Jâkobusib 5 - Labrador Inuttitut Heritage Bible

Akluitut inertertauninginik, aklujut manigortauninginik. Kaiblaijutiksanik sunatuinarnik.

¹ Tagva ilipse akluitose, ᴋeavluselo avâladlaritse kappianartut naliutsomârmatta ilipsingnut.

² Perᴋutivaksoase auniovut, annorâselo ᴋaurulinut nerrimavut.

³ Goldise silberiselo mangertornerput; mangertorningillo kigligiutjutaujomârput ilipsingnut, uviniselo nerrijomârlugo ikomatut. Perᴋutivaksoarnik katersoilaukpose uvlut kingorliksangine.

⁴ Ahâk sanajut, perorsêvipsingnit katersoijut, akkiksangita ilipsingnut mikinersautitauningit nipliadlarput; katersoijullo (tâpkoa) nipliadlarningit Nâlekab Zebaotib siutîgingnut pimanerput.

⁵ Inônatsoridlalaukpose nuname, ikligijase maliklugit, ômatise akᴋeartortidlarlugit, sorlo nerᴋiksanik toᴋotsiviane.

⁶ Idluartok erᴋartulauᴋpase, toᴋodlugolo; tâpsomalo akkerartulaungilâse.

⁷ Tamanna pivlugo ᴋatangutikka, ᴋenuersâritse, Nâlegak tikitsiarilugo. Ahâk perorsêvilerijub perorsiat pivianartut nunamit nerriugivait, ᴋenuersârlunelo, silalutjautsiarivait uvlâkullo, unnukullo.

⁸ Ilipsetauk ᴋenuersâritse, ômatiselo nakoksitisigik; Nâlekab tikiviksanga ᴋaningmat.

⁹ Anersauminiarase ilase pivlugit, ᴋatangutikka, Erᴋartortauᴋonase. Ahâk erᴋartuijok upkuamêlerpok.

¹⁰ ᴋatangutikka, nelautaijut Nâlekab atingane oᴋâlalauktut igjaraksariniarsigik kappiasuktitaunerme ᴋenuersârnermelo.

¹¹ Ahâk piloringnerarpavut ᴋenuersârtut, kappiasuktitaugamik. Hiobib ᴋenuersârninga tussarpase, Nâlekablo sorairtitsininga (ânianinginik) takolaurivase; Nâlegak takupsoadlarlune nâpkigosuktotôngmat.

¹² Angnerôjomigle (oᴋaupapse) ᴋatangutikka, angalungniarase, ᴋilangmiglônêt nunamiglônêt assinginiglônêt taisiluse angalungnermut. Ahailârangapse, ahailârnise taimaile, aukârangapse, aukârnise taimaile; takkormôrnermut kataᴋonase.

¹³ Ilase kappiasuktitaugune, tâmna tuksiarle; ᴋuviasuktoᴋarupse, tâmna imgerutinik imgerle.

¹⁴ ᴋanimajoᴋarpat, ilagêt angajoᴋânginik ᴋaiᴋojile, tâpkoa tuksiarᴋovlugit pivlugo, mingoarlugolo orᴋsumik Nâlekab atingane.

¹⁵ Tuksiarnerublo okperniliub ᴋanimajok inûliniarpâ, Nâlekablo makitiniarpâ; idluitulilaukpallo, issumagijungnaivioniarpok.

¹⁶ Ajornipsingnik kigligiksaritse ilapsingnut, tuksiarutigêgitselo inûlijauᴋovluse. Idluartub tuksiarninga angijomik pitsartuneᴋarpok, ilungertornermut pigune.

¹⁷ Eliase inuk uvaptitun-idlune, ilungertordlune tuksiarmat silaluᴋojinane; silalungilak tâva nunamut jârine pingasune takᴋernelo pingasojortune.

¹⁸ Amalo tuksiarmingmat, ᴋilangmit silalulerpok, nunalo perorsiaminik sakᴋêdlarpok.

¹⁹ ᴋatangutikka, ilapse mikseᴋârnek tamaikpago, tâpsomingalo sâgiartitsijoᴋarpat,

²⁰ Tâmna ᴋaujilerle, idluitulijomik sâtitsilauktok apᴋotinganit tamarnartomit piuliklermat tarnemik toᴋomit, ajornivaksuit mattomaniartilugit.