Jâkobusib 1 - Labrador Inuttitut Heritage Bible

Oᴋumaitoᴋartilugo ᴋenuersârᴋojaunermik. Piniarnikut Gûdib kivgartortaujuksauninganik.

¹ Jâkobuse, Gûdib Nâlekablo Jêsusib Kristûsib kivganga, kinguvârêt 12 it sunatuinarne siamangajut sivorlermik ᴋuviasûteᴋarᴋovakka.

² ᴋatangutikka nagligijakka, angijomik ᴋuviasugitse, sunatuinarnut ôktortaulerupse,

³ ᴋaujimavluse, okpernipse ôktortauninga ᴋenuersârnermik pakᴋertitsingmat.

⁴ ᴋenuersârnerle soᴋosijuituksauvok naggatânut, nâmakserᴋovluse, iluitôlerluselo, ajoksarᴋonaselo.

⁵ Ilapsele naliat silatunermik ajoksarune, Gûdemut tuksiarle, tâpsoma ilûnaita tunitsivigivait issumalingasuêrlune, naliallônêt ᴋipilugvigingilâ; tamattominga tagva tunitsivioniarpok.

⁶ Okperlunele tuksiarle, ᴋolarniarane; ᴋolartok imarbiksûb malingititut anoremut aulataumajutitun-ingmat.

⁷ Inuk taimaitok issumaᴋarniarane Nâlekamut sumik tunitjivioniarnerminik.

⁸ Inuk ᴋolartok maggoguserpok piniarnermine tamaine.

⁹ ᴋatangulle nikanarsârtok nertôtile ivlernarnerminik;

¹⁰ Akluitorlo nikanarnerminik nertôtile: asseroromârame iviksukab nuvugolângatut.

¹¹ Sekᴋinek kiaksôvlune nuilermat, iviksukat ᴋunulerput, nuvugolângillo katakput, tautuallo ânanaudlartok asserudlarpok: taimaktauk akluitok apᴋotimine paneromârivok.

¹² Piloridlarpok angut ôktortaunermik ᴋenuersârtok; ôktugaudlarame, tagva niaᴋôtemik ômanartomik pijomârpok Gûdib angerutigijanganik nagliktiminut.

¹³ Naliat ôktortaulerune, oᴋarniarane: Gûdemut ôktortaulerpunga. Gûde ôktorlukteunginame, ôktorniangilak atautsimiglônêt.

¹⁴ Inugle ôktortaulerpok ikligunerminut kajumiksartauvlunelo uerisartaugame.

¹⁵ Kingorngane ikligunek sâleᴋalerangame, idluitulinermik sakᴋertitsivok; idluitulinerle atortaukpat, toᴋomik sakᴋertitsivok.

¹⁶ Tamarniarase, nagliktakka ᴋatangutikka.

¹⁷ Tunergutit ajungitut ilûnatik, tunergutillo nâmaksijut ilûnatik pikangat pivut, ᴋaumajûb atâtanganit; tâpsomane soᴋoserneᴋangilak simertigêgatiglônêt tâktorlo ᴋaumajorlo.

¹⁸ Issumaminik tâpsoma ernertârilaukpâtigut, mikseᴋârnerub oᴋausertanginut; sivorliojôᴋovluta pingortitanginit.

¹⁹ Tamanna pivlugo, ᴋatangutikka naglingnartut, inuit ilûnatik atunit tussarlutik pisârlît, oᴋâlavlutigle pinasârlît, ningarlutiglo pinasârlît.

²⁰ Inûb ningarninga Gûdib idluarijanginik pingimat.

²¹ Taimaimat maᴋojungnartut ajornerillo tamaita pêjarniarsigik; akkerartoraselo ilaliorsiuk oᴋausek, ilupsingnut pititaujok, tarnipsingnik piloriktitsijungnartok.

²² Oᴋauserle nâletsiarsiuk, tussatuinarlugo pinase, taimailiornermut nangminipsingnik uivêrigapse.

²³ Tussatuinartoᴋarpalle oᴋautsemik, nâlengnagolo; tâpsoma adsigivâ angut, tachartôtikut kênaminik ᴋemergojok;

²⁴ Ingminik ᴋemergoᴋârdlune aularame, ilinganine tagvainak puigorlugo.

²⁵ Ullernairsitsiartorle perᴋojamik nâmamariktomik kivgaujungnaititsijomik, tâpsomanêdlunelo sorairane; tâmna puigorsârane tussatuinangilak, nâleklugole piniarpok; tamailiornermine tâmna piloringniarpok.

²⁶ Akunapsingnêtoᴋarpalle Gûdemik kivgartorasugijomik, oᴋanelo atornerluktailitingikuniuk, ômatinele asserorlugo: tâpsoma Gûdemik kivgartorninga piutsangilak.

²⁷ Idluartomik passijaksaungitomiglo Gûdemik kivgartornek Gûdib Atâtab sângane imaipok: Iliarsuit uigarnerillo siorniorningine takojartorlugit, nangminerlo ivsornartitautailivlune silaksoarmiunut.