Jeremia 15 - Labrador Inuttitut Heritage Bible

¹ Nalekablo oᴋautivânga: Mosese Samuelelo nangerajaraloarpanik sâmne tuksiutjilutik, ômatima inôᴋatigêksuit ukkua ililertorajangilait; pingujarkit sâmnit, pêjarlit.

² Oᴋautikpatillo: Namut aijuksauvitâ? oᴋautilârpatit: Imâk Nâlagaᴋ oᴋarpoᴋ: Toᴋomut ilingatitaujut, toᴋomut; saviksoarmut ilingatitaujut, saviksoarmut; kângnartoᴋsoarmut ilingatitaujut, kângnartoᴋsoarmut; aularutjaunermullo ilingatitaujut, aularutjaunermut.

³ Tikitauᴋojomavakkalo oᴋumainartunut sittamanut, Nâlagaᴋ oᴋarpoᴋ, saviksoarmut toᴋotsijomut, ᴋingminut aliktuijunut, ᴋilaub ikkiangata tingmianginut, nunablo ômajoâlunginut, nungutsijunut asserorsaijunullo.

⁴ Egitautitsomavakkalo sunatuinarnut ataniovit nunamêtut akorngane, Manasse, Hiskiab erninga, Judab ataninga pivlugo, piniarnerilauᴋtanga Jerusaleme pitjutigilugo.

⁵ Kia naiperᴋutiginiarᴋâtît, Jerusalêm? Kialônêt oggoriniarkâtît? Kinalônêt sanguniarᴋâ ᴋanoelinganît aperᴋutigivlugô?

⁶ Iperarsimavarma, Nâlagaᴋ oᴋarpoᴋ, kingupiartorsimavotit; taimaimat aggakka issaksimavakka ilingnut asserorlutit; nâpkiningnermik merngortudlarpunga.

⁷ Nunablo iglugasaksoangita itertarviksoangine ipsortoromavakka ipsortûtimut, ᴋitorngaijarsimavakka, inuᴋotikka asserorsimavakka; utilungilat apᴋotigilauᴋtamingnit.

⁸ Uigarningit unuksisimavut uvamnut, ununersauvlutik imarbiub sioranginit; inôsuktut anânangat tikitautisimavara asseroijomut uvlub ᴋeterarningane; opingartautisimavara kapiasungnermut sivôranartunullo.

⁹ Kitorngilauᴋtoᴋ 7nik anersaumilerpoᴋ, anernangerpoᴋ; seᴋᴋininga nippivoᴋ uvlôtilugo sulle; kangusudlalauᴋpoᴋ uimâlavlunalo; amiakungillo saviksoarmut tunijomavakka ômigijingita sângine, Nâlagaᴋ oᴋarpoᴋ.

¹⁰ Kapianarmêk uvanga, anânak, erniarilauramga angutaujunga akkerartornelik, angullo aivanelik nuname ilûnâne! Attartortitsilauᴋsimangilanga perᴋutiniaromavlunga, inôᴋatimalônêt perᴋutiniaromavlutik attartortisimangilânga; ilûnatigle oᴋarnerlutivânga.

¹¹ Nâlagarle oᴋalauᴋpoᴋ: Ahamarik, pitsartutitsomavagit ajungitomut, ahamarik, ômisuktut ᴋenujartortitsomavakka ilingnut kapiasungnerub naliuningane oᴋumaititaunerublo naliuningane.

¹² Kikiatuinak serᴋomitsijungnarᴋâ sakkomik sissangmik avangat pijomîk?

¹³ Perᴋutitit ivlernartoᴋotitillo aᴋsârnigautitsomavakka akkeᴋalugatik, taimailingalârporlo idluitulinivit unurningit pivlugit, ila, nunangne ilûnâne.

¹⁴ Atautitsomârpakkalo ômigijingnut nunamut ilitaringitarnut; ikoma ikoâlangmat ningaumajârnimne, ikitsilârtomik ilipsingnik.

¹⁵ Nâlagak ᴋaujimavotit; erᴋarlaunga, nalipsarlaungalo, unangmijimnullo akkiniarutigilunga; kamangitsertornerne tâpkoninga pêjartautiniarnanga; ᴋaujimalerille mitautigijaudlalaurama pivlutit.

¹⁶ Oᴋautsitit nagvârtaulauᴋput, nerrilauᴋpakkalo; oᴋautsitillo ᴋuviasûtaulauᴋput serrijûtauvlutiglo ômatimnut; atserartaugama atternut, Nâlagaᴋ, Gude Zebaot.

¹⁷ Iksivalaungilanga ijudlartut katimaningine, ᴋuviasuᴋataulaungnangalônêt; inutôlungale iksivalauᴋpunga aggakpit sivurâne; ilumilauramga ᴋuviasunginermik.

¹⁸ Sôᴋ ânianera soraijuikâ, killeralo âᴋiᴋtaujungnarungnaivlune, mamititaujomairlunê? Nalâgut ilingavigijomavingâ kôktut tunganangitotût, imeᴋtut nungulertotût?

¹⁹ Taimaimat Nâlagaᴋ oᴋarpoᴋ imâk: Sâgiaruvit, utertitsomalerivagit, nangerungnarmiᴋovlutit sâmne; ivlernartorlo avigungne piungitomit, ᴋaniptut ilingajomârpotit; tâpkoa sâtuksauvut ilingnut, igville sâtuksaungilatit tâpkonunga.

²⁰ Inungnullo tâpkonunga ilingatitsomârpagit ᴋarmaᴋtut ᴋaᴋᴋorlermik avaluliorsimajotut; sorᴋsugvigijomârpâtit, sâlaginiangilâtille; ilagigapkit saputijomavlutit piulijomavlutillo, Nâlagaᴋ oᴋarpoᴋ.

²¹ Piulijomavagillo idluitut agganginit; ᴋelujomavagillo erᴋsinartut agganginit.