Jeremia 11 - Labrador Inuttitut Heritage Bible

¹ Tamadja oᴋauseᴋ tikilauᴋtoᴋ Jeremiamut Nâlakamit, oᴋarlune:

² Angeᴋatigêngnerub tamattoma oᴋausertangit tusarsigik, oᴋauserilugillo Judab angutinginut Jerusalemiblo inunginut.

³ Oᴋautikillo: Imâk Nâlagaᴋ, Israêlib Gudinga, oᴋarpoᴋ: Ominarsile nâlangitoᴋ angerᴋatigêngnerub oma oᴋausertanginik,

⁴ Angerutigilauᴋtamnik atâtagijapsingnut uvlorme aularutjivigilauᴋtamne tâpkoninga nunamit Egiptenemit, kiaksauteâlungmit kikiangojomit, oᴋarlunga: Nippiga nâlaksiuk, piniarlugillo tamaita perᴋojakka ilipsingnut; taimak inuᴋutaujomârpose uvamnut, uvangalo Gudeojomavunga ilipsingnut;

⁵ Nalautsititsijungnarᴋovlunga angernermik soᴋoserungnangitomik angerutigilauᴋtamnik atâtagijapsingnut, tunidjivigijomavlugit nunamik imungmik igupsaujârtullo orᴋsuanik kôlingmik, sorlo uvlome pingmat. Kiolauᴋpungalo, oᴋarlunga: Amen, Nâlagaᴋ.

⁶ Nâlakablo oᴋautilauᴋpânga: Oᴋautsit tamakkoa tamaita oᴋâlatigikit Judab iglugasaksoangine, Jerusalemiblo apᴋosineâlungine, oᴋarlutit: Angeᴋatigêngnerub tamattoma oᴋausertangit tusarsigik piniarlugillo.

⁷ Katsungaidlunga atâtagilauᴋtase kigligiutjivigilaurapkit uvlorme aularutjivigilauᴋtamne tâpkoninga nunamit Egiptenemit, uvlome tikidlugo aglât, makisaraivlunga kigligiutjilunga, oᴋarlungalo: Nippiga nâlaksiuk.

⁸ Nâlalaungilalle, siutimingniglônêt manijilaungilat, ilûnatigle atunit arvertalauᴋput ômatingita idluitut mangainingit maliklugit; tamanna pivlugo tikiutjivigilauᴋpakka angiᴋatigêngnerub tamattoma oᴋausertanginik tamainik perᴋolauᴋtamnik tâpkonunga piniartauᴋovlugo, piniarnerilaungitanginigle.

⁹ Nâlakablo oᴋautivânga: Tukkisivunga Judab inungit Jerusalemiullo pikaluktidlarasuarmatta.

¹⁰ Uterput atâtagilauᴋtangita, oᴋauserijamnik tuseromalaungitut, idluitulininginut; malikpullo Gudib assinginik, kivgartoromavlugit; Israêlib kinguvângita Judablo kinguvângita angiᴋatigêngneᴋ angerutigilauᴋtara atâtagijanginut, serᴋomipât.

¹¹ Taimaimat imâk oᴋarpoᴋ Nâlagaᴋ: Ahâk, ogguarnartomik tikiutjijomavunga tâpkonunga, ᴋemâjungnangitanginik; nipliaviginiarpângalo tusaromangilakkale.

¹² Judablo iglugasaksoangit Jerusalemiblo inungit ᴋaigarsugiartoromârput gudingoanut tunerguservigijanginut isserluanerutinik; tâpkoale piulijomângimarikpait kapiasugvigijangine.

¹³ Tagva iglugasaksoaᴋotivit unurningit maliklugit taimak unuktigigivut gudingoaᴋotitit; Jerusalemiblo apᴋosineâlungita unurningit maliklugit tunerguserviliorsimavose isserluanertitsivingnik Baalemut.

¹⁴ Taimaimat inôᴋatigêksuit tamakkoa tuksiutiniarnagit pît, ᴋongmuartitsiniarnaglo ᴋaigarsungnermik ᴋenunermiglônêt tâpkoa pivlugit; tusaromalunginapkit ᴋaigarsugvigijangine uvamnut kapiasungnitik pivlugo.

¹⁵ Nagligidlartara sunasiorᴋâ iglumnê! Idluittuliᴋattarsimavoᴋ, ivsornainerlo nûsimavoᴋ tâpsomangat. Idluitulijarangavit ᴋuviasudlarpotit.

¹⁶ Nâlakab atseralauᴋpâtit: Napârtomik tungujoᴋtamik, takoranidlartomik paungalingmik orᴋsulingnik; perajaludlartulle pervaludlarninginut ikitsilauᴋpoᴋ ikomamik tâpsomane, akkerungillo naviksimavut.

¹⁷ Nâlagaᴋ Zebaot ilijilauᴋtoᴋ ilingnik siluksimavoᴋ idluitomik ilingnôrtuksamik, Israêlib ᴋitorngangita Judablo ᴋitorngangita idluiningit pivlugit, idluitulinerijangita ningarsârmanga Baale tunerguservigivlugo isserluanerutinik.

¹⁸ Nâlakablo ᴋaujitilauᴋpânga tamattominga, ᴋaujimavaralo; tagva unertutilauᴋparma piniarninginik.

¹⁹ Uvangale saugâraᴋtut sinaungajuitotut toᴋotauvingmut tassigoartaujotut ilingalauᴋpunga; ᴋaujimalaungilanga angiᴋatigêlaungmangârmik pikalukvigijomavlunga, oᴋarlutik: Napârtoᴋ paungangillo asserorniarlavut, nakalaulavullo inôjut nunanganit, attinga erᴋaumajaujungnaimariᴋovlugo.

²⁰ Igville, Nâlagaᴋ Zebaot, idluartomik erᴋartuijotit, nautsertortotillo taᴋtuniglo ômatiniglo, takotilaunga akkiniarnerik tâpkoninga; ilingnut nalonaijaisimagama ilinganimnik.

²¹ Taimaimat imâk Nâlagaᴋ oᴋarpoᴋ Anatotemiut, inôsernik pinasuartut, pivlugit, oᴋarlutik: Nalautainiarnak Nâlakab attingane, aggaptingnut toᴋotauᴋonak.

²² Taimaimat Nâlagaᴋ Zebaot oᴋarpoᴋ imâk: Ahâk, akkiniaromavakka; angutingit inôsuktut toᴋotaujomârput saviksoarmut; erningit paningillo toᴋojomârput pêrlernermut;

²³ Amiakoᴋarungnairomârpullo; idluitomik tikiudjijomagama Anatotemiunut, nalipsartauningita jâringane.