I Timôteusemut 2 - Labrador Inuttitut Heritage Bible

Tuksiarutjijuksaunermik. Angutit arnallo ilusiksanginik.

¹ Tagva mâna ᴋaiblaivunga, tamainit sivorlermik ᴋenujoᴋarᴋovlugo, tuksiartoᴋarᴋovlugolo, ᴋujalijuteᴋartoᴋarᴋovlugo inuit ilûnaita pivlugit;

² Atanivîllo atanersuillo tamaita pivlugit, ullapitaunangitomik terlingnartomiglo inôseᴋarungnarᴋovluta Gûdemik nâlengnêrme ilusitsiaringnermelo.

³ Tamanna idluarmat, ᴋuvianarlarmelo Gûdemut piulijiptingnut;

⁴ Tâpsoma inuit ilûnaita piulijauᴋojomavait, mikseᴋârnermiglo ilitarsititaulerᴋovlugit.

⁵ Gûde atausiongmat, atausiogivok pijitsertok Gûdeme inungnelo, tagva inuk Kristûse Jêsuse;

⁶ Ingminik tunilauktok piulijiksaujomavlune ilûnainut, tamanna oᴋâlatigijauᴋovlugo neliuningane.

⁷ Tamattominga oᴋâlajungortitauvlungalo Apostelingortitaujunga, (nelâgôrtomik oᴋarpunga Kristûseme, saglunanga) nalojunik ajoᴋertuijungortitaujunga, okpernermelo mikseᴋarnermelo.

⁸ Tagva mâna pijomavunga, angutit tuksiarᴋovlugit ilûnâne, aggatik ivjornaitut kiviklugit, ningarosugatik ᴋolaratiglo.

⁹ Taimâktauk arnat iktôrnermullo ilusitsiariklutiglo ânanausititserᴋovlugit ingmingnik; nujamingnik pergainermut, goldemullônêt, sapanganullônêt, annorânullônêt akkitudlartunut pinatik;

¹⁰ Arnalle, Gûdemik nâlektut, pijariaᴋarningititut, ajungitulinermut.

¹¹ Arnak nippangerdlune ilinniartuksauvok, ilûnâne nâleklune.

¹² Arnarle ajoᴋertuijomajok inertertailiniangilara; atanioᴋongminago uiminut, niporlunelo pijuksauvok.

¹³ Adame pingortitauᴋârmat, kingorngagut Eva.

¹⁴ Adamelo uivêrijauᴋâlaungilak, arnarle uivêrijaulaukpok, nâlegungnainermiglo pititsilertok.

¹⁵ Arnalle piulijaujomârput ᴋitorngivaklutik, okpernermêtsainarunik, naglingnermêtsainarlutiglo, ivjornailivalliavlutiglo, ilusitsiariklutik.