinialaunginamik, kangusungnermut sorainiangitomut puigortauniangitomut.

¹² Nâlagarle Zebaot, idluartunik nautsertorteojotit, taᴋtuniglo ômateniglo tautuktotit, akkiniarnît tâpkoninga takolago; ilinganerijara nalonaijarsimagapko ilingnut.

¹³ Nâlagaᴋ imgervigisiuk, Nâlagaᴋ nertorsiuk; tâpsoma patangajub tarninga piulingmago idluitulijut agganginit.

¹⁴ Uvlok inûlervigilauᴋtara ôminarsile; uvloᴋ anânama ernivigilauᴋtanga uvamnik saimanarnerartauniarane.

¹⁵ Ominarsile inuk atâtamnik oᴋautjijartulauᴋtoᴋ: Angutearsungmik inûliudjauvotit; ᴋuviasuktitsilune tâpsominga.

¹⁶ Inuk tâmna ilingale iglugasaksoatitut Nâlakab asserortangititut takopsoagilaungitangititut; tusarle ᴋuggudlarnermik uvlâkut, ᴋangêsarinermiglo uvlub ᴋeterarningane;

¹⁷ Toᴋolaungimanga igliarmêtilunga, anânaga iluverviksauᴋovlugo uvamnut, igliangalo singaijautsainarᴋovlugo.

¹⁸ Sôᴋ anilauᴋingâ igliamit siorniornermik kiksarnermiglo takoᴋovlunga, uvlukkalo nâjauᴋovlugit kangusungnermê?