I Timôteusemut 6 - Labrador Inuttitut Heritage Bible

ᴋaiblaijutiksanik sunatuinarnik.

¹ Ilûnatik kivgaujut kipalômavlutik nâlegatik naipertugarijaksarivait tamât; Gûdib atinga ajoᴋertûserlo mitautigijaulerᴋonagik.

² Okpertunigle nâlegalit nachogijaksaritsangilait ᴋatangutigêkamik, taimaitulle kivgartuluarlugit, okpertôngmatta naglingnartôngmattalo, pitsiarnermik illangiubveᴋartut. Taimâk ajoᴋertuilutillo ᴋaiblainiarit.

³ Taimaingitomik ajoᴋertuijoᴋarpat, Nâlegaptalo Jêsusib Kristûsib oᴋausingit atsuilinartut nâlengikunigit, ajoᴋertûseᴋarunelo Gûdemik nâlengnek issumaginago,

⁴ Tâmna piojorivok nalojoᴋsôvlunelo, akkerartorosukporle apersûteᴋarlarmelo oᴋausetuinait pivlugit; tamattomangat anerutsinerlo, aivanerlo, mitautiksanerlo issumalungnerlo pivut,

⁵ Akiortigêngnerillo piungitut inungne asserorsimajunik issumalingne, mikseᴋârnermiglo aᴋsârtaujune, Gûdemik nâlengnek perᴋutiksarsiorutaunasugilugo pijune. Taimaitut alakit.

⁶ Nâlengnerle Gûdemik, nâmagilugolo tunergutâ, tamanna angijomik nakoksinartok.

⁷ Itertitsinginapta sumik silaksoarmut; taimaimat, anititsijungnanginiarivogut sumik, nalonangilak.

⁸ Nerᴋiksaᴋaruptale annorâᴋarlutalo, nâmagilavut.

⁹ Akluitsomajulle ôktortaulungnermut nikkanullo katangniarput, unuktunullo silainartunut asserornartunullo kajungilârnernut; taimaitut inuit kivitipait kappianartomut erᴋartortaunermullo.

¹⁰ Pijomatudlarnek amângongmat ajortunut tamainut. Tamanna ilangita ikligilauramitsuk, okpernek tamaigivât, kappianartoksoarniglo ingmingnut pititsivut.

¹¹ Igville, Gûdib inuᴋotinga, tamakkoa allakit; idluarnerle, Gûdemiglo nâlengnek, okpernerlo, naglingnerlo, ᴋenuersârnerlo, ningajuinerlo pinasuakit.

¹² Sorsungniarit ajungitomik okpernerub sorsungninganik, inôsek nâksaungitok tiguniaruk, tamattomunga ᴋaiᴋojaumagavit, nalonaigaumiglo ajungitomik nalonailêmavlutit unuktut tussâtilugit kigligiudsijungnartut.

¹³ Gûdib, tamainik ômartitsijub, Kristûsiblo Jêsusib, Pontiuse Pilatusemut nalonaijaumik ajungitomik kigligiudsilauᴋtub sângane perᴋovagit:

¹⁴ Nâleᴋovlutit perᴋojanik ivsornailutit, passijaksautaililutillo, Nâlegapta Jêsusib Kristûsib sakᴋerviksanga tikidlugo.

¹⁵ Tamanna piloriktoksôjub ajugaᴋangitotôjublo, ipsoma atanivît ilûnatik atanerimangata, nâlekallo ilûnatik nâlegarijangata naliunermine sakᴋertitsomârpâ.

¹⁶ Toᴋosuitotôjok tâmna, ᴋaumajome tikiviksaujungnangitomêtok; inûb atautsiblônêt takolaungitanga takojungnangitangalo, tâmna nertortaunermik pile nâlegauvingmiglo issoᴋangitomik! Amen.

¹⁷ Akluitut silaksoarme tamattomane oᴋautikit pimariuterᴋonagit, perᴋutimingniglônêt ᴋolarnartunik tatteᴋarᴋonagit, Gûdemigle ômajomik; tâpsoma tamainik angijomik tunitsivigingmatigut atoraksaptingnik;

¹⁸ Pitsiarnerᴋovlugit, ajungitulinermiglo akluiᴋovlugit, ᴋununatik tunijerᴋovlugit ikajorᴋovlugillo assimingnik;

¹⁹ Taimailiordlutik ingmingnut tungaviksautsiartunik perᴋutiksarsiniarᴋovlugit naliutuksamut, inôtsemik nâksaungitomik tigusijungnarᴋovlugit.

²⁰ Omât! Timôteuse, ilingnut sungertûtigijaumajok ivlerit sainaruk, allakillo oᴋâlagalâdlarnerit anerniliungitut ᴋoksalainerit, inuillo sulinatik nertôtijut ilisimanermik akiortigêngningit.

²¹ Ilangit taimaitoᴋarlutik oᴋarput, okpernek tamaigivlugo. Saimarsautib illagilitit. Amen. Sivorlit makkoa Timôteusemut aglaktaumavut Laodizêamit iglugasaksônerôjunit Frigiame Pakatianame.