Jâkobusib 3 - Labrador Inuttitut Heritage Bible

Oᴋab atortautsiarninganik atornerluktauninganiglo. Silatunerub pângat pijub ilinganinganik ullapirsainartomik.

¹ ᴋatangutikka, ilûnatiungitok ajoᴋertuijôjomaniaratik, ᴋaujimagapta, anginersamik tagva erᴋartortaujomârapta.

² Ilûnata tamarpakapta sunatuinarnik. Oᴋautsemulle atautsemullônêt tamangitok, tâmna nâmaksivlune angutauvok, timetauk ilûnât idluitulitailititsungnarpâ.

³ Ahâk, horsit noᴋilautinut pivavut nâlektilugit uvaptingnik; timersoangillo aulatipavut.

⁴ Ahâk, umiaksuit, angijoksôgalloartut, anorersoarmullo ingergartitaudlaralloartut, akᴋôtearsungmut torârtitaulerput, akᴋotub pijomajanganut.

⁵ Taimaktauk oᴋak avatearsôvok, angijoksoarniglo pititsivok. Ahâk, ikomârsungmut napârtoksuit ikitaujungnangilât?

⁶ Oᴋaktauk ikomauvok, silaksoangolarmelo idluitoksoarnik tattadlune. Taimaidlune oᴋab avatipta akornganêtub time ilûnât ivsornartipâ, ikilugolo inôsivut ilûnât, ikitaugame Sâtanasib ikomanganut.

⁷ Nergjutillo tingmitjallo ᴋuglugiallo ômajoksuillo imaᴋsiutit ilûnatik nujuititaulerput, inungnut pitsartuêrutijauvlutik;

⁸ Oᴋarle inûb pitsartuêrutivlugo ajorpâ, nokᴋartitaujungnangitok una, ajortoksoak toᴋonartomik pitaliksôjok.

⁹ Tâpsomunga Gûde Atâta nakoridlarpavut, tâpsomungatauk inuit piluktauᴋovavut, Gûdib adsinganut pingortisimajut.

¹⁰ ᴋanermit atautsemit anijoᴋarpok nertordlernermiglo Piluktauᴋojinermiglo. ᴋatangutikka, taimaituksaungilarle.

¹¹ Puilavik killarmit atautsemit mamaktomiglo sungânitomiglo puilanajarᴋâ?

¹² ᴋatangutikka, napârtok paungatannaᴋarpaktok orᴋsumik perortitsijungnarᴋâ? Ubvalo napârtok vaineliksak paungatannanîk? Taimâktauk puilavik tarriomiglo imermiglo imaᴋarungnanginivok.

¹³ Kina akunapsingne illisimavlunelo silatuvâ? Tâmna ajungitulinerminik nalonaijaile inôtsiarnerminut, ᴋenuêlunelo silatolunelo.

¹⁴ Omatipsigulle anerutjinermik ᴋassilinartomik, akkerartornermiglo peᴋarupse, nertôtiniarase, saglunaselo mikseᴋârnek akkerartorlugo.

¹⁵ Ilisimanerle tamanna pângat pingilak nunamille, inungnit, Sâtanasemillo.

¹⁶ Anerutjinerlo akkerartornerlo pikablânermik idluitulinermiglo najorteᴋarmat.

¹⁷ Silatunerle pângat pijok sivorlermik ikliguktailivok, taimâktauk ullapirsausêjok, ᴋenuêtok, oᴋautsarêngitok, nâpkigosuktoksôjok ajungituliᴋattarlune, adsigêktitsijok, takkormôjuitok.

¹⁸ Idluarnerle taimaitut maliktingat karngasûtaulerpok ullapirsaume, taipkonunga ullapirsaumik atortunut.