I Tessalônikamiunut 3 - Labrador Inuttitut Heritage Bible

Naglingnermut Timôteuse tâpkonunga tilivâ.

¹ Tamanna pivlugo kipiniangudlarapta, idluarivavut kissipta pailerluta Atêneme;

² Timôteuselo ᴋatangutivut, Gûdib kivganga, uvagullo piniaᴋativut oᴋautsinik tussarnertunik Kristûse pivlugo, tililauᴋpavut nakoᴋsititauᴋovluse kaiblartauᴋovluselo okpernipsingne;

³ Sôngojungnaitoᴋarᴋonago kappianartunut tamakkonunga; nangmineᴋ ᴋaujimagapse taimaitunut ilingatitaugapta.

⁴ Najordluselo pigapta, oᴋautilaurivapse sivorngagut kappiasuktitaujomârniptingnik; sôrlo nelautsimangmattauᴋ, sôrlolo ᴋaujimagapse.

⁵ Tamanna pivlugo uvangatauᴋ kipiniangudlarama, tililauᴋpara, okpernipsingnik tussaromavlunga; ôktorluktemut ôktortaulauralloarmangâpse, senanivullo sulinginiarmangâllônêt.

⁶ Mânale Timôteusib tikingmatigut ilipsingnit, tussarominartomiglo unipkautivluta okpernipsingnik naglingnipsingniglo, issumagênaraptigullo idluartomik kipivigivlutalo takojomavluta, sôrlotauᴋ uvagut tussugapta takojomavluse:

⁷ Tamattomunga, ᴋatangutivut, manigorutigilerpapse okpernise pivlugo, kiksarniptingne kappiasuktitauniptingnelo tamaine.

⁸ Mâna tagva inôlerivogut, Nâlekame aulajungnairapse.

⁹ Sunamik Gûde ᴋujagivlugo akkiniarungnarpitigô pivluse, ilipsingnit ᴋuviasûtigijavut tamaita pivlugit Gûdipta sânganê?

¹⁰ Angijomik tuksiarpogut uvlôtilugolo unnuamelo, kênase takojomavlugit, âᴋiksoromavlugolo âᴋigaksaᴋarpat okpernipsingne.

¹¹ Gûdiptale Atâtaptalo, Nâlegaptalo Jêsusib Kristûsib nangmineᴋ apᴋotiksaᴋartilitigut ilipsingnut.

¹² Nâlekable aglivalliatilise, iluêngarnersautiliselo naglingnerme illapsingnik ilûnainiglo, sôrlo uvaguttauᴋ ilingagapta ilipsingnut;

¹³ Omatise nakoᴋsititauᴋovlugit, pidlaraksautaililutik ivjornailinerme Gûdib Atâtaptalo sângane, Nâlegapta Jêsusib Kristûsib tikiviane, ivjornaitoᴋotine illagilugit.