I Tessalônikamiunut 1 - Labrador Inuttitut Heritage Bible

Gudib saimarsautânik Tessalônikamiune. ᴋujalinermik.

¹ Pauluse Silfânuselo Timôteuselo (aglakpogut) illagêktunut Tessalônikamêtunut, Gûdeme Atâtame Nâlekamelo Jêsuse Kristûseme. Gûdib Atâtapta, Nâlekablo Jêsusib Kristûsib saimarsautingata ullapirsautingatalo illagilisetôᴋ!

² Soᴋᴋosijuitomik Gûdemut ᴋujalijutigitsainarpapse tamapse, erᴋaumavluse tuksiarniptingne tamât;

³ Issumagitsainarlugit piniarnise okpernermut, senaniselo naglingnermut, ᴋenuersârniselo nerriungnermut, Nâlegaptingne Jêsuse Kristûseme, Gûdib Atâtaptalo sângane.

⁴ ᴋatangutigêt naglingnartose, Gûdib nagligijangit, ᴋaujimavogut anerijaumanipsingnik;

⁵ Oᴋautsit tusarnertut oᴋautigijapta tikingmase, oᴋausituinarnu-ungitoᴋ, pitsartunermulle Anernermullo ajunginermut, nakimarninangitôvlutiglo angijomik; ilipse ᴋaujimavase, ᴋanoᴋ ilingalaungmangâpta akunapsingne, ilipse pivluse.

⁶ Ilipselo uvaptingnik malikteolertose Nâlekamiglo, angijomiglo kappiasuktitautiluse oᴋautsit illaliulauᴋpase ᴋuviasukluse Anernerme ajunginerme.

⁷ Taimâk igjaraksaliarimavose okpertunut tamainut Mazedôniamêtunullo Aᴋâjamêtunullo.

⁸ Ilipsingnit Nâlekab oᴋausingit angijomik tussaumajaulermatta, Mazedôniamelo Aᴋâjamelo kissianeungitoᴋ, nunalingnulletauᴋ tamainut okpernise Gûdemut oᴋautigijauvoᴋ; taimaimat tamattominga oᴋautjijariaᴋangilagut.

⁹ Nangmineᴋ taipkoa oᴋautigingmase, ᴋanoᴋ angitigijomik nâlekaptigut; ᴋanorlo Gûdemut sâgiarapse, tunudlugit Gûdeungitut, kivgartoromavlugo Gûde ômajoᴋ mikseᴋârtorlo;

¹⁰ Erningalo nerriugivlugo ᴋilangmit, toᴋungajunit tupaktilauᴋtanga, Jêsuse, piulijigijavut ningautsemit pijomârtomit.