Jeremia 1 - Labrador Inuttitut Heritage Bible

¹ Tamadja Jeremiab, Kilkiab erningata ajoᴋertuijut Anatôtemêtut Benjaminib nunangane, ilangata oᴋauserijangit.

² Tâpsomunga Nâlakab oᴋausinga tikipoᴋ Josiab, Amonib erningata, ataniojub Judame, naliuningane, atanioningata jâringita 13ingane.

³ Tikipoᴋtauᴋ Jojakimib, Josiab erningata, ataniojub Judame, jâringita 11ingat tikidlugo, Jerusalemiut aularutijauningat tikidlugo, taᴋᴋit tellimangane.

⁴ Nâlakab oᴋausingata tikipânga tagva, oᴋarlunalo:

⁵ Aᴋiksoiᴋârtinanga ilingnik anânavit timingane, ilitarilauᴋpagit, aniᴋârtinak iglianganit ivsornaitilauᴋpagit, nalautaijuksangortilauᴋpagit inôᴋatigêksoarnut.

⁶ Uvangale oᴋalauᴋpunga: Ahâk, Nâlagaᴋ Gude! oᴋâlatsiarungnangilanga; inôsuluadlarama.

⁷ Nâlakable oᴋautivânga: Oᴋarniarnak inôsuluadlarnernik; namullônêt tiligupkit aijuksauvotit, sumiglônêt perᴋogupkit oᴋâlajuksauvotit.

⁸ Sivoraniarnak taipkoninga; ilingnênama piulijomavlutit, oᴋarpoᴋ Nâlagaᴋ.

⁹ Nâlakablo aggane issakpait, ᴋaneralo aktorlugo; Nâlakablo oᴋautivânga: Ahâk, oᴋausikka ilivakka ᴋanernut!

¹⁰ Takuit! Uvlome angajoᴋângortipagit nunaᴋatigêksoarnut ataniovingnullo; nussuksijuksauᴋovlutit serᴋomitsijuksauᴋovlutillo, asseroijuksauᴋovlutit oggotitsijuksauᴋovlutillo; igloliortuksauᴋovlutit ilijijuksauᴋovlutillo.

¹¹ Nâlakablo oᴋausingata tikipânga, oᴋarlune: Jeremia, sumik takovêt? Kiovungalo: Takovunga ajaupiarmik napârtomit kamatsiartomit.

¹² Nâlakablo oᴋautivânga: Nâmaktomik takovotit; kamatsarama oᴋausimnik, nâmaksijomavlugit.

¹³ Nâlakablo oᴋausingata tikipânga aipanganik, oᴋarlune: Sumik takovêt? Oᴋarpungalo: Ukkusingmik tertitomik takovunga, kênangalo taggamit tamaunga sangmivoᴋ.

¹⁴ Nâlakablo oᴋautivânga: Avangat kapianartoᴋ anijomârpoᴋ ilûnainut nunamêtunut.

¹⁵ Ahâk, erᴋârdlerêt ilûnaita ataniovingnit avanêtunit ᴋaiᴋojomârpakka, Nâlagaᴋ oᴋarpoᴋ, tikituksauvullo, ilûnatiglo atunit âᴋiksoijuksauvut iksivautamingnik Jerusalemib itertarvingita sivurâne, avaluᴋsoangitalo ilumajingita ilûnatik sivurâne.

¹⁶ Erᴋartuinikkalo tâpkoninga idluituliningit pivlugit oᴋautigijomavakka, ᴋemangmanga tipitsiariksaumiglo ikoâlatitsilaungmatta assimnut, aggangmingnullo sanajamingnik tuksiarviᴋalaungmatta.

¹⁷ Igville makkitikut tapserusijarit, nikovilutillo, oᴋâlavigikillo tamainik perᴋojamnik ilingnut; sivôraniarnak tâpkoninga, uimâlatitsiᴋonanga ilingnik tâpkoa sângine.

¹⁸ Ahâk, uvlome iglugasaksoangortipagit sôngojoᴋsôjunik, nappajoᴋsoangortilutillo kikiangmik, ᴋarmaᴋsoangortilarpillo ᴋaᴋᴋorlermik nunaᴋsûb ilûnanganut, Judab ataninginut, angajoᴋâᴋsoanginullo, ajoᴋertuijunginut, nunaᴋsûblo inugasaᴋsoanginut.

¹⁹ Unatarvigijomârpâtillo, sâlaginiangilâtille, ilingnênama, Nâlagaᴋ oᴋarpoᴋ, piulijomavlutit.