I Tessalônikamiunut 2 - Labrador Inuttitut Heritage Bible

Paulusib arvertalaungninganik idluartomik Tessalônikamiut akorngane, ᴋanorlo tâpkoa illaliulaungmangâgit ôᴋautsit tussarnertut.

¹ Ilipsetauk nangmineᴋ, ᴋatangutivut, ᴋaujimavose, ilipsingnut tikinivut sulinane pilaungimat;

² Imaimalle: sivorngagut kappiasuktitaujogut mitautigijaudlalaptalo Filippime, (sôrlo ᴋaujimagapse,) taimaigalloardluta Gûdivut tattigivlugo sivôralaungilagut oᴋautsit tussarnertut oᴋautigivlugit ilipsingnut, angijomik akkerartortaugalloardluta.

³ Kaiblainivut tamarnartomut ilingalaungimatta, mamaitunullônêt, pingitsertornermiglônêt illaᴋalaungilat;

⁴ Sôrlole Gûdemut nautsertortauᴋârluta sungertûtigijauvlutalo oᴋautsinik tussarnertunik oᴋâlaᴋojaugapta, taimâk oᴋâlavogut; inungnut idluarijaujomanata, Gûdemulle ômatiptingnik kiglisiniartomut.

⁵ Manigôtituinartunik oᴋauseᴋalautsanginapta, ᴋaujimavose, perᴋutiniaromanermullônêt pilaungminata; Gûdib nelungilâtigut.

⁶ Nertortaunasualaunginivogut inungnut, ilipsingnullônêt, assipsingnullônêt.

⁷ Kristûsib Apostelingititut oᴋumaititsinajartuksaulauralloarpogut ilipsingnik; anânatulle najulauᴋpapse, sôrlo arnab amâmaktitsijub ᴋitorngane pairingmagit.

⁸ Taimâk angitigijomik ômamut anerilauᴋpapse, ᴋununatalo aitoromavluse oᴋautsinik tussarnertunik, Gûdib pinginik, kissianeungitoᴋ, inôsiptingnigle aglât, nagligijaulerapse uvaptingnut.

⁹ Erᴋaigalloarpose ᴋatangutivut, senaniptingnik oᴋumainiptingniglo: uvlôtilugole unnuamelo senatsainalaurapta, nelipsingniglônêt oᴋumaititsijomanata; taimaidlutalo Gûdib oᴋausinginik tussarnertunik oᴋâlalauᴋpogut ilipsingnut.

¹⁰ Nelungilase Gûdiblo (nelunginivâ), ᴋanoᴋ ivsornaidluta idluartôvlutalo passijaksaunatalo najulaurapse, ilipse okpertose.

¹¹ ᴋaujimagivose, ilûnase atunit kaiblalaurapse nakoᴋsitiluselo, sôrlo Atâtab ᴋitorngane pingmagit;

¹² Kigligiutjigaptalo Gûdib nâmagijanganut arvertarᴋovluse, ᴋaiᴋojilauᴋtub ilipsingnik nâlegauvingminullo ânanauvingminullo.

¹³ Tamanna pivlugo uvaguttauᴋ sorairata Gûde ᴋujagivavut: Gûdib oᴋausinginik tussartapsingnik uvaptingnut ajoᴋertortaugapse, tamakkoa illaliulaurapsigik inûb oᴋausingititu-ungitoᴋ, Gûdible oᴋausingititut; sorlo mikseᴋârtôngmatta, pitsartujoᴋsôvlutiglo ilupsingne, ilipse okpertose.

¹⁴ Ilipse ᴋatangutivut, malikteolerapse Gûdib illagêktoᴋotinginik Judêamêtunik, Kristûse Jêsusemêtunik; ilipsetauᴋ kappiasuktitaulauᴋpose illapsingnut sôrlo taipkoa Jûdinut.

¹⁵ Taipkoa Nâlegaᴋtauᴋ Jêsuse toᴋolauᴋpât, nelautaijitiglo, unangmilauᴋpâtigullo, Gûdemullo idluarijaungilat, inungnullo tamainut akkerartorput;

¹⁶ Uvaptingnik oᴋâlaᴋojingitut nelojunut piulijaujutiksanganik, taimaidlutik ajornitik ᴋalerêktulugit ilûnaitigut pivait; ningautsiblo ᴋolangialerêrpait,

¹⁷ Uvagulle ᴋatangutivut, anikitomik ilipsingnik ᴋitorngaititaulaurapta, tautuptigut ômatiptigu-ungitoᴋ, pinialualauᴋpogut kênase takojomavlugit angijomik kipiniarluta.

¹⁸ Tamanna pivlugo uvagut tikitsomalauᴋpapse, uvanga Pauluse, atausiarnanga; Sâtanasible agvialauᴋpâtigut.

¹⁹ Kina nerriugutigilugolo, ᴋuviasûtigilugolo nertornautiksamik niaᴋôtiksarivavût? ilipseungitoᴋtauᴋ, Nâlegapta Jêsusib Kristûsib sângane, tikivianê?

²⁰ Ilipse ilâ nertôtigiluselo ᴋuviasûtigivapse.