Jeremia 10 - Labrador Inuttitut Heritage Bible

¹ Tusarsiuk oᴋauseᴋ Nâlakab oᴋauserijanga ilipsingnut, ilipse Israêlib ᴋitorngangit;

² Imâk Nâlagaᴋ oᴋarpoᴋ: Nalojut ilusingit iliniarniarasigik, kapiasuktitauniaraselo ᴋilaub nalunaikutanginut; tâpkonunga nalojut kapiasuktitaudlarmatta.

³ Inôᴋatigêksuit gudingoangit sulingitôngmatta; napârtotuinauvut nakkataumajut napârtolingme, sanajib aggangita sanajangit ulimaumut.

⁴ Pinnarnarsitipait silberemut goldemullo; atsungersorlugillo kikiangnut ujaratsiarnullo, aulajarᴋonagit.

⁵ Nappajotuinauvut napârtutitut sanasimajutitut, oᴋarungnangilallo; adjartaujariaᴋarput pisugungnangimatta. Erᴋsiginiarasigik, idluitomik piniarungnangimatta, ajungitulinerlo tâpkonanêngilaᴋ.

⁶ Iliktun-itoᴋangilaᴋ, Nâlagaᴋ, angijôgavit attillo angijôgivoᴋ pitsartunerme.

⁷ Kia erᴋsiginajangilâtît, inôᴋatigêksuit ataningât? Igvit nâlaktaujuksauvotit; tagva inôᴋatigêksuit ilisimajungita akorngane, ataniovinginalo tamaine, iliktun-itoᴋangilaᴋ.

⁸ Ilûnatik adsigêktomik silaitôvut tukkeᴋangitôvlutiglo; ajoᴋertusiovut gudingoanik, ᴋejutuinaugamik.

⁹ Tarsisemit tikiutjivut silberemik katjuksimajomik amertajangordlugo, goldemiglo Ufasemit, sanasôngojub sanajanganik, goldelerijublo aggangita sanajanginik; tungujoᴋtamik aupaloriktomiglo annorâksanginut; iluengarlutik suliangovut ilisimajut suliarijanginik.

¹⁰ Nâlagarle Gudeovoᴋ mikseᴋârtoᴋ; Gudeovoᴋ ômatsainartoᴋ, ataniovlunalo issoᴋangitoᴋ; tâpsoma ningaumajârningane nuna sajukpilakpoᴋ, inôᴋatigêksuillo tâpsoma silungninga sappilerpât.

¹¹ Taimaimat oᴋautijaksarivase imâk: Gudingoat sanalungitut ᴋilangmik nunamiglo, tâpkoa pêraksauvut nunamit, ᴋilaublo atânit.

¹² Tâpsoma nuna sanalauᴋpâ pitsartunerminut, silaᴋsoarlo pingortilauᴋpâ ilisimanerminut, silatunerminullo ᴋilait issivilauᴋpait.

¹³ Nippine tusartautikpago imeᴋavaksoadlarpoᴋ ᴋilaub ikkiangane, pujorarlo ᴋongmuartipâ nunab issunginit; ᴋaumalaliorpoᴋ silalungme, anorelo anitipâ ᴋematulivingminit.

¹⁴ Inuit ilûnatik silaitôvut ilisimaneᴋaratik, goldelerijut ilûnatik kangusuktitauvut gudingoaliarimajamingnut; gudingoaliarimajangit auktisimajut sagloniovut anerneᴋanginamik.

¹⁵ Sulinginiovut mitautiksatuinauvlutiglo; ôktortauvingmingne ajulermarilârput.

¹⁶ Jâkob kingormgutijanga taipkotitunaulungilaᴋ; tâpsoma tamaita pingortilaungmagit; Israêliblo kinguvângit kingormgutivait; atteᴋarporlo Nâlakamik Zebaotemik.

¹⁷ Perᴋutitit katersorkit nunamit, igvit igloᴋartotit avaluliorsimajome.

¹⁸ Imâk Nâlagaᴋ oᴋarmat: Ahâk, naliutome tamattomane nunab inungit illuerearomavakka, siorniortitsomavakkalo, ikpigiᴋovlugit tamattominga.

¹⁹ Ogguarnarmêk uvanga ânianera pivlugo! Kilera piungitôngmat. Oᴋalauᴋpungale: Tamannale oᴋumaijutiksarijara, nangmaraksarivaralo.

²⁰ Tupiga sujuktaudlarpoᴋ, nussuktikka ilûnatik kiktorârsimavut; ᴋitorngakka aularsimavut uvamnit, saᴋᴋijarungnaipullo; issivitsijuksaᴋarungnaipoᴋ tupimnik, tâlutakkalo âᴋiksorlugit.

²¹ Mianersijut silaitungorsimangmatta, Nâlagarlo aperᴋutigingilât; tamanna pivlugo silatujomik piniarungnangilat, pairijangillo siamangavut.

²² Ahâk, pervalungnerub nipjârninga tamaungalerpoᴋ, perajalungnersoarlo nunamit taggardlermit, Judab iglugasaksoangit asseroromavlugit, inniksangortitsomavlugit terrianiangojârtunut.

²³ Kaujimavunga, Nâlagaᴋ, inuk aulalungimat nangminerminik; inuk pisuktoᴋ aulatsijungnangilaᴋ ablornerminik.

²⁴ Nâlagaᴋ, sugiarlaunga, nâpkiningnermele; ningarnerneungitoᴋ, mungortitsiᴋonak uvamnik.

²⁵ Kaningajârnît nâviuk nalojunut ilitarᴋsingitunut ilingnik, ataniovingnullo niplialungitunut atternut. Tâpkoa Jâkokut nerrilugit nungulaungmagit, ila, nerrisimavait nungulugillo, iglungillo asserorsimavait.