Jeremia 13 - Labrador Inuttitut Heritage Bible

¹ Nalekab imâk oᴋautilauᴋpânga: Pisiniariatorit tapserutemik uvineruksajamik, makitikkullo tapseruserlutit, ᴋausertailitilugole.

² Taimaimat tapserutimik pisivunga, sorlo Nâlakab perᴋongmanga, tapseruserlungalo makitipkut.

³ Nâlakablo oᴋausingata aipanganik tikilauᴋpânga, oᴋarlune:

⁴ Tapserut pisiarilauᴋtat makitingnêtoᴋ tiguguk, makilerillo, kôngmullo Farâtemut ailerit, ijerlugolo ᴋairtub ᴋôrutsunânganut.

⁵ Ailauᴋpunga tagva, ijerlugolo Farâtib ᴋanitangane, sorlo Nâlakab perᴋolaungmanga.

⁶ Uvlullo unuktut nâsimangmatta Nâlakab oᴋautivânga: Makilerit, Farâtemullo ailerit, tapserullo, ijertauᴋolauᴋtara ilingnut, tigulermiuk tagvangat.

⁷ Farâtemut ailauᴋpunga tagva, aggarlungalo, tapserullo tiguvara ijersivigilauᴋtamnit tâpsominga, ahâglo, tapserut sujuksimavoᴋ, sunamullônêt atoraksaujungnaivlune.

⁸ Tagva Nâlakab oᴋausingata tikipânga, oᴋarlune:

⁹ Imâk Nâlagaᴋ oᴋarpoᴋ: Taimaluatsiaᴋ Judab piojorininga Jerusalemiullo piojorijoᴋsôningat sujugomavara.

¹⁰ Inugasaᴋsuit tamakkoa idliutut, tusaromangitut oᴋausimnik, arvertartut ômatingita piniaromajangine idluitune, maliktullo Gudib assinginik kivgartoromavlugit tuksiarvigijomavlugillo, tapserutitut otunak, sunamullônêt atoraksaujungnaitotut, ilingajomârput.

¹¹ Sorlo tapserut atsungersortaungmat angutiub makitinganut, taimak Israêlib ᴋitorngangit ilûnaita Judablo ᴋitorngangit ilûnaita atsungersoromalauᴋpakka uvamnut, Nâlagaᴋ oᴋarpoᴋ; inuᴋutauᴋovlugit, unipkautiksauᴋovlugillo, nertortaujutiksauᴋovlugillo, opigijaujutiksauᴋovlugillo uvamnut; tusaromalaungilalle.

¹² Taimaimat oᴋautsemik ominga oᴋautijaksarivatit: Imâk Nâlagaᴋ Israêlib Gudinga oᴋarpoᴋ: Publaujat ilûnatik tattataujuksauvut vainemik, tâpkoale oᴋautiniarpâtit: Kaujimangilagut publaujat ilûnatik tattataujuksaumangâta vainemik.

¹³ Igville oᴋautiniarpatit: Imâk Nâlagaᴋ oᴋarpoᴋ: Ahâk, nunab tamattoma inungit ilûnaita, aglât atanîttauᴋ iksivajut Davidib iksivautangane, ajoᴋertuijullo, nalautaijullo, Jerusalemiullo ilûnaita, imertitsomavakka tallanartomik tallasimaᴋovlugit.

¹⁴ Pilukautitsomavakka aglât atâtat ernerillo pilukautitilugit, Nâlagaᴋ oᴋarpoᴋ; naiperᴋutigosungneᴋaromangilanga, kikkitsijomanangalo, nâpkigosungneᴋaromangilangalo, asserortautailititsomangilakka.

¹⁵ Tusaritse, siutiselo manisigik; piojoriniarase; Nâlagaᴋ oᴋarsimangmat.

¹⁶ Opigijaunermik tunidjileritse Nâlakamut Gudipsingnut, Gude tâᴋsititsiᴋonago, itikaselo aporᴋonagit ᴋaᴋᴋane tâᴋsilertune; ᴋaumajoᴋsêtiluselo tâmna ablatsângortitsiᴋonago tamattominga toᴋub taggalininganut, tâᴋtoᴋsoangortilugolo.

¹⁷ Tusaromangikupsiugle, tarniga ᴋealârpoᴋ sagvangitome piojorinise pivlugo; ijîkkalo ᴋugviudlalârpuk kusserlutiglo ᴋugvingnik, Nâlakab saugaᴋotingit aᴋsârnigaudlarmatta.

¹⁸ Ataneᴋ ataniublo anânanga oᴋautikik: Nikanarsârlutik ingileritik, niaᴋôt pinnarnarsautigilauᴋtaptik pêjartaungmat niaᴋuptingnit.

¹⁹ Iglugasaksuit seᴋinerdlît parngnanairsimangmatta, palangairudjarijoᴋangilarlo tâpkoninga; Judamiut iluengarlutik aularutijauvut, ila, iluengamariklutik aularutijauvut.

²⁰ Ijise arlortisigik takoluselo avangat tikilertunik; nanêkât saukat tunijaulauᴋtut ilingnût, saukat piodlartût?

²¹ Sumik oᴋaromârᴋêt nalipsarpatit taimâk? Tagva igvit nangmineᴋ sungiutisalauᴋpatit angajoᴋaulerᴋovlugit ilingnut. kapiasungnerit tigumiarniangilâtît, arnatut ernisuktotut itilutît?

²² Omatingnalo oᴋaruvit: Suna pivlugo tamakkoa tikisimavât uvamnût? idluitulinivit unurningit pivlugit annorâtit ᴋongmuartitauvut, kingmitillo aksorornermut usingatitauvlutik.

²³ Inub ᴋernertab amine ablatsangortitsungnarᴋaûᴋ, pûsivâlublônêt millanê? (Tamanna ajornalungipat) ilipsetauᴋ idluitulinermik sungiusimajose — ajungitulijungnarajarivose.

²⁴ Taimaimat siamartitsomavakka iviksukatitut kiblornilukutitut anoremut tiktaumajutitut sunaᴋajuitome.

²⁵ Tamanna kajusimautigijat ningersiarijat uvamnit, Nâlagaᴋ oᴋarpoᴋ; puigulauramga, saglonerillo sungertûtigilaurangne.

²⁶ Taimaimat annorâtit pêjaromavakka kênarnut pitilugit, kangusûtiksallo takuksaujomârpoᴋ.

²⁷ Takolaurama maᴋojungnartulinernik, assiniarnerniglo, narriomasijarnerniglo, ajortulinivîllo iloᴋeudlarninginik ᴋaᴋᴋârulangne perorsêvingne. Kapianarmêk igvit Jerusalem! Ivsornaititaujomangilatit. Kanoᴋ akunertigijomik taimailingalârᴋêt?