I Timôteusemut 5 - Labrador Inuttitut Heritage Bible

Illagêktut, taimaktauk uigarnerit angajoᴋaunerôjullo piniarviojuksauninginik ᴋanok.

¹ Itomik suangniarnak, atâtatulle ᴋaiblarniaruk; inôsuktut angutit ᴋatangutititut;

² Ningiut anânatitut; inôsuktut arnat ᴋatangutititut ikligujuinerme.

³ Uigarnerit opigikit, idluarlutik uigarniojut.

⁴ Uigarneᴋarpalle ᴋitorngalingmik erngutalingmiglônêt, taimaitut ᴋitorngangit ilinniarᴋârlît Gûdib idluarijanganut angajoᴋauniarlutik ilamingnut, akkiniarlutiglo angajoᴋâmingnik; tamanna ajungimat ᴋuviagijauvlunelo Gûdemut.

⁵ Tâmnale uigarniovok idluartok, inutôgune, Gûdemik tattetuaᴋarune, sorairanelo ᴋenuvlune tuksiarlunelo uvlôtilugo unnuamelo.

⁶ Uviniuble ᴋuviagijanganut inôjok inôvlune toᴋungavok.

⁷ Tamattominga oᴋautiniakit, passijaksauᴋonagit.

⁸ Naliatale illane, anginersamik iglomioᴋatine, patangaitingikunigit, tâpsoma okpernek misiarutigivâ, okpingitomillo ajuluarpok.

⁹ Uigarnek anerijautailitilugo, jâreᴋangipat 60 nik, nuliangolauklune angutemut atautsemut;

¹⁰ Piloriktoᴋutaungmijok ajungitulinermik, ᴋitornganik perorsailaurune, siniktarviogajuklune, ivsornaitut (okpertut) itiganginik ubvalauklune, ajoᴋsartuniglo pitsialauᴋlune, ajungitunik tamainik pinasualauklune.

¹¹ Uigarnerille inôsuktut allakit; ikligudlarunik Kristûse nâlegungnairlugo, uinigomavut;

¹² Erᴋartortaumavlutik, okpernek sivorlek serᴋominamitsuk.

¹³ Taimaktauk erᴋeasukput, sungiutilerput iglut iterᴋattarlugit; erᴋeasutuinangilalle, ᴋaneᴋadlarivuttauk terliaᴋataivlutik, oᴋauteᴋarlarmiglo oᴋautigijaksaungitomik.

¹⁴ Taimaimat uigarnerit inôsuktut uiniktârᴋovakka, ᴋitorngilutik, iglomingnik pairᴋsilutik, akkerartortok pitjuteᴋarᴋonago oᴋausiluklune.

¹⁵ Ilangit kiglomorlutik, Sâtanasemut sâsimalerêrmatta.

¹⁶ Okpertorle angullônêt arnarlônêt uigarneᴋuteᴋarune, tâmna patangaititaksarivâ, illagêt oᴋumaititauᴋonagit; taipkoa nalâgôrtomik uigarniojut nâmatuinartomik peᴋarᴋovlugit.

¹⁷ Angajoᴋaunerôjut piniaraksamingnik idluartomik pijut magguertorlugit opigijaulît; piluarlugille oᴋausilerijut ajoᴋertûsilerijullo.

¹⁸ Aglait imaingmatta: Ivjarusêjuksaungilatit tuktuvangmik (sulugainernik) tullertomik; imâglo: Sanajok akkilertaujariaᴋarpok.

¹⁹ Angajoᴋaunerôjomik passiklernek illaliortaililugo, kisiane maggûngnik pingasuniglônêt kigligiutsijoᴋarpat.

²⁰ Idluitulijut inertikit ilûnatik tussâtilugit, sivôralerᴋovlugittauk assingit.

²¹ Gûdib, Nâlekablo Jêsusib Kristûsib Engelillo anerimajut takoane pivagit, nâleᴋovlutit tamakkoninga tamainik, issumangnik pinak, naliallônêt mânetuinak ilannârinersarinago assianit.

²² Naliat aggangnut tuavidlutit patingmingniarnago; illangiubviginiarnagittauk assivît ajorningit. Nangminek ivsornaitsainarit.

²³ Imituinarmik imiksatuaᴋarungnairit, vainetuarsulerille aᴋearoit (sangêtok) pivlugo, ᴋanimaluᴋattalarpillo.

²⁴ Inuit ilangita ajorningit sivorngagut sakᴋijârput, erᴋartortaujungnarlutik; ilangille kingorngagut sakᴋeromârput.

²⁵ Taimâktauk ajungitulinerit ilangit sivorngagut nelonangilat; assingillo taimaingitut ijerartortaujungnanginivut.