Jeremia 17 - Labrador Inuttitut Heritage Bible

¹ Judab idluitulinerijangit aglaksimavut aglautemut kikiangojomut, alikublo nuvuanut; aglaksimavut ômatingita sânginut, tunerguservingitalo nakjunginut,

² Kitorngangit erᴋaumatilugit tunerguservinginik gudingoanginiglo napârtut tungujoᴋtat atâne ᴋaᴋᴋane poᴋtojune.

³ Kaᴋᴋaᴋotiga naternarme, perᴋutitit pivianartoᴋotitillo aᴋsârnigautitsomavakka, poᴋtojoᴋotitillo, idluitulineᴋ pivlugo, nunangne ilûnâne.

⁴ Igvillo nangmineᴋ avilârpotit kingormgutijarnit tunilauᴋtamnit ilingnut; kivgartortitsomavagillo ômigijingnik nuname ilitaringitarne; ikomamik ikitsisimagapse ningaumajârnimne ikoâlatsainaromârtomik.

⁵ Imâk Nâlagaᴋ oᴋarpoᴋ: Inuk ôminarsivoᴋ sungertuteᴋartoᴋ inungnik, uviningmiglo ajakpaveᴋarasuartoᴋ, ômatimigullo allartoᴋ Nâlakamit.

⁶ Paungaᴋutitut sunaᴋajuitome itsomârpoᴋ, takoniangilâlo idluartoᴋ allakaraloartilugo; nunaᴋalârporle pannertome sunaᴋajuitome, nuname tarriolingme inuᴋarpangitome.

⁷ Piloridlarpoᴋ inuk sungertuteᴋartoᴋ Nâlakamik, nerriungneᴋartoᴋ Nâlakamik.

⁸ Itsomârpoᴋ napârtotut ilimajotut imelingme, issivitsijotut amângminik kôb sanniane, sivôrajariaᴋaromângilaᴋ kiaksoaᴋ tikigaloarpat, millukatangille tungujotsainaromârput; siarkleromângilarlo jâre silaluᴋangitoᴋ tikigaloarpat, saᴋᴋijârtitsijungnairomângilarlo paunganik.

⁹ Omate nalangaitoᴋsôluarpoᴋ assinginit tamainit, ᴋanimadlartoᴋsôvorlo; kia ilitarijungnarᴋaûk?

¹⁰ Uvanga Nâlagaujunga ômate nautsertorpara, uvanga taᴋtut ôktorpakka, inuit tamaita tunidjivigijomavlugit piniarningit maliklugit, suliarijangitalo sakᴋertitangit maliklugit.

¹¹ Sorlo aᴋigeᴋ ivangmat manninik mannerilungitaminik, taimailingavoᴋ akluinernik katersoijoᴋ, idluartoku-ungitoᴋ; uvluksame ᴋeterᴋangine ᴋemagaksarijomârpait, naggatiksaminalo salaitôjomârpoᴋ.

¹² Iksivautaksoak ânanausijaudlartoᴋ, kiglinganit âᴋiksortaumajoᴋ poᴋtojome, tamanna ila ivsornaivipta innigijanga.

¹³ Nâlagaᴋ, Israêlib nerriugijangat, ᴋemaijut ilingnik kangusudlaromârput; aviktut uvamnit aglaktaujomârput nuname, Nâlagaᴋ imiub ômanartub puailavinga ᴋemangmatsuk.

¹⁴ Inûlilaunga, Nâlagaᴋ, inûlijaudlarniarpunga tagva; piulilaunga, piulijaudlarniarpunga tagva; igvit nertordlerutigigapkit.

¹⁵ Ahâk, oᴋarput uvamnut: Nâlakab oᴋausingit nanêᴋât? Tikilit mâna.

¹⁶ Uvangale sukalinasualaungilanga mianersijungnairomavlunga maliklutit; uvlorlônêt pidlartauvik tussigilaungilara; ᴋaujimavotit; ᴋangasinângma anititangit kênavit sânganêlauᴋput.

¹⁷ Kapiasûtauniarnak uvamnut; saputijauvigivagit kapianartûb uvlungane.

¹⁸ Kangusudlarlit uvamnik unangmiklertut, kangusungniarnangale; ᴋoaᴋsâdlarlit, ᴋoaᴋsârniarnangale; tikitautilaukit kapianartûb uvlunganut, asserorlaukillo asserornermut maggolimajomut.

¹⁹ Imâk Nâlakab oᴋautilauᴋpânga: Ailerit, nangerlutillo inuit itertarvingane, Judab ataningita itervigivaktangane anivigivaktanganalo, Jerusalemiblo itertarvingine tamaine;

²⁰ Oᴋautikillo: Nâlakab oᴋausinga tusarsiuk, ilipse ataniojose Judame, Judamiojoselo ilûnase, Jerusalemiojoselo ilûnase, iterpaktose itertarviksoatigut ukkutiguna.

²¹ Imâk Nâlagaᴋ oᴋarpoᴋ: Udjertoritse nangminipsingnik, adjarsiniaraselo oᴋumaitunik Sabbateme, tikiutinagolônêt Jerusalemib itertarvingagut;

²² Iglupsingnillônêt anitsiniarase oᴋumaitunik Sabbateme, sumiglônêt suliaᴋarniarase; Sabbatele ivjornaitisiuk, sorlo atâtagilauᴋtase perᴋolaurapkit;

²³ Tâpkoale nâlalaungilat, siutitiglônêt mannilaungilait, ᴋongasetigle ᴋeratatipait, tusaromanginamik ajoᴋertortaujomanginamiglo.

²⁴ Ataruilivlusele nâlagomagupsinga, Nâlagaᴋ oᴋarpoᴋ, adjarsijomanase oᴋumaitunik iglugasaksuit ukkua itertarvingitigut Sabbateme, Sabbatele ivjornaitilugo, suliaᴋarviginagolo;

²⁵ Tagva iglugasaksuit ukkoa itertarvingitigut itilârput atanit atanertuksallo iksivavlutik Dâvidib iksivautaksoangane, ikimavlutik aksaloalingne, ablangalutiglo horsine, tâpkoa, atanertuksangillo, Judablo inungit, Jerusalemiullo; iglugasaksuillo ukkua inuᴋatsainaromârput issoᴋangitomut.

²⁶ Tikitoᴋaromârporlo Judab iglugasaksoanginit, Jerusalemiblo erᴋânêtunit, Benjamiblo nunanganit, naternamillo, ᴋaᴋᴋanillo, seᴋinermillo, ᴋaitsilutik tunergutiksanik ôtaksanik, tunergutiksaniglo toᴋotaksanik, tunergutiksaniglo nerᴋiksanik, tipitsiariksautiksaniglo, tunergutiksaniglo ᴋujalitiksanik, Nâlakab iglunganut.

²⁷ Nâlagomangikupsingale Sabbate ivsornaititsomavlugo, adjarsitailijomangikupselo oᴋumaitunik iterniarluse Jerusalemib itertarvingitigut Sabbateme; tagva ikomamik ikitsijomavunga itertarvingine, nungutsilârporlo Jerusalemib igloᴋsoanginik, ᴋamitauniarungnaivlune.