I Samuel 9 - Labrador Inuttitut Heritage Bible

Saulib, Gudib annerijangata attannermut, tattamnadlartomik tikkininganik Samuelemut.

¹ Anguteᴋalaukporle Benjaminib kinguvânginit Kisemik attelingmik, Abielsib erningata, Zerorsib erningata, Bechoratsib erningata, Apiab erningata, Jeminib erningata erninganik, tamna angutaulaukpok erᴋinaitok.

² Tamna erneᴋalaukpok Saulemik attelingmik; tamna innuosuktôvlune angutitsiangôlaukpok, ânanaunersaᴋalaungilarlo Israelib ᴋittorngangita akkorngane, niakotut attautsetut takkinersaulaukpok innuksoarnit tamainit.

³ Kisible, Saulib atâtangata siutekoktôjokotine arnet assiojilaukpait, oᴋarporlo ernerminut Saulemut: Nukapitsat illangat aipauᴋoleruk illingnut, parngnailerlutillo siuteᴋoktojullo ᴋenneriartorkit.

⁴ Aivorlo Efraimib ᴋakkangittigut, nunakullo Salisamik attelikut nenninagillo, aivuk Salimib nunangagut, tagvanêlaungilello; aivuglo Jeminib nunangagut, nenninagillo.

⁵ Zufible nunanganut tikkimanik, Saule nukapiamut aiparijaminut oᴋarpok: Kailerit angerarmilauluk; atâtama siuteᴋoktôjut nippotivallungmagit pingigilutalo.

⁶ Tamnale oᴋarpok: Ahâk, pittaᴋarpok iglugasaksoarne tapkonane, Gudib anguteᴋotinganik, oᴋausiovaktomik; oᴋausingit illunaita nallautsivut. Manna tagvungarlauluk; tapsoma apᴋut attoriaᴋartavuk oᴋautiginiarpallaiva uvaptingnut.

⁷ Saule nukapiaᴋotiminut oᴋarpok: Aivigigalloaruptigo, sunamik tamna kaitsivigijaksarivittigo? Kakᴋojaᴋarungnaimat pôptingne, assianiglo tunnergutiksaᴋangilaguk âtsungnartaptingnik Gudib angutinganut tapsomunga. Sunaᴋarpinûk?

⁸ Nukapiab Saule kiova: Ahâk, najorteᴋarpunga Sekelib Silbereôjub sittamanganik; tamna tunnijomavavuk Gudib anguteᴋotinganut, oᴋautjiᴋovlugo uvaptingnik, apᴋotiksaptingnik.

⁹ Itsame aijoᴋalaukpat Israeleme Gude appertsoriartorlugo tagva oᴋarpakput: Kaititse, takkojok aivigilavut. Manna nallautaijunik taijaujut, itsame takkojunik taijaulaungmatta.

¹⁰ Saule nukapiaᴋotiminut oᴋarpok: Namaktomik oᴋalaukpotit; ᴋait, ailauluk. Aitillugiglo iglugasaksoarnut Gudib anguteᴋotingata najuganut,

¹¹ Majorartillugiglo iglugaseksoarnut, niviârsijanik naipitsivuk, annilertunik immermik ᴋallusijartortunik. Tapkonunga oᴋarpuk: Takkojok tamâneᴋa?

¹² Tapkoa ᴋiovakit oᴋarlutiglo: Ahaila, ahâk, tagvanêpok; tuavilerit, uvlome iglugasaksoarnut tikkisimavok, innugatsuit uvlome tunnergutinik tunnijijomangmatta ᴋakᴋarolângme.

¹³ Iglugasaksoarnut tikkileruptik neniniarpattik, ᴋakᴋarolângmut majorarᴋârtinago nerrijomavlune. Innuksuit nerriniangimatta tikkiᴋârtinago; tapsoma tunnergutiksak tuksiarutigiᴋârmago, kingorngane ᴋaiᴋojaujut nerrivut. Taimaimat majoraritik, manna naipiniaraptiko.

¹⁴ Majorartilugiglo iglugasaksoarnut, iglugasaksuillo ᴋerᴋanêtillugik, ahâk, tagva Samuele annilerpok pachrearlugik, aijomavlune ᴋakᴋarulângmut.

¹⁵ Nalekable Samuelib siutigik nallojungnaitilaukpak uvlub taipsoma ikpaksangane Saule tikkiᴋârtinago, oᴋalaukporlo:

¹⁶ Kaupat nalliutome tamattomane, angut Benjaminib nunanganit pijok, tillijomavara illingnut; tamna mingoarlugo attaningortitaksarivat innuᴋotimnut Israelitinut, innuᴋotimnik piuliklerᴋovlugo Filisterit agganginit. Innuᴋotikka takkonârlaurapkit, nipliarningillo tikkisimavut sâmnut.

¹⁷ Samuele manna takkosartillugo Saulemik, Nalekab oᴋautiva: Ahâk, tagva angut oᴋautigilauktara illingnut, attaniojuksak innuᴋotimnut.

¹⁸ Tagva Saulib Samuele sângariartorpa ittertârvingme, oᴋarlunelo: Oᴋautilaunga, takkojub iglunga nanêᴋa?

¹⁹ Samuelib Saule kiova, oᴋarlunelo: Uvanga takkojôvunga, sivurlerlutit uvamnik majoralerit ᴋakᴋarulângmut, uvlome nerriᴋattigijaksarigaptinga; ᴋaupat aularᴋojomavagit, omamigijarniglo tamainik oᴋautigijomavagit.

²⁰ Siuteᴋoktôjullo uvlut pingasut sivorngane assiojilauktatit pingiginiarnagit manna, nachvarsimavut. Kialo tamaita ajunginerpât Israeleme piginiarpagît? Illingnut atâtavillo iglomioᴋotinginut illinganiangilât?

²¹ Saule kiovok: Jeminib erneringilângâ, Israeliblo kinguvarêngita mikkinerpânginit pingilanga, illakalo ikkinerpaulungilât, Benjaminib kinguvarênginit tamainit? Sôg tagva taimaitomik oᴋautivarma?

²² Samuelible Saule nukapiaᴋotingalo tiguvak tassiorlugiglo iglomut nerrimavingmut, ingitipâglo issukliovlutik ᴋaiᴋojaumajunit, tapkoa anguteôlaukput 30 git.

²³ Samueliblo igaje oᴋautiva: Abvako tunnilauktara illingnut, oᴋautigilauktaralo illingnetitaksarigangne, ᴋaitsuk.

²⁴ Tagva igajib tallek attatigijangalo ittertipa. Illivâlo Saulib sânganut. Samuelelo oᴋarpok: Ahâk tamanna amiakôvok, attuinaruterilerit nerrilutillo, ᴋumergutigijaungmat illingnut, nalliutome tapsomane innuit nerrijartorᴋolaurapkit. Taimak Saulib Samuele uvlorme taipsomaneme nerriᴋattigiva.

²⁵ Kakᴋarulângmillo attersarmatta Samuelib Saule oᴋarᴋattigiva iglub ᴋângane.

²⁶ Uvlarârsukullo makkiput; ᴋaublo aupallungninga nuilertillugo, Samuelib Saule ᴋaiᴋova iglub ᴋângane, oᴋarlunelo: Makkitit! aularᴋojiᴋovlunga illingnik. Saulelo parngnailerpok, tapkoalo magguk, aiparêklutik annilerpuk, tamna Samuelelo.

²⁷ Attersarlaukârlutik iglugasaksuit issuanut Samuel Saulemut oᴋarpok: Nukapiak oᴋautiuk sivorlerᴋovlugo uvaptingnik, (sivumuarporlo); igville nokᴋangalerit, ᴋaujititsiᴋovlunga illingnik, Gudib oᴋauserilauktanginik.