Jâkobusib 4 - Labrador Inuttitut Heritage Bible

Silaksub ilusingatut issumaᴋarnek akkerartôtinermik sakᴋertitsivok. Pimariutertailerᴋojaunermik.

¹ Akkerartôtinek sorsungnerlo akunapsingne nakit pivâ? Ikligunek timipse avatingine ataniotijok pitjutigingilaûk?

² Pijomatudlarpose pinaselo; ômisukluselo anerutjivose, sulinaselo taimaigalloardluse; akkerartôtivluselo sorsukpose; peᴋaraselo sumik, tuksianginapse.

³ Tuksiaralloarpose, pititaunaselo, tuksiarnerluᴋapse, imaidluse, ikligunise nâmaksitilugit inôniaromavluse.

⁴ Nuliarêngnermik asseroijose, angutillo arnallo, ᴋaujimangilasê, silaksoarmiunik ilannâᴋarnek Gûdemik ômisungniongmât? Silaksoarmiunik ilannâᴋaromajok, Gûdemik ômisukteolerpok.

⁵ Aglait sulinatik oᴋarasugivisigîk: Anernek ilupsingnêtok ômisungnermik akkerartorosukpôk?

⁶ Anginersamigle saimarsaumik tunijidlarpok. Taimaimat aglait oᴋarput: Piojorijut Gûdib akkerartorpait, piojorijuitullo saimauserpait.

⁷ Tamanna pivlugo Gûde naipertugarivlugo pititse. Sâtanase akkerartorsiuk, ᴋemâniarpâse tagva.

⁸ Gûdemut ᴋaglititse, tâpsoma tagva ᴋagliniarpâse. Aggase ubvarsigik, ilipse ajortolit, ômatiselo sujungaitisigik ilipse maggogusertose.

⁹ Ajuleritse sanikteriluselo ᴋugvioleritse; ijornise mumigle ᴋugviornermut, ᴋuviasungniselo kiksarnermut.

¹⁰ Nikanarsâritse Gûdib sângane, tâpsoma tagva angijorortitsomârpâse.

¹¹ Terliarᴋatainiarase ilapsingnik, ᴋatangutikka. ᴋatangutiminik terliarᴋataijub, ᴋatangutiminiglo erᴋartuijub, tâpsoma perᴋojat terliarᴋatarivait, perᴋojallo erᴋartorpait. Perᴋojanigle erᴋartuiguvit, perᴋojanik malikteolungilatit, erᴋartuijôvotille.

¹² Atausênauvok perᴋojanik pititsijok, tâmna piuliklerungnarlarmelo asserortitsijungnarpok. Kinauvêt igvit assingnik erᴋartuijotît?

¹³ Ilipse, tagva pivapse, oᴋartose: Uvlome ᴋaupallônêt aularomavogut iglogasaksoarnut ipkonunga assinginullônêt, tagvane jâreme atautseme niuverniaromavlutalo pisiniaromavogut.

¹⁴ Ilipse ᴋanoelârtomik ᴋaupat nalojose. Inôsise ᴋanoengmât? Pujoênauvok ila, anikitoarsungmik pivlune, tâvale itsungnairpok.

¹⁵ Imâk oᴋangârtuksauvose: Nâlekab perᴋopago, inôguptalo, tamattominga assianiglônêt piniaromavogut.

¹⁶ Mânale piojorinipsingnik nertôtivose. Nertôtinerit taimaitut ilûnatik ajortôvut.

¹⁷ Ajungitomigle piniaraksaminik ᴋaujimajok, pinagolo, tâpsomunga idluitulijutauvok.