Jâkobusib 2 - Labrador Inuttitut Heritage Bible

Nalâgut okpertôjut inub tautua atunginasugivât; okpernitiglo piniarnikut sakᴋertipât.

¹ ᴋatangutikka, issumaniarase, okpernek Jêsuse Kristûsemut, ânanaunerub Nâleganganut, inûb kinausinganik kamaᴋojingmat.

² Angut katimavipsingnut iterpat, goldemik ᴋeterdlermilik ânanaudlartomiglo annorâlik, aklujorletauk annorâluktok iterpat;

³ Kamagilerupsiuglo annorâtsiariktok oᴋarvigilugolo: Maunga igvit ingitit ânanaunersamut; aklujomullo oᴋarupse: Ingane igvit nangilerit, maungalônêt itikamnut ingitit;

⁴ Nâmaktomik issumaginajangilase tamanna; erᴋartuijôlertosele, idluitomik adsigêngititsivluse.

⁵ Nâlagitse, nagliktakka ᴋatangutikka: Silaksoarme mattomane aklujut, okpernermik akluilutik Gûdib anerilaungilagît, kingormgujeᴋovlugit nâlegauvingmik, nagliktiminut angerutigijaminîk?

⁶ Ilipsele aklujok nachogivase. Akluitut tâpkoangongilât aksorôtijise, kiglisiniarvingmullo pitilusê?

⁷ Tâpkoangongilât mitautilit atermik ajungitomik atserartaujutigijapsingnîk?

⁸ Ataniviksûb perᴋojanga (pijarialiksônerpâk) nâmaksitikupsiuk, aglait maliklugit: Inuᴋatit iliktut nagligiuk; idluartomik pivose.

⁹ Adsigêngititsigupsele inungnik, idluitulivose, tapatojoksôjutitullo perᴋojanut pidlartauniarpose.

¹⁰ Perᴋojanik tamainik nâlektub, atauserle nâlengikuniuk, tamaita pidlartaujutigivait tâpsoma.

¹¹ Imâk oᴋartok: Nuliarêngnermik asseroijuksaungilatit; tâmnatauk oᴋarmat: Inuartuksaungilatit. Nuliarêngnermik asseroingikalloaruvit, inuaruville, perᴋojanik tapatojoᴋsôvotit.

¹² Taimak oᴋâlatitse, taimaktauk piniaritse, erᴋartortaujomârtutitut perᴋojanut kivgaujungnaititsijunut.

¹³ Nâpkigosujuitorle nâpkigosujuitomik erᴋartortaujomârmat; nâpkigosungnerle nertôtivok erᴋartuinermut pijaunane.

¹⁴ ᴋanok atornarᴋâ, ᴋatangutikka, okperneᴋarnermik oᴋartoᴋarpat, ajungitulineᴋaranelô? Okpernerub taimaitub piulinajarpaûk?

¹⁵ ᴋatangulle angullônêt arnarlônêt peᴋangimarikpat, piksaminik ajoᴋsarlune;

¹⁶ Akunapsingnêtublo oᴋarvigikpagit: Gûdib ikajorlise, kitjaᴋejâritselo akᴋeartuleritse; tunitsiviginagillo timib piksanganik: ᴋanok ikajortiginajarᴋatsûk tamanna?

¹⁷ Taimâktauk okpernek ajungitulinermik ilaᴋangikune, toᴋungavok ingmine.

¹⁸ Oᴋartoᴋarajangikunele: Igvit okperneᴋarpotit, uvangale ajungitulineᴋartunga; okpernernik, piniarnernik ilaᴋangitomik, takotilaunga, okpernimniktauk takotiniarapkit piniarnimnit.

¹⁹ Atautsemik Gûdeᴋartomik okperpotit: idluartomik Taimâk pivotit; Sâtanasittauk tamattominga okperivut sajuklutiglo.

²⁰ Inugle atungitôjotit, nalojungnairomavêt, okpernek ajungitulinermik ilaᴋangikune toᴋungangmât?

²¹ Abraha atâtavut ajungutulinerminut idluarsititaungilâk, ernerminik Isaarmik tunerguserame Altaremê?

²² Tagva takovotit, okpernek piniarᴋattaungmat ajungituliningane, okpernerlo nâmaksititaungmat ajungitulinermut.

²³ Aglaillo nalautsivut imailijut: Abrahab Gûde okperivâ, tamannalo pivlugo idluarsititaulerpok, Gûdiblo ilannânganik taijauvlune.

²⁴ Takovose tagva, inuk idluarsititaulermat ajungitulinermut, okpernermut kissianut pinane.

²⁵ Taimaktauk anguniartok Rahabe idluarsititaungilâk ajungitulinermut, tilijaujuk illalioramigik, apᴋosiniublo assiagut aulartilugîk?

²⁶ Sorlo time toᴋungangmat anerneᴋangikune, taimaktauk okpernek toᴋungagivok piniarnermik ilaᴋangikune.