I Timôteusemut 3 - Labrador Inuttitut Heritage Bible

Ilagêt akorngane piniaraksaᴋartut ilingajuksauninginik ᴋanok. Oᴋpernerub nelonarningata ilinganinganik.

¹ Oᴋausek okpernartoᴋsôjok tamadja: ajoᴋertuinerôjomajok pijariaᴋortojomik kajumikpok.

² Taimaimat ajoᴋertuinerôjok passijaksausuertuksauvok, arnab atautsib uinga, kamatsiatsainarlune, nâmatuinartomik pilune, ilusitsiariklune, siniktarviogajuklune, ajoᴋertuitsiarajuklune;

³ Vainetuluadlarane, ileranartaililune, nachonartomik perᴋutiniarasuartaililune, inôtsiarlunele, ningarosuktaililune, pijomatudlarane;

⁴ Iglomioᴋatiminik pairᴋsitsiartok, nâlektunik ilusitsiariktuniglo ᴋitorngaᴋartok;

⁵ (Iglomioᴋatiminigle pairᴋsinermik nelojub, ᴋanok Gûdib illagêktoᴋotingit pairiniarajarpagît?)

⁶ Okpilerᴋammertoungitok, piojorerᴋonago Sâtanasiblo erᴋartuininganut kataᴋonago.

⁷ Piloriktoᴋutaujariaᴋarmigorle ilagingitaptingnut, mitautigijaunermut Sâtanasiblo napertitsininganut kataᴋonago.

⁸ Taimâktauᴋ (illagêt) kivgangit ilusitsiariktuksaugivut; maggôilinagit oᴋautsitik, vainetuluadlaratik, nachonartomik perᴋutiniarasuartailivlutik.

⁹ Okpernerub nelonarninganik torᴋuivlutik issumame ivsornaitome.

¹⁰ Taimaitullo ôktortauᴋârlutik pijariaᴋarput, kingorngane kivgartorᴋojaulît passijaksaulingikunik.

¹¹ Taimâktauk nuliangit ilusitsiariktuksaugivut, terliaᴋataitaililutik idluartomik iliortuksauvlutik, nertornartuksauvlutiglo ilinganerne ilûnaine.

¹² Kivgartortit atunit atausênarmik nuliaᴋartuksauvut, ᴋitorngamingnik iglomioᴋatimingniglo pairksitsiarlutik.

¹³ Idluartomigle kivgartortut, tâpkoa nangminermingnut nertornautiksarsivut nâmaktomik, nakoksitiksarsilarmiglo angijomik okpernermingne Kristûse Jêsusemut.

¹⁴ Tamakkoninga aglagvigivagit; neriuklungalo Mânakasâkut tikiviginiarasugilutit;

¹⁵ Mullulerumale, ᴋaujimaᴋovlutit iliortuksaunernik Gûdib iglungane; tamadja Gûdib ômajub ilagêktitangit, mikseᴋârnerub sukanga tungavingalo aulajungnangertok.

¹⁶ Akkerartortaujungnangitomik angijôvoᴋ Gûdemut okpernerub nalonarninga: Gûde uvingme sakᴋijârsimavok, idluartitauvlune anernermigut, takotilune Engelinut, oᴋautigijauvlune nelojunut, okperijauvlune nuname, ᴋongmuartitauvlune ânanaunivingmut.