Jeremia 14 - Labrador Inuttitut Heritage Bible

¹ Tamadja Nâlakab oᴋausinga tikilauᴋtoᴋ Jeremiamut imeᴋarungnaineᴋ pitjutigilugo.

² Juda kiksadlarpoᴋ, upkoaᴋsoangit ᴋaggimioviojungnaiput, nunamêtut ogguadlarput, ᴋuggudlarnerillo ᴋongmuarput Jerusalemit.

³ Angajoᴋât tiliklerput pijimingnik imeᴋtarᴋovlugit; itersanut tikigamik imeᴋsilungilat; uterput imeᴋtautingit imeᴋartinagit; kangusudlarput uimâlalutiglo, niaᴋotiglo ulikpait.

⁴ Ibjo panertoᴋ silalugviolaungitoᴋ pivlugo, perorsêvilerijut kangusukput, niaᴋôtiglo ulikpait.

⁵ Ila, tuktu naternamêtoᴋ piaratârpoᴋ, piaranele ᴋemakpâ iviksukkaᴋangimat.

⁶ Siuteᴋortojullo nujoartut nangerput ᴋaᴋᴋârulangne merᴋoᴋangitune, aitalâvut ibjangonermut ᴋuglugiaᴋsoarâluktitut; ijingit sikkungilâvut, iviksukkaᴋangimat.

⁷ Idluitulinivut nalonaijaigaloarmatta pivluta, ikajulaurit, Nâlagaᴋ, attit pivlugo, kingupiartornivut unuktôdlarmatta; idluitulivigilauraptigit.

⁸ Igvit, Israêlib nerriugijanga, piulijinga naliutome kapianartovingme, sôᴋ takorngartatut nuname ilingavêt, ingergajotullo sangujotut siniktartuinaromavlunê?

⁹ Sôᴋ inuktut tataminiartotut ilingavêt, inuktut sôngojotut piuliklerungnangitotullê? Igville, Nâlagaᴋ, akunapting nêpotit, atternullo atserartauvogut; ᴋemangniaratiguttôᴋ.

¹⁰ Imâk Nâlagaᴋ oᴋarpoᴋ inôᴋatigêksoarnut tamakkonunga: Taimak angitigijomik namuttuinak arvertaromadlarput; itikatik noᴋangatitsomangilait; taimaimat Nâlakab pijomangilait; mânale idluituliningit erᴋaumajomavait, nâmangituliningillo sugiaromavait.

¹¹ Nâlakablo oᴋautivânga: Inôᴋatigêksuit makkoa idluarᴋutiksanginik tuksiarniarnak.

¹² Nerritailijarangata, tusaromangilanga ᴋaigarsungninginik; tunerguseruniglo ôtaksanik nerᴋiksaniglo, ilalioromangilakka; nungutsomavakkale saviksoarmut, kângnartoᴋsoarmullo, nusilingnartomullo.

¹³ Oᴋalauᴋpungale: Adjai! Nâlagaᴋ Gude! Ahâk, nalautaijut oᴋautivait: Takoniangilase saviksoarmik, tikitauniangilaselo kângnartoᴋsoarmut; tunidjivigijomavapsele ulapirᴋsaumik nalâgôrtomik nuname tamattomane.

¹⁴ Nâlakable oᴋautivânga tagva: Nalautaijut saglovlutik nalautaivut attimne; tililaungilakka, perᴋolaungilakkalo, oᴋarvigilaungilakkalônêt; nalautaivigivâse takotitjumik mikseᴋârtôlungitomik, angakônermiglo, tukkeᴋangitomiglo, ômatimiglo uivêriklerninginik.

¹⁵ Taimaimat Nâlakab imâk oᴋautigivait nalautaijut nalautaivaktut attimne, tililaungitakkale, oᴋartulle: Saviksoaᴋ kângnartoᴋsoarlo tikilulângilâk nunamut tamattomunga: Saviksoarmulle kângnartoᴋsoarmullo nalautaijut tâpkoa nungutaujomârput.

¹⁶ Inugasaᴋsuillo nalautaivigijangit egitaujomârput Jerusalemib apᴋosineâlunginut saviksoaᴋ kângnartoᴋsoarlo pivlugik; iluversijuksaᴋaromângilarlo tâpkoninga, arnanginiglônêt, erninginiglônêt, paninginiglônêt, idluitulinitiglo kovijomavakka tâpkonunga.

¹⁷ Oᴋauserlo tamanna oᴋauserijaksarivat tâpkonunga: Ijîkka ᴋugviudlarlik ᴋugvingnik unnuarme uvlôtilugolo sorairatik; uigasuk inuᴋotima paningat serᴋomitaungmat serᴋomitsinermut angijomut, killermut piungitoᴋsôjomut.

¹⁸ Aniguma perorsêviliarlunga, ahâk, saviksoarmut toᴋotaumajut takovakka! Iterumalo iglugasaksoarnut, ahâk, perlilertut kângmut takovakka! Tagva nalautaijut ajoᴋertuijullotauᴋ nûgiaᴋalârput nunamut ilitaringitamingnut.

¹⁹ Juda ipperarsimamarikkiûk tâvâ? Tarnivît Zione ariumarikkaûk? Suna pivlugo annausimavitigût inûlijaunangitomîk? Nerriulauᴋpogut ulapirᴋsaumik, sunaubvale ajungitomik saᴋᴋertoᴋangilaᴋ, naliunermiglo inûlijauvionartomik, sunaubvale kapianartomik!

²⁰ Nâlagaᴋ, kigligiksarpogut idluitoᴋsôniptingnik, atâtagilauᴋtaptalo idluitulinerilauᴋtanginik, idluitulivigilauᴋpaptigit.

²¹ Attît pivlugo naggoginiaratiguttôᴋ, ânanaunivît iksivautaᴋsoanga mitautiksautiniarnagotôᴋ; erᴋailaurit, angeᴋatigêngnerijat uvaptingnut, serᴋominiarnagotôᴋ.

²² Nalojut gudingoaᴋotingita akorngane silaluktitisjungnartoᴋarᴋa? Kilaillônêt tunidjijungnarᴋât suarutanîk? Tâmnaungilatît, Nâlagaᴋ Gudivût? Taimaimat tatigijomavaptigit tamakkoa tamaita pingortinangne.