Jeremia 19 - Labrador Inuttitut Heritage Bible

¹ Imak Nâlagaᴋ oᴋarpoᴋ: Ailerit, pisiniariartorlutillo publaujamik maggamik maggaliortomit, inuillo angajoᴋângita ilangit, ajoᴋertuijullo angajoᴋângita ilangit ilagikit;

² Ailutillo Hinnomib erningata naᴋsanganut, maggavineᴋtaliub itertarviata sivurânêtomut, oᴋautsillo oᴋauserijomajakka ilingnut oᴋâlatigikit;

³ Oᴋarlutillo: Nâlakab oᴋausinga tusarsiuk, ilipse ataniojose Judame, ilipselo Jerusalemiojose; imâk oᴋarpoᴋ Nâlagaᴋ Zebaot, Israêlib Gudinga: Ahâk, idluitomik tikiutjijomavunga nunamut tamattomunga, aviojititsilârtomik tusartub tamattominga siutîgingnik.

⁴ Kemaksimagaminga, nunalo tamanna takorngartautilât, isserluanititsivigivlugolo gudingoanut uvanga assimnut ilitaringitamingnut, tâpkoalônêt atâtangitalônêt, Judab ataningitalônêt; nunalo tamanna ilumeramitsuk pasijaksaungitut aunginik kovisilutik;

⁵ Baaliblo poᴋtoningit sanagamitsuk, ernitik ikoâlalugit ikomamut tunergutigilugit Baalemut; perᴋolaungitarale tamanna, oᴋautigilaungitaralônêt, ômamiutarilaungitaralônêt.

⁶ Taimaimat, ahâk, naliutsomârpoᴋ, Nâlagaᴋ oᴋarpoᴋ, nuna tamanna taijaujungnairomârmat Tôfetemik, Hinnomiblônêt erningata naᴋsanganik, toᴋorartauviuble naᴋsanganik taijaujomârpoᴋ.

⁷ Uvangalo Judab Jerusalemiblo atanertuijingit kovijomârpakka nuname tamattomane, oggotitautitsomârpakkalo saviksoarmut ômigijimik sângine, inôsingitalo pinasuartingita agganginut; timingillo tunijomârpakka nerᴋiksauᴋovlugit tingmianut ᴋilaub atânêtunut, nergjutinullo nunamêtunut.

⁸ Iglugasaksuillo tamakkoa tataminiarutautitsomavakka inerᴋogijaungitilugillo; apᴋusârtut ilûnatik tataminiarutigilârpait inerᴋoginagillo, asserortaumaningit ilûnaita pivlugit.

⁹ Nerrititsomârpakkalo ernermik uvininginik paningmiglo uvininginik, ilûnatiglo nerrijomârput ilanârijamik uvininginik, ilumajaunerme siorniornartunalo, ômigijingita inôsingitalo pinasuartingita siorniortitsiningine tâpkoninga.

¹⁰ Tavalo publaujaᴋ serᴋomitaksarivat angutit ilagijavît takoane, oᴋautijaksarivatillo:

¹¹ Imâk oᴋarpoᴋ Nâlagaᴋ Zebaot: Taimaluatsiaᴋ inôᴋatigêksuit ukkua iglugasaksuillo ukkua serᴋomitsomârpakka, sorlo maggaliortib illuleᴋuteliarimajanga serᴋomitaungmat âᴋiksortaujungnarungnaivlune; iluversijomârpullo Tôfeteme iluverviksairutimariᴋârtinago.

¹² Taimak nuna tamanna inungillo piniarvigijomârpakka, Nâlagaᴋ oᴋarpoᴋ, iglugasaksuit tamakkoa ilingatitsomavlugit Tôfetetut;

¹³ Jerusalemiblo iglungit, Judablo ataningita iglungit, ivsornartitaujut ilingajomârput nunatut Tôfetetut, ila, iglut ilûnatik ᴋângine isserluanititsiviolauᴋtut ᴋilaub uvloriagasaksoanginut, koviviolauᴋtullo tunergutinik imiksanik gudingoanut assimnut.

¹⁴ Jeremialo tagva majorarpoᴋ Tôfetemit aivigilauᴋtaminit Nâlakamut tilijaugame nalautaileriartorᴋovlugo; nangeriartorporlo Nâlakab iglungata avalungita iluane, inuillo ilûnaita oᴋautivait:

¹⁵ Imâk oᴋarpoᴋ Nâlagaᴋ Zebaot, Israêlib Gudinga: Ahâk, iglugasaksoarnut ukkununga iglugasaksoanullo tamainut tikiutjijomavunga idluinernik tamainik oᴋautigisimajamnik tâpkonunga; ᴋongasetik ᴋeratatilaungmagit oᴋausikka tusaromanagit.