I Tessalônikamiunut 5 - Labrador Inuttitut Heritage Bible

Kristûsib tikitsomârninganik. Kaiblainernik sunatuinarnik. Salutitsinermik.

¹ Neliutuksaujomârtunigle Stûndiniglônêt, ᴋatangutikka, aglagvigijariaᴋangilapse.

² Nangmineᴋ ᴋaujimatsiarapse, Nâlekab uvlunga neliutijomârmat, sôrlo tigliktotut unnuaᴋsiortotut.

³ Oᴋaromârpatta: Terlingnatuinarpoᴋ, sivôranartoᴋangilaᴋ; asserornartub tagva tagvainaᴋ tikidlaromârpait, sôrlo ânianartûb arnaᴋ ernisuktoᴋ tikidlarmago; ᴋemâjungnaromângilallo.

⁴ Ilipsele, ᴋatangutikka, tâᴋtomêngilase; tamanna pivlugo uvluksab taipsoma tigliktotut opingarniatsangilâse.

⁵ Ilûnase ᴋaumajub ᴋitorngarivâse, uvlublo ᴋitorngarivâse; unnuab ᴋitorngaringilâtigut tâᴋtublônêt.

⁶ Taimaimat siningniarata assiptitut; erᴋomaniartale silatuniarlutalo.

⁷ Siniktut unnuame sinidlarmatta, tallatullo unnuame talladlarput.

⁸ Uvagulle, uvlub ᴋitorngaringmatigut, silatuniarta; atimavlugik okpernerlo naglingnerlo, sagvingmiutarivlugik, niaᴋôteᴋarlutalo nerriungnermik piulijauniarnermik.

⁹ Gûdib ningarnartuksaliarilaungimatigut, piloringneᴋarᴋovâtigulle Nâlegaptigut Jêsuse Kristûsikut.

¹⁰ Tâmna toᴋovoᴋ pivluta, inôᴋatigivlugo perᴋovluta, erᴋomatilutalônêt siniktilutalônêt.

¹¹ Tamanna pivlugo kaiblartigêgitse, idluarsartigêkluselo, sôrlo piniarapse.

¹² ᴋatangutivulle, inaksorpapse, issumaginiarsigik ajoᴋertuijut ilipsingnik, pairijigijaselo Nâlekame kaiblartigijaselo.

¹³ Piniarningit pitjutigilugit anginersauluartomik nagligisigik! Ullapirsauteᴋatigêgitselo.

¹⁴ Kaiblarpapsele, ᴋatangutivut, iluserluktut inertersigik, ômatikitut manigorsigik, sangêtut merngortôtiginiarasigik ᴋenuersâritselo ilûnainut.

¹⁵ Udjertoritse idluitulijoᴋ akkiniartautailitilugo ajortomik, ajungitomigle pinasuatsainaritse, illapsingnullo ilûnainullo.

¹⁶ ᴋuviasutsainaritse.

¹⁷ Sorairase tuksiaritse.

¹⁸ Tamainik ᴋujalititse: tamadja Gûdib pijomajanga ilipsingnut Kristûse Jêsuseme.

¹⁹ Anernek ᴋamitailitisiuk.

²⁰ Nelautainerit nachogitailisigik.

²¹ Tamaitale kiglisiniarsigik; ajungineᴋ piksarilugo.

²² Idluitulijutaujârnerit tamaita atorniarasigik.

²³ Nangminerle Gûdib ullapirsaijub ivjornaitilise ilûnâne ilupsigut, anerniselo, tarniselo, timiselo iluêngarlutik saputijautsainarlit pidlaraksauᴋonagit Nâlegapta Jêsusib Kristûsib tikiviane.

²⁴ Nertornarpoᴋ ilipsingnik ᴋaiᴋojijoᴋ; tâpsomalo taimailiorviginiarpâse.

²⁵ ᴋatangutikka, tuksiarutiniartigut.

²⁶ Salutisigik ᴋatangutigêt tamaita salutimut ivsornaitomut.

²⁷ Nâlegaᴋ taivlugo perᴋovapse, aglait ukkua atuartauᴋovlugit ᴋatangutigênut ivsornaitunut tamainut.

²⁸ Nâlegapta Jêsusib Kristûsib saimarsautingata illagilise. Amen. Aglait sivorlit Tessalônikamiunut aglaktaumavut Atêneme.