Jeremia 2 - Labrador Inuttitut Heritage Bible

¹ Nalekablo oᴋausingata tikipânga, oᴋarlune:

² Ailerit ᴋuggudlartutillo Jerusalemiut siutinginut, oᴋarlutit: Imâk Nâlagaᴋ oᴋarpoᴋ: Pivlutit erᴋaumavunga inôsungnivît ilianâᴋarninganik, unganerniglo nuliaksaulauravit; malilauramga inuᴋajuitome, nuname perorsijaksanik karngasoiviolaungitome.

³ Israêle ivsornaitoᴋutaulauᴋpoᴋ Nâlakamut, perorsijaᴋotingita innerᴋârtungit; nungûtsijut tâpkoninga passijaksaulârput, tikitaulârput ogguarnartomut, Nâlagaᴋ oᴋarpoᴋ.

⁴ Tusaritse Nâlakab oᴋausinginik, ilipse Jâkob ᴋitorngarêngit Israêliblo kinguvârêngit.

⁵ Imâk Nâlagaᴋ oᴋarpoᴋ: Sumik idlaungitomik atâtagilauᴋtase nagvâlauᴋât uvamne ungasidlarmatta, sunaungitullo ungagidlarlugit, piojoridlarlutiglô?

⁶ Oᴋangilallônêt: Nanekâ Nâlagaᴋ takpaungartilauᴋtivut nunamit Egiptenemît? Tassiortivut sunaᴋajuitokut, nunakut inuᴋajuitokut itersâluᴋadlartokût? Nunakut ipterilingajokut toᴋublo taggalininganik pitalikkut, nunakut inungmut arvertarviovangitokut nunaksaungitokullô?

⁷ Uvangale tikiutilauᴋpapse nunatsiariktomut, nerriᴋovluse perortunginik perᴋutinginiglo; iterapsele nunaᴋutiga ivsornartilauᴋpase, kingormgutijaksaralo maᴋojungnartilauᴋpase.

⁸ Ajoᴋertuijut aperilaungilat: Nâlagaᴋ nanêᴋâ? perᴋojaniglo ilisimajut ilitarilaungilânga; pairᴋsijut tunulauᴋpânga, nalautaijullo nalautailauᴋput Baalekut, malikpullo idluarᴋutaungitunik.

⁹ Tamanna pivlugo kajungersârasuaromavapse sulle, ᴋitorngapselo ᴋitorngangit kajungersârasuaromagivakka.

¹⁰ Ikâritse ᴋikertanut Kittimemik attelingnut, takonârluselo; tilikleritse Kêdaremut, ataruilivluselo kamatsiaritse; nautsertoritselo taimaitoᴋalauᴋsimamangât.

¹¹ Inôᴋatigêksuit tauᴋsêlauᴋsimavât gudingoamingnik gudeolungikaloartunîk? Inuᴋotimale opigijaksarijatik ânanaujoᴋ tauᴋsiutisimavât idluarᴋutiksaungitunut.

¹² ᴋilait ilipse, tataminiaritse tamattominga, ᴋoaᴋsâritse sajudlarluselo, Nâlagaᴋ oᴋarpoᴋ.

¹³ Inuᴋotikka maggungnik idluitulisimangmatta; ᴋemakpânga uvanga puailaviojunga ômanartomik imalingmik, sanavlutiglo imeᴋarviksanik, imeᴋarviksanik piotsangitunik imeᴋarungnangitunik.

¹⁴ Israêle kivgauvâ? Kipalokullutuinauvâ? Suna pivlugo aᴋsârnigaksangorsimavâ?

¹⁵ Loeviarait ᴋallingoarput tâpsomunga, ᴋuggudlarpullo; nunangallo asserorpât; iglugasaksoangit nungutauvut ikomamut, inuᴋarungnailutik.

¹⁶ Nôfib Takpanêsiblo ᴋitorngangita kabjit serᴋomipât.

¹⁷ Tamanna pitilaungipiûk nangminernût, Nâlagaᴋ Gudit ᴋemakangne tasiornigomajoᴋ ilingnik apᴋomê?

¹⁸ Mânalo sivêt tamâne apᴋosinerme Egiptenemut, Sihorib imangit imeromavlugît? Suvêllônêt tamâne apᴋosinerme Assiriamut, Farâtib imangit imeromavlugît?

¹⁹ Idluitulinivît sugialârpâtit, kingupiartornivîllo inertilârpâtit. Taimaimat ᴋaujimalerit tukkisilutillo idluitoᴋsôdlarmat kiksarnarlarmelo Nâlagaᴋ Gudît ᴋemakangne, sivôranarneralo ilingnêngimat, Nâlagaᴋ Nâlagak Zebaot oᴋarpoᴋ.

²⁰ Itsarsoarmit nangmautat serᴋomiᴋattarangne ᴋelarutillo kiktorarlugit; oᴋarpotillo: Kivgartoromangilanga; ᴋaᴋᴋane poᴋtojune tamaine, napârtullo tungujortut ilûnatik atâne ukuᴋattalauᴋpotit assiniarᴋattarlutillo.

²¹ Uvangale ililauᴋpagit napârtôᴋovlutit vaineliksaᴋ idluartoᴋ, karngasûteoᴋovlutit nâmamariktoᴋ; ᴋanoᴋ tagva ablatsângorsimanerᴋêt, perornerluktungorlutit vaineliksamik takorngartamik uvamnût?

²² Ubvaralloaruville ilingnik ergortûmut, ubvaumiglo angijomik atoralloaruvit, idluitoᴋsônît saᴋijâdlarpoᴋ sulle sâmne, Nâlagaᴋ Gude oᴋarpoᴋ.

²³ ᴋanoᴋ oᴋarungnarᴋêt: Ivjornalungilanga, ungalulaungilanga Baalemût? Iluserilauᴋtatit naᴋsarme ᴋemergolerkit, ᴋaujimalerit piniarnerilauᴋtarnik; kamêliarauvotit sukalijoᴋ maliᴋatângojârlutit;

²⁴ Siuteᴋortojôvotit nujoartoᴋ sungiusimajoᴋ inuᴋajuitomik, anorimut narriomasijârtoᴋ; piviksarsinermine kia sangutitsungnarᴋaûk? Kenertut tâpsominga merngortoriaᴋangilat, taᴋᴋeᴋotingane nagvâlârmatsuk.

²⁵ Itikatit kammêrutijautailitikit, igiallo ᴋêdlartailitiuk; oᴋarpotille: Ila, ajornarpoᴋ; takorngartat ikligivakka, tâpkoalo udlagomavakka.

²⁶ Sorlo tigliktoᴋ kangusungmat nagvârtaugame, taimak Israêlib ᴋitorngangit kangusudlarivut; tâpkoa ataningillo, aulatsijingillo, ajoᴋertuijingillo, nalautaijingillo;

²⁷ Oᴋartut ᴋejungmut: Atâtagivagit; ujarᴋamullo: Ernerivarma; taipkoa tunupânga sâvigingilângalo; kapiasungnermiglo naliuningane oᴋaromârput: Nikovilaurit piulilutillo.

²⁸ Gudingoaᴋotitillo sanaluᴋatit nanêkât? Tâpkoa nikovilit piulijungnarpatit kapiasungnivît naliuningane, tagva iglugasaksoaᴋotivit unurningit maliklugit taimak unuktigivut gudingoaᴋotitit, Juda.

²⁹ Suna pivlugo ᴋenuvigivisingâ? Ilûnase idluitulivigilauᴋpapsinga, oᴋarpoᴋ Nâlagaᴋ.

³⁰ Sulingitomik ᴋitorngase annausimavakka, nâlalaungilat sugiarnimnik; saviksoaᴋotise nungutsisimavut nalautaijoᴋotipsingnik, loevetut asseroijotut.

³¹ Kinguvârêngojose ilipse, kamagitse Nâlakab oᴋausinganik. Sunaᴋajuitôlauᴋsimavingâ, nunatullônêt tâᴋtoᴋsoaliktut ilingalauᴋsimavingâ Israêlimût? Suna pivlugo inuᴋotikka oᴋarᴋât: Pitûdjarpogut; tikitsomairpogut ilingnût?

³² Uigasub pinnarnarsautine puigorungnarᴋagît, nuliaksablônêt annorâtsianê? Inuᴋotimale puigorpânga uvlut kitiksaungitut.

³³ Iluserijatit pinnarnarsitipatit nagligijaujomavlutit! Taimaimallo arnat idluitulijut aglat ajoᴋertorpatit ilusilungnernik.

³⁴ Aklujut passijaksaungitullo tarningita aungit naipitauvut annorângne, ijersimatilugillo naipilaungilakka, ilûnânêngmatta.

³⁵ Oᴋarpotille: Passijaksaungilanga; ningarnine allartiliuk uvamnit. Ahâk, kiglisiniaromavagit, oᴋaravit: Idluitulilaungilanga.

³⁶ Sôᴋ sangusaraiᴋattarᴋêt ikunga taikungalo apᴋutetâromavlutît? Egipten kangusûtigijomârpat, sorlo Assiria kangusûtigigangne.

³⁷ Tâpsomungatauᴋ anijomârpotit, aggatit pâᴋtigêktisimatilugit niaᴋovît Kângane; Nâlakab tatigijatit ajaktolaungmagit, igvillo suliniatsangilatit tâpkonane.