I Timôteusemut 1 - Labrador Inuttitut Heritage Bible

Timôteuse kivgartutsiariaᴋarninganik erᴋaititauvok, soᴋosijuidlune oᴋautsit tussarnertut ilaᴋangitut atavigilugit.

¹ Pauluse Jêsusib Kristûsib Apostelinga, Gûdib piulijipta, Nâlekablo Jêsusib nerriugijaksaᴋartitipta perᴋojanganut,

² Timôteusemut ernimnut nalâgôrtomut okpernerme: Gûdib Atâtapta, Nâlekablo Jêsusib Kristûsib saimarsautiminut, nâpkigosungnerminullo, ullapirsautiminullo ilagilitittôk!

³ Piniarit, sorlo ᴋaiblalaurapkit, Efêsusemêtuarᴋovlutit, Mazedôniamut ailaurama, perᴋojerᴋovlutit illanginik, ajoᴋertûseᴋarᴋonagit assianik;

⁴ Nâlengniarᴋonagillo tukkeᴋangitomik oᴋâlajunik, apersûteᴋartuniglo illagêt kinguvângit naggateᴋangitut pivlugit; tamakkoa apersûtinermik atortitsinersaungmatta, Gûdemut idluartitsinermit okpernerme.

⁵ Perᴋojat nalonairtitangat angnerpâk imaingmat: Naglingnek ômamut ivsornaitomut, issumamullo passijaksaungitomut, okpernermullo takkormôjuitomut.

⁶ Tamakkoa tunupait illangita oᴋâlagalâdlarnernut piungitunut sâlerlutik.

⁷ Ajoᴋertuijôjomagamik perᴋojanik, oᴋautsitiglônêt oᴋautigijaksatiglônêt tukkisinagit.

⁸ Perᴋojalle ᴋaujimavavut ajungitoᴋsôngmatta, idluartomik atortaukpatta;

⁹ Tamanna ᴋaujimavlugo, perᴋojat tunijaungimatta idluartok pivlugo, idluitulijulle, tappatojullo, Gûdemiglo nâlengitut, ajortulijullo, ivsornartulijullo, ᴋuksalaitullo toᴋotsijullo atâtamingnik anânamingniglo, inuartullo,

¹⁰ Assiniartullo, nukapitjaniglo uivêriklertut, inungniglo tigliktut, saglotojullo, angerluktullo assingillo taimaitut ajoᴋertûtsemik atsuilinartomik akkerartortut pivlugit;

¹¹ Gûdib piloriktub oᴋausingit tussarnertut ânanaudlartut maliklugit; tâpkoa oᴋautigijaksarilugit perᴋojauvunga.

¹² Kristûselo Jêsuse Nâlegavut ᴋujagivara, nakoksitigijara, idluarasugilunga kivgartortilaungmanga tamattominga;

¹³ Sivorngagut mitauteᴋartoksôjunga (Gûdemik) unangmiklertoksôlarmalo, oᴋauserluktiolarmalo; nâpkigijaulertungale, nalovlunga okperneᴋarnangalo taimailiulaurama.

¹⁴ Nâlegaptale saimarsautâ angiluartoᴋsôlauᴋpok (uvamne), okpernerlo naglingnerlo Kristûse Jêsusemêtûk.

¹⁵ Oᴋausek okpernartoᴋsôjok tamadja, angijomik nâleluariaᴋarnek, Kristûse Jêsuse nunamut tikingmat idluitulijut piulijartorlugit, tâpkonangat uvanga anginerôjunga.

¹⁶ Taimaimalle nâpkigijaulerpunga, Jêsuse Kristûse sakᴋertitserᴋovlugo ᴋenuersârnerminik, piluartomik uvamne, igjaraksaulerᴋovlunga okperomârtunut tâpsomunga inôseᴋarniardlutik issoᴋangitomik.

¹⁷ Gûdele, atanivik issoᴋangitok, nungusuitorlo, takuksaungitorlo silatujotôjorlo nâlengnarsile nakoridlartaulunelo issoᴋangitoksoarmut. Amen.

¹⁸ Mattominga perᴋojamik unertôtivagit, ernera Timôteuse, oᴋautsit ipkua nalautsitiksat ilingnut pimajut pivlugit, malingniakit tamakkonane ajugaulerᴋovlutit.

¹⁹ Okperneᴋarᴋovlutillo, passijaksaungitomiglo ilumiuteᴋarlutit; tamanna ilangita pingudlarpât, okpernermik umiolerdlutik.

²⁰ Taipkoa ilâgik Himenêuse Aleksanderelo. Tâpkoa Sâtanasemut pitilauktâkka, sugiartauᴋovlugik mitauteᴋarungnairᴋovlugik.