I Tessalônikamiunut 4 - Labrador Inuttitut Heritage Bible

Gudib idluarijanganut inôniarᴋojaunermik. Nâlekab tikitsomârviane sulle inôjut ilingajomârninginik ᴋanoᴋ.

¹ Ama ᴋatangutivut, inaksorpapse kaiblarluselo Nâlekame Jêsuseme, nâmaksivalliarᴋovluse, sôrlo tussarapse uvaptingnit ᴋanoᴋ inôniariaᴋarnermik, Gûdemut ᴋuviagijauᴋovluse.

² ᴋaujimagapse perᴋojat nelênik tunitgivigilaurapse Nâlekamit Jêsusemit.

³ Tamadja Gûdib pijomajanga: ivjornaituksaunise, assiniarneᴋ ulloreagivlugo.

⁴ Nelise atunit nelungile illuleᴋutine (timine) pairivlugo ivjornaiᴋovlugo nertornarsilune;

⁵ Ikligunermut êgiangusâdlarane nelojutitut Gûdemik ᴋaujimangitutitut.

⁶ Neliselo ᴋatangutiminik oᴋumaititsitailile uivêrinagolo sumut; Nâlegaᴋ tamakkoninga tamainik akkiniarteongmat, sôrlo oᴋarvigilaurapse ipsomane kigligiutigivlugo.

⁷ Ivsornartomut Gûdib ᴋaiᴋolaungimatigut issornaitomulle.

⁸ Taimaimat tamattominga nachojoᴋ inungmik nachongilaᴋ, Gûdemigle, Anernerminik ajunginermik ilipsingnut tunijijomik.

⁹ Naglingnermigle ᴋatangutinik aglagvigijariaᴋangilapse, nangmineᴋ Gûdemut ajoᴋertortaugapse nagliktigêrᴋovluse.

¹⁰ Taimailiorvigigivase ᴋatangutigêt tamaita, Mazedôniamêtut ilûnâne. Kaiblarpapsele, ᴋatangutivut, nâmaksivallianersauᴋovluse sulle.

¹¹ Pinialeritselo nipordluse, piniarâksaselo piniarlugit, aggapsingnullo senaniarluse pititse, sôrlo perᴋolaurapse;

¹² Ilusitsiarikluse arvertarᴋovluse illagingitapsingne, taipkoalo illanganik atoriaᴋarᴋonase.

¹³ Siniktunigle (toᴋungajunik) neloᴋojomangilapse, ᴋatangutivut, kiksarᴋonase assipsitut nerriugijaksaᴋangitutitut.

¹⁴ Okperupta, Jêsuse toᴋovlunelo makisimangmat, Taimâktauᴋ Gûdib ipkua Jêsuseme sinisimajut neksaromârivait illagilerdlugit.

¹⁵ Imaitomigle oᴋautivapse Nâlekab oᴋausinganik: Uvagut, amiakôvluta inôjogut Nâlekab tikiviane, sinisimajut ingiarniatsangilavut.

¹⁶ Nangmineᴋ Nâlegaᴋ ᴋilangmit aᴋᴋaromârmat nippersoarmut kajungersarnartomut, Engelit ataningata nippinganut, Gûdiblo tiptulautinganut, Kristûsemelo toᴋungajut makerᴋâromârput.

¹⁷ Kingorngagut uvagut, inôjogut amiakôvluta, taipkoa illagivlugit aularutjaujomârpogut nuvujatigut, Nâlegaᴋ pagrearvigilugo silakut; taimaidlutalo Nâlegaᴋ najutsainarniarpavut.

¹⁸ Tagva oᴋautsinut tamakkonunga manigortigêgitse.