Jeremia 18 - Labrador Inuttitut Heritage Bible

¹ Okausek tikilauᴋtoᴋ Jeremiamut Nâlakamit, oᴋarlune:

² Makigit, atersârlutillo maggaliortib iglunganut, tagvanalo tusartitsomavagit oᴋausimnik.

³ Atersârpunga tagva maggaliortib iglunganut, ahâglo, sulijane suliarivâ kaivalluarlugo.

⁴ Pogutarle maggaliortib maggarmit sananasuartanga sujungmat aggangine, pogutaliarivâ assianik, maggaliortib nâmagijanga maliklugo.

⁵ Tagva Nâlakab oᴋausingata tikipânga, oᴋarlune:

⁶ Ilipse ᴋitorngaujose Israêlimut; piniarvigijungnangilapsê maggaliortotut otunâk? Nâlagaᴋ oᴋarpoᴋ. Ahâk, maggaᴋtut maggaliortib agganginêtotut, taimailingagivose aggamne, ilipse ᴋitorngaujose Israêlimut.

⁷ Kangalônet oᴋauteᴋaruma inôᴋatigêksuit naliat pivlugit, ataniovillo naliat pivlugo, nussugomavlugit, serᴋomitsomavlugit, asseroromavlugillo;

⁸ Inôᴋatigêksuit tâpkoa oᴋautigijakka, sâgiarpatta idluitulinermingnit, ᴋaᴋialerutigijomavara idluitoᴋ kajusijutigilauᴋtara piniaromavlugo tâpkonunga.

⁹ Kangalônêllo oᴋauteᴋaruma inôᴋatigêksuit naliat pivlugit, ataniovillo naliat pivlugo, tungatitsomavlugit ilijomavlugillo;

¹⁰ Idluitulilerpatta sâmne nippigalo nâlangnagô, ᴋaᴋialerutigijomavara ajungitulineᴋ kajusijutigilauᴋtara piniaromavlugo tâpkonunga.

¹¹ Taimaimat, attê, oᴋâlalerit Judamiunut Jerusalemiunullo, oᴋarlutit: Imâk Nâlagaᴋ oᴋarpoᴋ: Ahâk, âᴋiksoivunga idluitomik ilipsingnut, kajusimaneliorlungalo ilipse pivluse; uteritse mâna ilûnase atunit apᴋutipsingnit idluitunit, ilusiselo piniarniselo âᴋiksorlugit.

¹² Tâpkoale oᴋarput: Tamanna nerriungnalungilaᴋ; issumaptingnik arvertaromagapta piniaromavlutalo ilûnata atunit ômatipta mangaitisimajut kajusimaningit maliklugit.

¹³ Taimaimat imâk oᴋarpoᴋ Nâlagaᴋ: Apertsoritse inôᴋatigêksuit akorngane: Kina taimaitunik tusalauᴋsimavâ? Israêlib uigasunga piniarsimavoᴋ maᴋojungnadlartomik.

¹⁴ Libanonib apᴋutâ sorairomârᴋâ ᴋairtomit naternamêtomit? Imerlônêt niglinartoᴋ ungasiktomit kôktoᴋ nungujomârᴋâ?

¹⁵ Inuᴋotimale puigorsimavânga; isserluanititsisimavut tippitsiariktunik sulitsangitunut; naukiutitipait apᴋutingine, apᴋutetoᴋane, arvertartilugillo apᴋutine apᴋutitsiangolungitune, apᴋutine sanasimangitune;

¹⁶ Nunangat tataminiarutiksauᴋovlugo mitautiksauᴋovlugolo soraijuitomik; ilûnatik apᴋusârtut tagvunga tataminialârput ileᴋetamârlutiglo.

¹⁷ Omigijingita sângine siamartitsomavakka sorlo unnangârmut; tunuga saᴋᴋertitsomavara tâpkonunga, kênaraungitorle, kapiasungningita uvlungane.

¹⁸ Tapkoale oᴋarput: Attê, ᴋaileritse, issumaksarsioᴋatigêkta Jeremia pitjutigilugo; perᴋojat pijungnainiangimatta ajoᴋertuijomit, atanertuinerlônêt ilisimajomit, oᴋauserlônêt nalautaijomit. Kaileritse, oᴋarnerlutigilavut oᴋaptingnut, kamaniaratalo oᴋausingita nalianiglônêt.

¹⁹ Kamagilaungatôk, Nâlagaᴋ, nâlalaurillo akkerartortima nippinginik.

²⁰ Idluineᴋ akkiniarutaulârᴋâ ajunginermût? Itersâlungmik itersaliorsimagamik tarnimnut. Erᴋailaurit nangilaurama sângne idluarᴋutiksarsiorlugit, ningârnît sangutitsomavlugo tâpkonangat.

²¹ Taimaimat ᴋitorngangit tunikit kângnartoᴋsoarmut, unertutigikillo saviksûb pitsartuninganut; arnangit ᴋitorngairtaulit uigarniovlutiglo; angutingit toᴋotaulit, inôsuktungillo annaujaulit saviksoarmut unatarnerme.

²² Niplianersoaᴋ tusartaule iglunginit, tikiutjiguvit sorᴋsuktunik tâpkonunga suerganit; itersâlungmik itersaliorsimangmatta tigujomavlunga, mikkigianiglo âᴋiksoivut itikamnut.

²³ Igville, Nâlagaᴋ, ᴋaujimatsiarpotit kajusinerijanginik tamainik pivlunga toᴋotsomavlunga; idluituliningit issumagijungnainiarnagittôᴋ, piungituliningillo pêjarniarnagit saᴋᴋarnit; oggotitaulille sângne; piniarvigikillo ningaluarnivît naliuningane.