Jeremia 12 - Labrador Inuttitut Heritage Bible

¹ Idluartovotit, Nâlagaᴋ, oᴋaᴋataujomaguvit, oᴋaᴋatigijomadlaraloarpagit ilinganioᴋattartoᴋ pivlugo. Sôᴋ idluitulijut perᴋuteᴋarpaliasôngovât? Sôᴋ nalangaitomik piniarneᴋartut inilangatsiarsôngovât?

² Igvit ililauᴋpatit amâtsiortauvullo, ila, perorput paungatârlutiglo; ᴋanipotit ᴋaninginut, ungasidlarpotille taᴋtunginit.

³ Igville, Nâlagaᴋ, ilitarivarma; takonârparma, ômatigalo nautsertorpat sângne; tâpkoa nussulaukit sorlo saukat toᴋotaksangortitaujut, ilingatilugillo uvlormut toᴋotauvingmut.

⁴ Kanoᴋ akunêrtigijomik nuna takominaituksauvâ, perortullo nuname ilûnâne ᴋunollertuksauvât? Nunab inungita idluituliningit pivlugit nergjutit tingmiallo nungutauvut; oᴋarmatta: tâmna takojuksaungilaᴋ ilingajomârniptingnik.

⁵ Aᴋpangerᴋataulauruvit aᴋpangertunut, merngortortitaudlarniarlutillo, ᴋanoᴋ aᴋpangerᴋatautijungnalârᴋêt horsinût? Nunamelo ulapirᴋsautelingme pagvisârtaungikaloaruvit, ᴋanoᴋ ilingalârᴋêt Jordanib ᴋutjersimaninganê?

⁶ Katangutivit, atâtavillo ᴋitorngangita aglât nalangaitomik piniarvigingmatit, udlalutillo oᴋarnerlutjivigingmatit; tagva tatigitailikit oᴋautsinik ilanârnartunik oᴋauseᴋaraloarunik ilingnut.

⁷ Igluga ᴋemaksimavara, kingormgutijara sapkosimavara; tarnima nagligidlartanga tunisimavara ômigijingita agganginut.

⁸ Kingormgutijama ilingavigivânga loevetut napârtunêtotut, erinaluaᴋidlarvigivânga; taimaimat ômigivara.

⁹ Kingormgutijara tingmiatut taᴋsapatâᴋtotut ilingavâ uvamnût? Tingmiat arᴋtaijut kativât ilumavlugô? Aileritse, katersoileritse nergjutinik naternamêtunik, tamaungautilugillo ningutsiᴋovlugit tâpsominga.

¹⁰ Mianersijut unuktut asseroisimavut perorsêvimnik vaineliksatalingmik, perorsêviga tullerajârsimavât, perorsêviga ânanaudlartoᴋ sunaᴋarungnaitungortisimavât.

¹¹ Pitairutisimavât; pitaijartauvlune, takominaidlarpoᴋ sâmne; nuna ilûnane sunairutjauvoᴋ, erᴋasuktoᴋalungimat tâpsominga.

¹² Asserorsaijut tikisimavut ᴋaᴋᴋanut merᴋuᴋangitunut tamainut sunaᴋajuitome, Nâlakab saviksoanga nungutsilermat nunab kiglingata aipânit nunab kiglingata aipanga tikidlugo, uvinilîllo naliallônêt ulapirᴋsauteᴋangilat.

¹³ Sanaugaksanik karngasoilauᴋput, kakkilautelingnigle katersoisimavut; ilungertorasualauᴋput, sulisimatsangilalle; katersortaselo kangusûtigijomârpase, Nâlakab ningaumajârninga ilungertudlartoᴋ pivlugo.

¹⁴ Imâk Nâlakab avalikka idluitut ilûnaita, aktuijut kingormgutijamik kingormgutijautilauᴋtamnik inuᴋotimnut Israêlikunut, oᴋautigivait: Ahâk, nussugomavakka nunamingnit, Judablo ᴋitorngangit nussugomavakka tâpkoa akornganit.

¹⁵ Imaitsomârporlo: Nussuksimajarêrupkit, uteromârivunga nâpkigijomavlugillo; tikiutitsomalerivakkalo atunit kingormgutijaminut, atunillo nunaminut.

¹⁶ Imaitsomârporlo: Katsungaidlutik iliniaromagunik inuᴋotima apᴋutinginik, attera taivlugo angermariklutik: Sorlo Nâlagaᴋ inôngmat; sorlo inuᴋotikka ajoᴋertulaungmagit angermariᴋovlugit Baale taivlugo; tagva igloliangoᴋataujomârput inuᴋotima akornganut.

¹⁷ Tusaromangikunigle, tagva inôᴋatigêksuit tâpkoa nussugomârpakka, nussuklugit asserorlugillo, Nâlagaᴋ oᴋarpoᴋ.