Jeremia 16 - Labrador Inuttitut Heritage Bible

¹ Nalekablo oᴋausingata tikilerivânga, oᴋarlune:

² Nulianiktuksaungilatit, ernetârtuksaungilatillônêt panitârtuksaungilatillônêt nuname tamattomane.

³ Imâk Nâlagaᴋ oᴋarmat ernît panîllo nuname tamattomane inûlertut pivlugit, anânangillo ernijut tâpkoninga pivlugit, atâtangillo ernetârtut tâpkoninga nuname tamattomane pivlugit:

⁴ Kanimaseâlungmut toᴋojomârput; oggorijaujomângilat iluvertaujomângilallônêt; aᴋtarnerlukkotitulle ilingajomârput nunab ᴋângane; nungutaujomârpullo saviksoarmut kângnartoᴋsoarmullo; timingillo toᴋungajut nerᴋiksaujomârput silab tingmianginut nunablo ômajunginut.

⁵ Nâlagaᴋ oᴋarmat imâk: Iglo ᴋeavik itervigijaksaringilat, ogguaᴋataujartortuksaungilatillônêt ᴋeaginagillônêt; ulapirᴋsautiga pêjarsimagapko inôᴋatigêksoarnit makkonangat, Nâlagaᴋ oᴋarpoᴋ, ila, saimarveᴋarnera nâpkiningneralo.

⁶ Angijut mikijullo toᴋojuksauvut nuname tamattomane; iluvertaulângilat, inuillo oggorilângilait, killersilângilat nangminermingnik tâpkoa pivlugit, sallijaujutigilângilaillônêt.

⁷ Aitortuijoᴋalângilallônêt ᴋaᴋᴋôjanik ᴋeajunut, manigoromavlugit toᴋungajut pivlugit; tunidjiviolângilallônêt manigornerub ermgusiarsunganik, imerᴋovlugit atâtatik anânatiglo pivlugit.

⁸ Itertuksaungilatillo iglomut nerrimârviojomut iksivaᴋatigijomavlugit, nerrijomavlutit imeromavlutillo.

⁹ Imâk Nâlagaᴋ Zebaot, Israêlib Gudinga, oᴋarmat: Ahâk, sorairtitsomavakka nuname tamattomane, ijipse sângine uvlupsingnalo, ᴋuviasuktut nippingit serrijullo nippingit; nulianiktut nippingit uiniktullo nippingit.

¹⁰ Inôᴋatigêksuillo tamakkoa nalonaijaivigigungne oᴋautsinik ukkuninga tamainik, oᴋarvigikpatillo: Suna pivlugo Nâlakab idluitoᴋsoaᴋ tamanna tamât oᴋautigivaûk uvaptingnût? Ajornerijavut sunauvât? Idluitulinerijavut piniartavut Nâlakamut Gudiptingnut sunauvât?

¹¹ Oᴋautijaksarivatit: Atâtagilauᴋtapse ᴋemalaungmanga, Nâlagaᴋ oᴋarpoᴋ, malilaungmattalo assimnik gudingoanik, kivgartorlugit, tuksiarvigivlugillo, ᴋemalaungmangalo, perᴋojakka piniarnagit;

¹² Ilipselo angiluartomik idluitulisimavose atâtagijapsingnit; tagva, ahâk, atunit ilûnase arvertarpose ômatipse idluitut mangaitisimaningit maliklugit, nâlalugaselo uvamnik;

¹³ Tamakkoa pitjutigilugit pingujaromârpapse nunamit omangat nunamut ilitarilaungitapsingnut, ilipselônêt atâtapselônêt; tagvanalo kivgartoromârpose assimnik gudingoanik uvlôtilugolo unnuarmelo; tagvane saimarvigijomânginapse.

¹⁴ Taimaimat, ahâk, naliutsomârpoᴋ, Nâlagaᴋ oᴋarpoᴋ, oᴋartoᴋarungnairomârmat: Sorlo Nâlagaᴋ inôngmat, tikiutjilauᴋtoᴋ Israêlib ᴋitornganginik nunamit Egiptenemit;

¹⁵ Imâgle: Sorlo Nâlagaᴋ inôngmat, tikiutjilauᴋtoᴋ Israêlib ᴋitornganginik nunamit taggânêtomit, nunanillo tamainit ᴋemâviotitaminit tâpkonunga; tikiutitsomârivakkalo nunamingnut tunilauᴋtamnut atâtagijanginut.

¹⁶ Ahâk, aulasartunik unuktunik tilikleromavunga, Nâlagaᴋ oᴋarpoᴋ, tâpkoalo aulasaromârput tâpkoninga; kingornganalo tilikleromavunga ômajoᴋsiortunik unuktunik, tâpkoalo pinasualârpait ᴋaᴋᴋane tamaine, ᴋaᴋᴋârulangnalo tamaine, ᴋairosungnalo tamaine.

¹⁷ Ijîngma tâpkoa apᴋotingit tamaita tautungmatikik; ijertaulungimatta kênamnit, idluituliningillônêt angiarijaulungilat ijimnut.

¹⁸ Sivorlermigle idluituliningit ajorningillo akkiniarutigijomavakka maggoertorlutik; ivsornartitsisimangmatta nunamnik maᴋojungnartûtimik timivininginut, kingormgutijaralo ilumermatsuk mamaitoâluᴋotimingnut.

¹⁹ Nâlagaᴋ, sôngonerijara, serngnigijauviksaralo, ᴋemâvigijaralo kapiasungnima uvlungane, ilingnut inôᴋatigêksuit silaᴋsûb issunginit tikituksaulârput, oᴋarlutik: Atâtagilauᴋtavut kingormgutijatuaᴋalauᴋput saglonernik, ila, suksaungitunik, pingniglo idluarᴋutiksaulaungitunik.

²⁰ Inuk piksariniartaminik gudingoaliortuksauvâ, Gudeoᴋungimariktunîk?

²¹ Taimaimat, ahâk, ᴋaujititsomavakka, tamattomane ᴋaujititsomavakka aggamnik pitsartunimniglo; ᴋaujijuksauvullo atteᴋarama Jehôvamik.