I Timôteusemut 4 - Labrador Inuttitut Heritage Bible

Ajoᴋertuinerluktut, neliutut kingorlingine sakᴋijâromârtut, mânale sakᴋijârêrtut maliktaujuksaungininginik. Arvertatsiarᴋojaunermik.

¹ Anernerle tukkisinartomik oᴋarpok, neliutut kingorlingine ilangit okpernermit katangniaromârmatta, ungajomârmattalo anernernut uivêriklertunut, Sâtanasiblo ajoᴋertûsinginut.

² Takkormôrnermut saglojunik oᴋausilit, ôsimajomiglo nalunaikutaᴋartut issumamingne;

³ Tâpkoalo okpertut mikseᴋârnermiglo ilitarsijut nuliarêlerᴋongilait, aglerᴋovaillo nerᴋiksanik Gûdib pingortitanginik, ᴋujalinermut tigujaksanginik.

⁴ Gûdib pingortitangit ilûnatik nâmangmatta, nachonartoᴋangilarlo, ᴋujalinermut tigujaukpatta.

⁵ Ivsornaititaulermatta Gûdib oᴋausinganut tuksiarnermullo.

⁶ Tamakkoninga ᴋatangutigêt ajoᴋertorungne, Jêsusib Kristûsib nâmaktomik kivgariniarpâtit, inugoijaumajotit okpernermik oᴋautsine, ajoᴋertûtsinelo idluartune nâlainalauktarne.

⁷ Koksalaituniglo tukkeᴋangituniglo oᴋâlagalâdlartut illaginiarnagit. Nangminerle sungiutigannerit Gûdib pinginik.

⁸ Timib pinginik sungiutigannernek atornarniᴋingmat; Gûdemigle nâlengnek atornarpok tamainut, angerviomajoktauk inôtsemik mânêtomik neliutuksamiglo.

⁹ Tamadsa oᴋausek okpernartoᴋsoak, angijomiglo nâleluariaᴋarnek.

¹⁰ Tamattomunga torârtitsivluta sananasuaraptatauk, mitautigijaulaptalo, Gûde ômajok tatigigaptigo, inuit ilûnatik piulijingat anginersamigle okpertut.

¹¹ Tamakkoninga oᴋautilugillo ajoᴋertukit!

¹² Inôsungnernik nachojoᴋarniarane! Igjaraksaunialerille okpertunut, oᴋautsemullo inôniarnermullo nagligosungnermullo anernermullo okpernermullo ikliguktailinermullo.

¹³ Ataruililerille aglangnik atuarsilutit, ᴋaiblailutillo ajoᴋertuilutillo tikitsiarilunga.

¹⁴ Issumagitsainaleruk tunergut saimanartok, ilungnêtok, tunergutaumajok ilingnut nelautaijut oᴋausingit maliklugit, angajoᴋaunerit aggangmingnut patingmingmatit.

¹⁵ Tamakonanêtsainarlutit; pigannernît ilûnainut sakᴋerᴋovlugo.

¹⁶ Nangminerniglo ajoᴋertûtsemiglo udjertorit; tamakkoninga sorairtaililutit. Taimailioruvit, ilingniglo tussâjingniglo piuliklerniaravit.